飛龍在天
今朝古古惑惑咁同柴仔講，出面好熱好晒 (咁係事實既)，有少少想柴仔話「咁唔跑喇」。
但佢話「咁唔跑牙」，我又話「跑囉」。
我都變得幾快...
跑落又冇想像中咁辛苦，有少少風，唔焗實 d 汗。
但我都就住，唔跑到入尾囉。
柴仔照跑，所以散左。
食完 lunch 去街街。
柴仔神神秘秘咁唔話我知去邊，淨係話去我之前話想去既地方。
我話如果去到都唔係我想去既地方咁點。
衰仔話姐係我之前講大話...車...唔俾係你冇心肝記錯架。
行過加連威老道，間 Hair Advance 唔見左喇！
真係執左！？
我仲嬲緊整左負離子好似冇整咁喎！
遊遊下去左科學館，原來係去睇恐龍呀！
柴仔係好有心肝，因為之前太古廣場展出果陣，我都話想去睇架，不過結果冇去之嘛。
之前都冇留意到科學館有呢個「
飛龍在天 - 中國恐龍與古生物展」，所以估極都估唔到佢帶我去邊。
熱辣辣排隊買飛，有人 sell d 博物館入場證，但我地冇買，邊有咁神心去咁多博物館丫。
我以前中過海洋公園全年入場證招，都抵唔返既，所以今次唔笨。
初初幾件展品冇影到相，之後影左 dd。
好疑惑 d 化石點形成，點發掘出黎。
睇落去似水墨畫咁之嘛，有 d 唔留心睇都唔知有野。
俾我地見到都唔知係寶。
水墨畫 I
水墨畫 II
恐龍骨 I
恐龍骨 II
恐龍骨 III
恐龍骨 IV
恐龍頭 I
恐龍頭 II
恐龍蛋
龜
睇完飛龍在天，繼續睇埋 d 常設展覽。
冇左個吸音室，以前次次去親我都會大叫發洩一下。
有度展左 d 畫，放個鏡面圓柱體向畫上，睇反映會睇到隱藏在畫中的畫，好勁。
我冇影到相，呢幾條 link 有得睇。
畫1 畫2 畫3 畫4 畫5玩埋個體能挑戰就走咯。
行行下，我突然問柴柴，如果有一個高過佢既女仔，同一個年紀大過佢既女仔，佢會揀邊個做女朋友？
佢唔答囉，話咁多選擇做乜要揀 d 咁既野。
即係夾硬問一個屎味既蛋糕，同一個蛋糕味既屎，會揀邊樣？
講講下佢又答會揀屎味既蛋糕，話 lin 住個鼻就唔知乜味喎。
咁我揀蛋糕味既屎咯，咪埋眼食勿得囉。
至於我問既問題，佢都係冇答案。
我問既問題九唔答八，柴仔既提議仲搞笑。
佢話有錢又無聊既話，叫我搵私家偵探查佢喎。
佢自己都話啦，返工，放工，返屋企，有乜好查喎。
查完發個私家偵探爛渣咩，哇哈哈。
Interesting Boss
今晚留左向公司 OT，駝駝都留左向度。
做做下野，有隻不明飛行物體向我地個島附近徘徊。
我同駝駝你眼望我眼。
隻野停左向距離佢大概 4 米既 meeting room 個玻璃窗之後，佢向櫃桶拿左條橡皮圈出黎，瞄準...
冇錯，呢個就係我老闆。
餐廳的伺服器
今日第二次跑畢全程，哼，一定陸續有黎呀！
出去食飯冇帶遮，哎呀，冇帶遮先黎落雨。
短短既路程要搭巴士返屋企。
我第一次搭呢架車咋，連柴仔都冇乜點搭過。
等車加埋搭車既時間，行個來回都得咯。
唔係落雨，呢架車都冇咁受歡迎。
夜晚又掉低柴仔，我自己去同舊同事食飯。
去尖沙咀間 Outback 食。
個 waiter 走埋黎話佢係我地既 server。
我大鄉里，聽得好唔慣...server...
叫野食果陣搵 server，但係佢唔見左人，我地勿笑 connect 唔到 server囉。
Lion 宣佈佢結婚喇！
班衰鬼話係咪餵左懵仔藥俾佢男友。
又當住阿嬌面叫亞東小心 d，唔好亂食阿嬌煮既野。
我見亞東避開哂阿嬌 d 眼神，個樣好好笑架！
睇黎我開始步入炸彈期，引用亞賢既畫，如圖示。
不過，開心既。
小豆情
今日好熱，好哂。
跑步既時候，真係要講句「我鍾意同陽光玩遊戲」。
柴仔話，我勿就係「楊光」囉！
哎呀...
今次好似豪華跑步團咁，好好服侍，有得擦汗，又有水飲。
仲有「好好聽」既海浪聲同海鷗叫聲。
..汗... ^_^"...
下午一路行街，一路講亞豆既問題。
佢既故事發展落去，究竟會點呢？
有 d 位我都會同佢諗埋一樣，好似"女主角"啦，同 d 先後次序咁。
"女主角"呢樣野，我都好大心癮架，不過一定唔會好似佢咁，Q 埋雙手等上台。況且...hehe...我諗我要戒左呢條癮，咁就實唔使煩。
先後次序嘛，除非你俾我知你一定會做，如果唔係做後面既事先，我會以為你就咁就算，實唔開心啦！
另外亞豆仲提出左一個人生交叉點問題：一個同你講開心事既另一半，同一個同你講唔開心事既另一半，你會揀邊個？
em...我諗我會揀同我講唔開心事果個。
我覺得呢個係朋友同另一半其中一個分別。
朋友同你嘻嘻哈哈，好易。
要佢肯同你訴心聲，尤其係男人，難 d 囉。
朋友淨係同我嘻嘻哈哈，我冇乜所謂，但另一半如果有乜唔如意，我希望我知道囉。
可能我解決唔到佢既煩惱，但起碼我知道佢有煩惱，同為乜而煩惱。
起碼我可以配合一下，盡量唔好增加佢既負擔。
(扭計另計)
"兩個人一齊最緊要開心"果個"開心"，唔係咁表面，咁簡單囉。
唔識點講呀，總之就係咁揀啦！
我地既情況嘛...em...你唔同佢講都岩既...hehe...
仲有，你放心啦，如果有人埋我身，我會派飛鏟豬鏟走佢架喇！
報告
尋晚夜放工，試下約都係向柴灣返工同經常都夜放工既 K 哥食宵夜。
因大家都係 SSP 之友，所以各自離開柴灣再搵地方聚腳。
講下佢工作上同公務員打交道既事，講下佢上 Master d 同學仔，講屋企，講朋友，講情人...
今日同柴仔講尋晚同人食宵夜，哎呀，要交報告 tim...
唔知上面果幾行收唔收貨呢？
今晚柴仔同佢 d 中學同學聚舊，em...我又要收報告，嘻嘻。
舉世無雙
又收拾下自己 d 野，搵到相中既筆袋。
呢個筆袋絕對係非賣品，兼且包保舉世無雙。
我唔係 Hello Kitty 既粉絲，有呢個筆袋，係一個巧合。
話說小學尾中一頭咁上下時間，同兩個小學同學行太古城。
唔知抽起邊條根，走去買材料整筆袋。
材料唔係完全一式三份，所以同其餘兩個筆袋只可以話係同一系列，但絕不相同。
我諗呢一系列既筆袋，而家只係剩返呢一個。
朋友
今日心情好低落，但係好似搵唔到人傾下計。
以前有人話過我有好多朋友，其實傾得上幾句既，又有幾多個丫。
難得同個同事傾得下，又因為一 d 小事再冇計傾。
真係冇"比比"冇得咁盡？
諗下諗下，心情低落到極點，真係好要搵朋友。
即 call 亞飯佢地今晚食飯。
估唔到咁突然都約得到四個。
佢地話我約食飯果陣怪怪咁喎，咁好觸角既。
向銅鑼灣紅螞蟻食。
出到黎，心情好返好多。
食食下，關智斌同一個女仔入黎食野。
Toffy 識個女仔，係電台 DJ 喎。
明星都係人姐，望多兩眼勿繼續各有各食囉。
跟住我地留意到窗外有 d 古怪，原來有架車向出面駛前駛後咁影相。
我地坐窗口位架嘛，勿笑囉，話班狗仔隊會唔會鬧緊我地八婆，阻住佢個鏡頭。
又向度想像佢地會作咩故仔，又話要買雜誌睇下有冇上鏡。
哈哈，拉車邊上雜誌，犀利呀！
焗菌
亞媽呢排咳得好利害。
今日我都有兩聲咳...係中招就死喇。
提議今晚唔好開冷氣，等唔使焗住 d 菌。
回應係「開冷氣穩定氣溫」「唔開訓唔著」「你凍就著多件衫啦」。
九唔答八。
唉。
