我嫁喇!!
等到今日，我嫁喇。
一早起身就見識到暴龍既威力：-
我都係岩岩刷完牙敷 mask，暴龍表妹同亞姨都未起身。
燈塔表妹呢個時候已經到左酒店。
酒店保安打電話黎，話有人到訪，要住客去大堂接人。
我敷住個 mask，唯有叫暴龍表妹起身。
嘩，不得了，佢同 d 酒店職員開火！
bilibalajilijala~~~
終於燈塔表妹入到黎，之後 d guest 都唔使住客接。
希望酒店 d 人冇咀咒我，嘻。
左滕右滕，滕到 MUA 到左，我仲敷住個 mask，唔記得除。:-P
全個房得廁所有大鏡，所以匿向廁所化妝。
都唔係好知出面發生乜事。
姐妹陸續到，陸續化妝 set 頭。
好快就人齊，好快就大軍殺到。
我匿向房，偷聽佢地玩遊戲。
其實遊戲係我諗，d 相都係我預備架。
我真係錫住新郎哥囉~
讚下我 d 姐妹先，我都冇叫佢地預備野，但黎到又會有紅絲帶、宣言紙、宣言筆...
玩完我預備既遊戲，同我講幾句宣言 (有人寫錯新娘子個名囉...)，都準備"交收"架喇，點解無啦啦加插要做掌上壓？
哎呀，新郎哥尋日托完水，肩膞都未復完。
點解呀？點解呀？
原來...新郎哥漏左開門利是向車...暈...
掌上壓係拖時間，等兄弟跑去車拿囉。
攝影師話做咁多年都未見過新郎哥唔記得帶開門利是囉。
成功接到新娘，開始斟茶活動。
終於戴上媽媽送俾我既豬豬頸鍊。
我一路都嚷住媽媽要買豬豬頸鍊俾我，實在好鍾意~
我仲好想可以留俾我個女，一代傳一代...(可能睇電視睇得太多...)
出門喇。
搭住馮小朋友既寶馬，向男家出發！
向馬路上，攝影師向28座係咁指示我地咀咀，係咁咀，係咁咀。
哈哈，劇情需要喎...
新郎哥入門叫「爸爸媽媽，我返黎喇，我帶左老婆仔返黎喇。」
小王子同小公主就一路唔停聲。
辛苦佢地喇，要綑住向騎樓度。
斟完茶，影下相。
收到電話話爸爸唔見左銀包。
噢！
註冊落左爸爸名，改唔到人。
passport...passport...頂得到...ok...過到...
汗"
之後一堆人去 lunch，我留返向男家換衫化妝。
柴仔都留低，飯到既時候餵我食飯~
呀~em~
:-P
發現竟然冇帶 MUA d 首飾。
我最鍾意既冠呀...
MUA 問我係咪真係好想要個冠，我真係好想囉。
佢竟然肯跟埋我去註冊，幫我上冠。
實在太多謝佢喇！
因為跟埋去註冊就算係全日 plan 架喇。
(佢最終係冇收我額外錢架！)
出發去註冊。
路上好辛苦呀！
著住 girdle，好窄好窄既婚紗，坐向度感覺透唔到氣咁。
仲要上去世紀見証個路口好難搵，試左三四次先上到去。
落車先舒一口氣。
上返個冠，好快就行禮喇。
都冇時間夾多次點行，好在上次有綵排。
爸爸帶我行入禮堂，我行得好慢好僈，好好享受呢一刻。
冇加額外錢，都咁岩係鄭家富做我地証婚律師。
好好彩，好抵。
鄭家富講一輪野，到我地宣誓喇。
柴仔先，綵排果陣明明話讀到 d "你" 要望下對方，佢都冇望到。
到我讀。
「我請在場各人見證：我 xxx 願以你 xxx 為我合法丈夫，並許諾從今以後，無論環境順逆，疾病健康，我將永遠愛慕尊重您，終身不渝。」
上次綵排冇讀到，今次黎真既，我又眼淺喇。
:-*
安排28座接 d 親友去酒樓。
我同老公 (<-YEAH!!)同兄弟姐妹向附近影相。
我仲學左o靚模十式！
有美女廚房又有型男廚房。
失左一失預算，尖沙咀去旺角塞車，28座返唔到黎，兄弟姐妹要搭地鐵...
亞江就幫我收姐妹衫爛數。
我同老公坐主花車都塞左好耐至到。
我向車上又係屈住好鬼辛苦。
車程中瞌左陣，醒後佢地話我知，好多人睇花車新娘訓覺囉~
著返件好舒服既褂。
亞媽今朝冇著褂，到酒樓先換。
發覺褂舖將媽媽同奶奶件褂掉轉左入盒，著起上黎一個鬆一個緊至知。
冇乜親戚朋友咁早到，好少斟茶又好少影相。
好快又換返婚紗喇。
MUA 話著白色衫唔好斟茶，所以一切斟茶活動暫停，開席後再斟。
婚紗一路著到開席進場，多 d 時間同人見下，影下相囉。
成日問我睇下有邊 group 到左可以叫佢地上黎影相，但其實我都睇唔到人，個心又數唔到齊唔齊人，哈，遊魂。
心入面知有 d 人未影相既，但都要開席囉。
換過個髮型，經人地個廳出門口。
好搞笑囉，人地壽宴有對新人經過。
聽 d 人睇成長片段，好似冇乜反應。
唔得意咩？
我覺得好得意喎，我睇得好開心架。
出場喇！出場喇！
見到好多朋友，都有好多見唔到，因為個 spotlight 實在太 chang 眼喇！
又要拿住花球，又要 Q 住老公，又要顧條裙，唔係好似我想像咁可以同在場既朋友揮揮手囉。
切假既結婚蛋糕、合巹交杯。
就到我最緊張既環節喇。
好冇用囉，講左兩句就開始喊喇！
講到一舊舊，仲漏左好緊要既野...唔記得多謝我老公呀！！
我記得見到 Toffy 指住柴仔架，而家諗返我諗佢係提我多謝柴仔，但我當時諗佢叫我交咪俾老公囉...
補返先：
多謝爸爸媽媽照顧左我咁多年，而家有人接手喇，佢都會好似你地咁鍚我，對我好好。
多謝老爺奶奶，你地教得個仔好好，賜左我一個好老公。
多謝 Dr Lau，唔係你咁熱心 Sem break 都搞活動俾我地，我都唔會識到柴仔。
多謝姐妹們，今日辛苦佢你喇。
多謝兄弟們，識左你地十年，對我最好都係今日。
多謝在座既賓客，全部我同我老公同埋我地爸爸媽媽最親密既朋友，用呢一晚既時間分享我地既喜悅，為我地送上祝福。
最多謝既，係向我身邊既老公...真係好感激、好感激。
完全因你，因你完全。
:-*
到柴仔講，講得幾好丫，不過佢唔知原來佢冇表明多謝佢爸爸媽媽囉。
呵呵，嬲死呀~
過埋呢關，我又換衫。
我好鍾意呢條漸變色裙。
配一個皇冠仔，好似個公主咁~
暴龍表妹笑我有公主病囉！
巡遊敬酒。
飲杯~~ (兄弟好落力呀~)
成日俾人話唔岩位敬，但個人個腦都真係 function 唔到。
敬到好後先收到係講緊乜...
:-P
敬完酒仲可以檯檯影相，增加靚靚晚裝暴光機會~
仲可以影返席前未到既朋友！
不過好可惜，真係冇時間同到佢地傾下計。
送客喇！
個個都話我隻手凍，其實冇乜感覺。
新娘真係會變身 superwoman 架！
散 lu，返屋企 lu。
爸爸媽媽，我跟佬走喇~ :-P
Sunny 真係唔話得，仲車埋我地返屋企 (佢好似要趕返工架...)
Andy 仲幫我地搬埋野入屋。
今日真係多謝哂 d 兄弟姐妹~
大 show 做完咯，由明星變返一個普通女人。
沖完涼洗完頭，我問老公有冇覺得貨不對辦。
佢話...今日同佢一齊果個唔知係邊個...
哈哈！
Labels: 出門酒店, 婚姻註冊, 婚宴, 婚宴紅酒, 婚宴請帖, 婚禮傳統, 婚禮攝影, 婚紗禮服, 新娘化妝, 星期三緊, 結婚戒指, 花球
行大運
今日要四出拿明天用既物資。
十一點去拿婚紗晚裝。
一件婚紗、兩件晚裝、一條姐妹裙、蛋糕底裙、手套、小小配飾。
兩大袋野。
搭車返新居。
拿 d 大小相簿油畫、林林嬸嬸野去酒店「開房」。
M01，就係我聽日出嫁既地方。
有一間大房兩間細房兩個廁一個廚房。
好大個窗，好大個海景。
俾柴仔睇多兩睇，嘻，冇佢份享用嘛。
碌返出旺角拿褂。
三套褂、送紅睡衣同紅傘。
放低媽媽個套俾亞姨。
又趕住去開茶會。
初初諗如果佢十月十日開，我地去唔到都冇人幫我地去得到。
結果係今日五點，哈。
有人叫我地唔好去既，冇乜用喎。
但我地少出門嘛，聽下囉。
最後一站係去拿鮮花。
又幾盒野同好難拿既花球。
返酒店養住 d 花，柴仔要返屋企喇。
仲話結婚前一日唔可以見面，咁多野預備，唔見點搞得掂呀。
我去大快活同姐食晚飯。
係囉，點解今晚食大快活既？
由於覺得酒店個廁所沖涼唔係好自在，我返左新居沖涼。
媽媽忙住煮湯丸，係我至愛既糖心湯丸呀！
已經好耐好耐冇食過喇！
辛苦哂！
眾人睇完電視就開始上頭。
已經教左爸爸點講，結果都係唔記得四梳。
一梳梳到尾
二梳梳到白髮齊眉
三梳梳到兒孫滿地
四梳梳到四條銀筍盡標齊 (唔記得左)
真係烏龍~
今晚有暴龍表妹(我既伴娘)同亞姨留向酒店。
人人都話之前一晚會訓唔著，兩三點仲諗緊 rundown。
我唔係囉。
一早就想訓，係暴龍表妹捉住我同我油指甲。
哈哈，多謝哂。
今日都做左樣其他新娘子話佢地經常發生既事。
唔想俾柴仔知，但唔知點解佢都知道左。
好傻~
聽日就嫁喇。
:-*
Labels: 出門酒店, 婚禮傳統, 婚紗禮服, 星期三緊, 花球
悠長假期
今日展開我既悠長假期喇！
第一個節目就係未來女婿仔同爸媽飲早茶。
爸爸成日話我唔請佢飲茶(其實請過幾次食其他野啦！)，今日點都唔會唔計喇掛！
跟住走去辦銀行業務。
一早約左話拿十萬yen，又唔講有 limit，結果拿得七萬五。
入埋紅酒條尾數，換埋 d 散紙，銀行業務辦理完畢。
俾柴仔睇報紙見到今日 Giordano 開倉。
為左添置 d 衫去旅行，我地都去左行下。
第一日開倉，又係平日，d 貨仲好整齊，d sales 仲好好禮貌兼會介紹產品。
係咁二行左個圈，買左百五蚊野，有十對襪、兩件衫同一條頸巾，抵！
趕去下一站 -- 去拿主花車裝飾。
唔重，但大大件囉。
靠柴仔拿返屋企，我就去做 facial。
今次有兩個人 serve 我。
但我覺得好似俾人當公仔咁武，唔係咁自在。
換左人，始終感覺唔係咁好。
仲 sell 我話 join 新 plan 有 discount...我堅持唔 join 囉。
搞左幾個鐘，柴仔打俾我話我做乜好似人間蒸發左咁...hehe...
趕返屋企，reply 返註冊場地 d 細節。
最重要既係......rundown d 附屬品出爐喇！
希望兄弟姐妹仲睇得切啦~
唉...燈塔表妹話我知 d 姐妹裙仲係拿唔到...
佢幫我搞全部唔要，全單退錢。
好在個個都有現成姐妹裙頂住。
唔係好唔開心既，煩囉。
Labels: 婚姻註冊, 婚宴紅酒, 婚紗禮服, 星期三緊, 美容
LSWD
今日 d 同事問我係咪 last day。
經更正後，話我今日係 last single working day。
哈哈，係呀，返埋今日就開始我既悠長假期喇！
lunch 同我食左餐好既，我仲走左去買西餅俾佢地做下午茶。
由於最後一日有 printer 用，把握時間決定埋婚宴個座位表。
係咁同柴仔 email 黎 email 去。
搞完個座位表先做埋公司 d 手尾，其實我唔做同事都可以做到既，但費事要人執手尾啦。
九點幾先走呀，計唔計 OT 好呢？
收到 Miffy 話姐妹衫有問題，等左成個鐘都拿唔到。
舖面又有好多人都係等緊，仲話有人報警。
佢話聽日再去過。
em...我都係唔好諗咁多喇...
Labels: 婚宴, 婚紗禮服, 工場 H, 星期三緊
oh~ 芭瑪
今朝收到柴仔傳來既消息，話有個風黎緊！
都係頭一次唔想打風。
未雨就要綢繆下。
續家續戶打去問如果打風會點安排...
酒樓、攝影、化妝、車、衫、註冊、紅酒、花球...
結果係 - the show must go on，係冇得註冊囉。
touchwood touchwood~~
Labels: 婚姻註冊, 婚宴, 婚宴紅酒, 婚禮攝影, 婚紗禮服, 新娘化妝, 星期三緊, 花球
柴的電腦
今日行程緊湊。
先去買褂鞋。
呢個項目我冇乜要求，去返旺角樓梯底好出名果間度買。
呢間野都幾犀利喎，我諗有蒲 ESDlife 既人都會識。
真係好快，十五分鐘都唔知有冇就走得。
下一站去 Trinice 揀花。
上到去佢有再介紹架，不過免得花多眼亂，要返之前自己揀好果 d 款。
花球
俾四大長老既襟花
俾家姐姐夫哥哥同佢女友既襟花
俾兄弟姐妹既襟花手花
彷彿係一系列咁架，因為個個都有 d 白色小花！
約左亞生拿茶具。
佢實在太好人喇！
幫我向大陸買茶具，有平貨之餘，我仲可以慳返 d 車錢。
再下一站就係黃金。
今次到買柴仔既電腦。
不過佢唔好彩，個 case 向平果間冇貨，要去第間買貴 15 蚊，LCD 又冇左 惠康 coupon 送。
大袋細袋返新居砌機。
又遇到困難喇！
SATA 頂住個火牛，搞好耐加夾粗黎先整到。
柴仔仲整到流血都唔知，我見到個機有血，佢先發現原來係佢流緊......
夜晚仲要招呼 E 記既朋友仔黎參觀。
呢班野唔賭唔舒服，不過我乜都冇，得好益智既 UNO。
哈哈，所以都冇坐好耐就散 lu~
好充實呀~
Labels: 一片瓦, 婚紗禮服, 工場 E, 星期三緊, 花球
Exing
今晚同 d 姐妹去 Exing 揀裙款。
我冇特別要求，淺色短裙就得架喇。
結果揀左以下幾款：
係 d 腰帶會唔同色，因為個個姐妹各有心水。
粉紅、綠、紫...幾好幾好！
Labels: 婚紗禮服, 星期三緊
解困
次次諗起 d 姐妹衫安排我就好頭痛。
自從暴龍表妹話唔著上次 hold 左果條伴娘裙，頭痛加劇。
因為溫馨好死，點都唔肯轉款。
同埋條裙既租金又真係幾金(三千四百八十四條裙既其中一條)。
我好唔捨得吊條裙向度冇人著。
今晚約左 Miffy 同 Noffy 去睇下。
其實我都唔係幾好意思，好似要佢地要我表妹唔要既野。
不過好姐妹就係好姐妹，佢地完全覺得冇問題，一 d 都唔介意。
好多謝你地~
**********
經過百利，去下個 MUA 度。
自從上年六月就冇見過喇，估唔到佢會認得我係佢客仔。
好 surprise~
Labels: 婚紗禮服, 新娘化妝, 星期三緊
舊日
今日帶左 d 舊日記同舊功課返新居。
尋晚執拾既時候，都回味左一下。
睇到同柴仔過既日子，真係俾佢 d 傻氣激死。
睇到婆婆走既時候，都睇到眼濕濕。
仲有返學返工既生活...
老喇，鍾意睇舊時既野...
去拿柴仔套禮服。
弊，穿左上身同睇雜誌既感覺有 d 出入。
有 d 擔心， 不過柴仔梗係話冇所謂。
條衭 size 唔岩，要改改，擇日再取。
行海馬。
終於買到新床單喇！
上次買果套俾人呃左，明明得九寸個 sales 話有十一寸。
今次個招紙寫明十一寸，冇死喇卦~
見到有老翻賣，走埋去揀，感覺好緊張架！
買左吸血新世紀、奇幻逆緣 & 禮儀師。
不過柴仔話佢冇興趣睇...
唔得！最少陪我睇一套！
Labels: 一片瓦, 劃火柴, 婚紗禮服, 星期三緊, 點滴生活
金多寶
金多寶，唔係講緊六合彩果d，係一間賣旗袍既舖頭。
柴仔向網上面搵到呢問舖頭，今日全家出動去揀衫。
未來奶奶揀左件粉紅色晚裝旗袍，揀左件註冊既衫，想揀埋衭架，但係揀唔岩。
我都見到有件旗袍好靚，不過邊有時間著丫。
見到 d 旗袍仔，又諗下姐妹衫。
都幾得意丫，不過唔知係咪人人接受到。
(特別鳴謝個 model~)
揀好哂就搵地方食飯。
始終土瓜灣比較少選擇，搭的士走去九龍城食泰國菜。
又係食金麥泰囉，都唔知點解去親九龍城食泰國菜，都係會去左呢間。
**臨時市政局同臨時區域市政局既墊檯紙
到要返屋企既時間喇。
好怕向九龍城走，因為我係唔識搭巴士返屋企既典型九龍人。
好彩有個識搭巴士返屋企既典型新界人。
嘻嘻。
Labels: 婚紗禮服, 星期三緊
涼浸浸
貪心，拿左六本書。
本來一個袋裝哂，亞媽叫我分開袋，就搵左個袋分兩本過去。
單膞背四本果袋，到地鐵站已經赤赤痛。
六本真係唔知點頂，好在聽亞媽話...
同新郎哥去做西裝，柴哥哥都有黎幫下眼。
揀左套中山裝樣既，做埋背心同恤衫，盛惠一千三十蚊。
To Do List 又可以少一個 item~
柴仔用積分換左朋友仔風機，今日去拿。
返到新居即刻試用啦！
有埋冰盒架，真係涼浸浸~
夜晚返屋企，撞見亞東。
見到呢 d 有經驗人士，問下佢派帖果陣個面點整囉。
都係用 label，但就順住打，之後慢慢界。
可以參考下既。
跟住佢問我印帖未，哈哈，已經印好左拿埋返屋企添喇！
佢話我快得好緊要呢！
Labels: 一片瓦, 劃火柴, 婚宴請帖, 婚紗禮服
披嫁衣 - beta
約左今日試衫，都幾緊張架。
有人教過要化少少妝去試先好睇，我都化下囉。
冇化開妝，冇工具冇技巧，所以之前走去買粉底胭脂惡補。
冇話俾柴柴知我有咁既安排，想俾個驚喜佢。
唔知有冇嚇親佢呢？
搞掂個妝出門口，都幾唔慣，好驚好核突，自己又唔知但係人地陰陰笑。
仲要身負重要任務 - 去黃金買保護貼！
向個麻甩地方，真係想快 d 搞掂走人。
但之前聽柴仔講好既保護貼要百幾蚊，我見果 d 五十蚊都唔使，擔心唔岩使，所以向個麻甩場兜兜轉轉。
問完柴柴，五十蚊都殺。
走！
返到去，柴仔見到我，冇表示驚嚇都冇話靚...
如果好睇，佢既反應應該唔會係咁...
嘻嘻，算囉。
玩新玩具~
拍左一張我覺得好溫馨既相
我影左 d 屋企，柴柴又用佢好定既手拍片。
駁去電視播返出黎，好清好靚，播片個效果仲好正好正！
每張相既過場有效果，又會由一邊 pan 去另一邊，好似睇緊樓盤介紹咁~
好新鮮，睇得好開心！
出尖沙咀，又去踢館。
不過冇人囉，真係懶惰。
橫掂去到海旁，影下相囉。
有個同胞叫我地幫佢影相，我地又幫佢影。
又係好靚架！
唔通新玩具真係咁勁！？
要準備戰鬥喇！
柴柴、奶奶、媽媽、亞姨、暴龍同燈塔，嘩，多人到丫。
實有排試，所以之前已經通知左佢地食左野先好黎。
我試返上次 confirm 果一件婚紗。
一試出黎就被踩到地底泥咁...俾下面啦，話哂都係我上次既選擇丫。
係咁試，除左好肯定唔鍾意層層紗，我已經冇乜方向。
唯有先轉戰晚裝。
係我自己埋架揀一堆黎試既。
聽人講晚裝好難落手，都唔係丫，我好快揀到喎。
揀左兩件，見另外一件個款幾好，我仲問有冇婚紗型。
真係有呀，不過係大拖，要再加三百蚊。
試左上身，都幾鍾意。
confirm 啦~不過要俾多三百蚊，好肉赤呀~
奶奶同媽媽都揀唔到衫，暴龍就 confirm 左伴娘裙。
總共搞左三個鐘！！
辛苦哂大家~
Labels: 婚紗禮服, 星期三緊
媽媽出戰
開始慢慢螞蟻搬家。
今日帶媽媽去新居參觀，仲可以拿多 d 野。
執左 d sailormoon，梗係不忘睇返下啦。
地場衛~ 禮服幪面俠~ @@~
參觀完出旺角同媽媽睇褂。
去返錦發睇，三兩下又搞掂。
柴柴仲成功爭取到送傘 tim 呀！
不過租果件唔係媽媽最鍾意果件。
冇辦法啦，希望媽媽唔會好唔開心啦，起碼都還左佢想著褂既心願囉。
(明明都試左幾件，但係影得一件)
搞掂 d 褂，去訂出門酒店。
海鮮房價：兩房 1100 三房 1200。
上次問明明兩房 1000 三房 1200。
好在對我冇影響，因為我租三房。
老闆問係咪出門用呀。
佢話唔係關心用途，而係好多大頭蝦 book 錯日子，好心提提我地。
哈，我冇 book 錯呀，未笨得哂！
跟住去睇帖既版。
一直以為有真帖睇，原來只係一張 A4 紙印左排好版既字。
再等多十日八日就有得拿喇！
到時要做工廠妹工廠仔，入餅咭入利是入帖...入...入...入...
最後一站睇晚裝。
亞媽對金都 d 衫完全冇興趣。
佢好有主見，我又唔擔心既。
今日好似做左好多野咁，我覺得自己好叻呀！
返到屋企見媽媽已經訓左，話行到好支力喎。
哈哈，我受左長期訓練係唔同 d~
Labels: 一片瓦, 出門酒店, 婚宴請帖, 婚紗禮服, 星期三緊
62 99 出戰
今日我睇中醫呀！
Lion 睇過，佢介紹既，話皮膚好左喎。
咁我為左靚靚，梗係卜到去試啦。
八十蚊診金，每日藥粉四十蚊，共三日劑量。
約左下星期二下午覆診，睇下 d 藥岩唔岩。
無啦啦要請假覆診，嘻嘻。
睇完醫生，同柴仔同柴媽媽會合，之後柴爸爸都 join 埋。
去睇新娘褂、奶奶褂同奶奶晚裝呀！
先去睇褂，心水店舖係美華、錦發同永隆。
入到美華，我地話想睇下 d 褂。
個男人就話「下，睇咋，你等齊人再黎睇啦。」
我心諗，下，62 99 老公都向度，仲唔齊人，要唔要我叫埋果晚去飲 d 親朋戚友去睇呀！
咁我話都齊人啦。
個男人就話「你係咪租架喇？」
我「我地想睇下先。」
男人「睇咋，你睇下 d 相先啦，係租先俾 d 褂你睇。」
車，睇相使鬼黎牙，佢 d 相有幾張仲係冠南華網上面 d 相黎既。
唔使再講喇，即走！
你唔憂做我都唔辛苦你！
跟住就去錦發。
有位郭小姐即刻招呼我地。
我地都係話想睇下 d 褂，郭小姐就拿 d 褂俾我地睇，又俾我地試。
次序唔記得喇，試左一件平腳，一件大五福水波，兩件中五福水波。
鍾意水波腳多 d，因為青春 d 可愛 d。
鍾意中五福多 d，因為鍾意多 dd 紅色。
佢地俾影相既。
郭小姐見柴仔影我後面，仲幫我攝條裙向後面俾佢影。
招呼好到不得了。
呢度係果兩件中五福水波。
其實只係著左件衫，條裙係夾住架咋，所以俾柴仔笑我成個人梗哂咁。
我試完到 99 試。
又係想睇乜就有得試乜。
試左兩件棗紅色同一件黑衫紅裙。
d 褂暴哂光，冇哂神秘感 tim...
唯有唔講揀左邊件啦~
本來都諗住睇埋永隆架，但係見郭小姐招呼咁好，d 褂又好新淨，又見好多 esdlife 既姐妹都租呢度，所以都唔多心，即刻俾左訂。
一千一百六十蚊...bye bye~
不過係有樣野唔開心囉...
點解佢淨係送睡衣，唔送傘既...
搞掂 d 褂，去做帖。
係比較早少少既，不過既然帖既內容都定左，勿搞埋佢囉。
高經理拿左一本帖既真實樣板俾我地揀，但係唔見左我地最初鍾意果款帖。
揀唔落手呀，始終鍾情左果款。
好在同返高經理講，佢都肯同我地做返果款。
俾低左 d 資料，安心等通知去睇板。
(其實我知道點形容果款帖，但保持神秘，唔講~)
Labels: 婚宴請帖, 婚紗禮服, 星期三緊, 美容
燈燈燈
鋪左 d 磚，個半拋光效果好靚。
不過幅相好似唔係好 show 到個效果。
向美心食完 lunch，去街市行下，噫，發現我地笨左啦，街市好多平野食呀。
又多款，做飯堂都得。
唯有遲 d 再試啦。
搭 87D 去旺角睇燈。
主要睇書桌燈點搞，結果廳都複睇左一次。
有盞八個頭既我幾鍾意，但我地唔使咁大盞燈。
話有六個頭既，但效果又唔知會係點。
有 set 燈泡形燈，我地都覺得好得意，但的確冇左 d 高雅感。
睇到一隻書桌燈，我覺得 ok，柴仔竟然話似抽油煙機...
有 d 上星期去睇，明明話優惠做到上星期日，今日去到佢話優惠做到聽日，呃人既。
唔知係咪好幾個星期都係咁行法，柴仔話冇行得咁支力，又係喎。
睇婚紗鞋，想搵 d 前高後高既款。
冇辦法啦，人矮嘛，又唔係件件婚紗有得改短。
先去旺角中心，但 d 款好嚇人，不過起碼知道有。
再去金都，d 款 ok 呀，全部 tailor made for 結婚嘛，但貴 d 囉。
唉，慢慢再睇啦...
Labels: 一片瓦, 婚紗禮服
披嫁衣 - alpha
約左 Loffy 同 Noffy 去試婚紗。
我只係約左三間婚紗店，時間如下：
13:00 紫水晶
14:00 溫馨
15:00 Vianei
我見網上面有人去齊港九新界試幾十間，我就冇咁好氣喇。
先上紫水晶。
上個星期去睇過，記底左 d 心水型號，所以好簡單。
個姐姐搬左 d 衫出黎，有 d 同想像中有 d 分別。
因為未係 join，所以只可以試幾件。
換第一件既時候，心情好緊張架。
之前向 ESDlife 都同幾個女仔講過，好擔心著住件婚紗出黎唔知另一半會俾咩反應。
諗起益力多個廣告就搞笑。
http://www.youtube.com/watch?v=SaABX0oxJXk好在柴佬都冇表現得好驚嚇，我都安落 d。
跟住上溫馨。
唔知係咪燈光效果，佢果度 show 出黎既婚紗好以靚 d。
不過果度冇相睇，全靠個 sales 姐姐根據我既口味去搵 d 衫出黎俾我睇。
清得黎又要 d "撈搞"，唔要紗紗，對稱 dd 既...
同埋只係可以試婚紗，佢話因為晚裝款轉得快喎。
試左三件婚紗，都好鍾意呀。
最後上 Vianei。
Loffy 尋日先至陪完 friend 去，所以 sales 姐姐都認得佢。
初初睇相，冇乜幾多件揀得落手。
不過既然都黎到，都試下囉。
試左兩至三件啦，都係唔使穿鋼紗既款。
嘩，件婚紗同件紛紅晚裝都好得，閃得好靚。
可惜我諗住要一件婚紗加兩件晚裝，果度我揀唔到第二件晚裝。
貨比三家之後，肚餓。
明明睇衫之前食左吉野家，又會咁快肚餓既，乜試衫好 side 力咩？
去間餐廳坐低食個下午茶，慢慢諗清楚。
最後決定 join 溫馨。
食完野就返去 confirm。
要左四套衫個 package，三千四百八十蚊，再加小拖尾五百蚊，總共盛惠三千九百八十個大洋。
諗住租一件婚紗、兩件晚裝同一件伴娘衫。
男禮？唔係我唔俾柴仔揀衫呀，係佢話鍾意普普通通一件西裝。
咁佢鍾意囉，我又唔專制既，嘻嘻。
(後記：我笨左啦，返屋企睇返人地 d 討論，話可以講價 free 拖尾架。而家只係俾左個加衫 discount 我。)
今日只係揀婚紗，晚裝會婚前半年先揀。
換衫速度好快，揀衫有 d 壓力，因為 sales 姐姐成日要我 out d 衫。
其實件件都好靚(我要求好低)，所以好難決擇。
又唔影得相(今日試咁多都唔影得，真係 join 都唔影得。)，好難記得著起個效果。
最後揀左件裙身泡下泡下既。
呵呵呵，又搞掂一樣野。
Loffy 要走先喇，Noffy 同埋我地去訂註冊場，順便等佢都拿下資料。
我地決定左揀世紀見証呀。
望多兩望個堂，決定要 Rose Hall。
雖然唔係粉紅色粉絲，但係怕 Century Hall 黃得滯，又唔顯件紗，所以揀 Rose。
場地唔係好大，六七十人左右就會好熱鬧，希望我會安排得好啦。
又倒多三千二百四十個大洋落海喇。
Noffy 夜晚去飲，我地就向旺角散。
真係唔知點解，我又肚餓。
走去廟街食蠔餅、煲仔飯、飲支裝可樂。
食完行下街，經過 Bossini，俾件衫吸左埋去。
係小公主呀！
不嬲慳家柴仔都忍唔住手，用九十九蚊買左一套 (一件衫加一個袋)，仲即刻著左件衫。
柴仔話佢搭火車既時候，有個男人望住佢心口呀~
哈，笑死我。
Labels: 劃火柴, 婚姻註冊, 婚紗禮服, 星期三緊
註冊-睇場
今日我做領隊，帶柴柴去睇註冊場。
唔係好想搵律師到場。
因為我怕有人掛住食野，我地宣緊誓，佢就向度食花生飲汽水，諗起都掃興。
又怕酒樓 king ling kan lan，幾唔莊嚴呀。
另外搵個場，仲可以叫 d 唔請去飲既人黎，幾好咁。
註冊場，最多人知都算係伊甸園既。
但係就好似好多 bad comment，所以既然有其他選擇就唔睇呢間。
第一站去中港城既世紀見証。
http://www.centurywedding.com.hk/
幾易搵，地方幾開揚。
感覺唔錯。
第二站去尖沙咀中心既 2 in 1。
http://www.2in1.com.hk/
柴仔一聽到個名就話「二合一!?洗頭水牙？」
間野向地庫，感覺幾迫。
有人行完禮，混混亂亂咁，都冇入去禮堂睇就掉頭走。
out~
最後一站係諾士佛台既緣美傳說。
http://www.eternalring.com.hk/
比較難搵 d，同埋地點有 d 怪 - 諾士佛台裡的商業大廈的婚姻註冊場。
內裡環境都 ok 既，聽個男仔介紹，覺得佢地都幾有 heart 去經營。
場就睇左喇，其實都有心水既，不過我唔會咁爽快，諗一個星期先啦。
當然...呢個星期我又會有排驚...
仲有時間，走左上紫水晶睇婚紗。
第一次為自己睇婚紗，好心動，件件都覺得好靚。
我都冇乜要求丫，想係一字 low cut，唔想係吊帶，唔想係紗下紗下果 d。
俾柴仔發現左我睇住一頁唔揭...hehe...因為見到件紫色蛋糕好靚嘛。
約下個星期去，真係搵幾件試下上身...呵呵呵~
今晚柴仔要去飲呀，一改佢恤衫西褲既形象，只係借哥哥件野性恤衫同著牛仔褲，反而平時爛撻撻果 d 就執正左。
人人都覺得出奇，每一個人到就問佢一次，哈哈，問到唔想答。
我叫佢去做探子，睇下人地點安排。
口口聲聲叫我咪傻啦，但勿又係有睇到...讚讚~
學到要安排好影相時間囉。
我都想去下飲，偷下師，可惜短期內未有機會。
不過...點解偷師都要咁貴"學費"既...
==========
今日柴仔金句「有太陽既地方都係黑暗既」
(唔記得無啦啦做乜咁講，不過好玄，所以寫低左。)
Labels: 婚姻註冊, 婚紗禮服, 星期三緊
奇華特
今日過左海，去買 girdle。
上次平日去都見有人排隊架喇，但諗唔到假日會誇張成咁，排到去樓梯。
細細既舖有三個剛好企到一個人既試身布格、四個店員左右。
都真係好多準新娘、伴娘、姊妹去。
有 d 係之前買過結婚用既覺得好，返黎買平日用既。
仲有媽咪帶發育中既女黎買。
試果陣蔡太會落手教埋點穿，我又唔覺得尷尬喎，最緊要效果好，呵呵。
等試、試、買、等改、覆試，總共用左三個鐘，條腰支力到死。
要靚，無計。
Labels: 婚紗禮服, 星期三緊
頻撲的假期
今日請左假。
朝早同柴仔去長沙灣填表。
呵呵，佢有文件唔記得帶。
好在唔係我唔記得姐，唔係實被扁。
個銀行界朋友都幾得意，"熬"佢最得意。
估唔到填份表都咁耐，搞到肚仔投訴，打哂鼓咁，冇食早餐嘛。
酒席果度我打左電話去 hold 喇，不過個經理放假，要星期三先去落訂。
話就話 mark 左簿，但都驚驚地，快 d 到星期三就可以了件心事。
話時話，我上次去睇場，有對 2010 年年中既新人已經去搵酒席，真係幾誇張。
我話囉，第時追女仔要咁：「你可唔可以做我女朋友呀，我訂左酒席架喇！」
哈哈。
去律師樓搞完 d 野，飲杯好似話好出名既涼茶，就丁去銅鑼灣。
去搵下傳說中賣 girdle 好好既地方。
可能係平日啦，唔算好多人，兩三個排向門口囉。
視察完就走喇，我下次自己先再去買。
呢個細世界真係細，咁都撞到另一個放緊大假既同事。
柴仔話，咁勿好囉，証明我唔係去見工。
諗下註冊既野，最好係政府註冊處既，但係咁既時勢，要大日子之前三個月先登記得既服務，會令我有排都訓唔著囉。
另一個選擇就係好似伊甸園咁既註冊場地，可以叫 d 唔請去飲既朋友去見下嘛。
但睇下同律師錢係咪差好遠啦，差好遠就酒樓註埋冊囉。
不過係最怕個場面會好難控制。
搵下資料先。
諗下間屋。
我地兩個都唔識設計，應該都唔會搵設計公司架喇。
唔識點樣又話空間感大 d，點又會冇咁壓迫，點又多 d 收納空間。
柴仔話所以買間大 dd 既屋，搞到細左都住得人。
呢個都係解決問題既方法......
去時代睇下電器。
電視播緊財經既野，有走馬燈報價，發現有好多數碼機都 show 得好差。
係有部 JVC 咩 "32FX77" 好似 ok，我話要記低 model 囉。
不過時都係有排睇有排揀。
過返海去旺角。
坐向麥花臣公園，休息下，睇下路人，傾下計。
柴仔話佢可以坐向公園一日。
如果得我一個人，如果我無目的，其實我唔係好鍾意向公眾地方流。
但有柴仔向度，我可以無目的漫遊，可以靜靜坐向度吹風。
其實我係咪有咩社交障礙呢？
無聊問下柴仔，第時一齊返屋企，會係邊個開門。
衰仔，話遙控架嘛...
「老婆開門」「老婆開燈」「老婆開風扇」「老婆開窗」
i ya...老婆定阿四呀~
Labels: 一片瓦, 劃火柴, 婚姻註冊, 婚宴, 婚紗禮服, 星期三緊
