我嫁喇!!
等到今日，我嫁喇。
一早起身就見識到暴龍既威力：-
我都係岩岩刷完牙敷 mask，暴龍表妹同亞姨都未起身。
燈塔表妹呢個時候已經到左酒店。
酒店保安打電話黎，話有人到訪，要住客去大堂接人。
我敷住個 mask，唯有叫暴龍表妹起身。
嘩，不得了，佢同 d 酒店職員開火！
bilibalajilijala~~~
終於燈塔表妹入到黎，之後 d guest 都唔使住客接。
希望酒店 d 人冇咀咒我，嘻。
左滕右滕，滕到 MUA 到左，我仲敷住個 mask，唔記得除。:-P
全個房得廁所有大鏡，所以匿向廁所化妝。
都唔係好知出面發生乜事。
姐妹陸續到，陸續化妝 set 頭。
好快就人齊，好快就大軍殺到。
我匿向房，偷聽佢地玩遊戲。
其實遊戲係我諗，d 相都係我預備架。
我真係錫住新郎哥囉~
讚下我 d 姐妹先，我都冇叫佢地預備野，但黎到又會有紅絲帶、宣言紙、宣言筆...
玩完我預備既遊戲，同我講幾句宣言 (有人寫錯新娘子個名囉...)，都準備"交收"架喇，點解無啦啦加插要做掌上壓？
哎呀，新郎哥尋日托完水，肩膞都未復完。
點解呀？點解呀？
原來...新郎哥漏左開門利是向車...暈...
掌上壓係拖時間，等兄弟跑去車拿囉。
攝影師話做咁多年都未見過新郎哥唔記得帶開門利是囉。
成功接到新娘，開始斟茶活動。
終於戴上媽媽送俾我既豬豬頸鍊。
我一路都嚷住媽媽要買豬豬頸鍊俾我，實在好鍾意~
我仲好想可以留俾我個女，一代傳一代...(可能睇電視睇得太多...)
出門喇。
搭住馮小朋友既寶馬，向男家出發！
向馬路上，攝影師向28座係咁指示我地咀咀，係咁咀，係咁咀。
哈哈，劇情需要喎...
新郎哥入門叫「爸爸媽媽，我返黎喇，我帶左老婆仔返黎喇。」
小王子同小公主就一路唔停聲。
辛苦佢地喇，要綑住向騎樓度。
斟完茶，影下相。
收到電話話爸爸唔見左銀包。
噢！
註冊落左爸爸名，改唔到人。
passport...passport...頂得到...ok...過到...
汗"
之後一堆人去 lunch，我留返向男家換衫化妝。
柴仔都留低，飯到既時候餵我食飯~
呀~em~
:-P
發現竟然冇帶 MUA d 首飾。
我最鍾意既冠呀...
MUA 問我係咪真係好想要個冠，我真係好想囉。
佢竟然肯跟埋我去註冊，幫我上冠。
實在太多謝佢喇！
因為跟埋去註冊就算係全日 plan 架喇。
(佢最終係冇收我額外錢架！)
出發去註冊。
路上好辛苦呀！
著住 girdle，好窄好窄既婚紗，坐向度感覺透唔到氣咁。
仲要上去世紀見証個路口好難搵，試左三四次先上到去。
落車先舒一口氣。
上返個冠，好快就行禮喇。
都冇時間夾多次點行，好在上次有綵排。
爸爸帶我行入禮堂，我行得好慢好僈，好好享受呢一刻。
冇加額外錢，都咁岩係鄭家富做我地証婚律師。
好好彩，好抵。
鄭家富講一輪野，到我地宣誓喇。
柴仔先，綵排果陣明明話讀到 d "你" 要望下對方，佢都冇望到。
到我讀。
「我請在場各人見證：我 xxx 願以你 xxx 為我合法丈夫，並許諾從今以後，無論環境順逆，疾病健康，我將永遠愛慕尊重您，終身不渝。」
上次綵排冇讀到，今次黎真既，我又眼淺喇。
:-*
安排28座接 d 親友去酒樓。
我同老公 (<-YEAH!!)同兄弟姐妹向附近影相。
我仲學左o靚模十式！
有美女廚房又有型男廚房。
失左一失預算，尖沙咀去旺角塞車，28座返唔到黎，兄弟姐妹要搭地鐵...
亞江就幫我收姐妹衫爛數。
我同老公坐主花車都塞左好耐至到。
我向車上又係屈住好鬼辛苦。
車程中瞌左陣，醒後佢地話我知，好多人睇花車新娘訓覺囉~
著返件好舒服既褂。
亞媽今朝冇著褂，到酒樓先換。
發覺褂舖將媽媽同奶奶件褂掉轉左入盒，著起上黎一個鬆一個緊至知。
冇乜親戚朋友咁早到，好少斟茶又好少影相。
好快又換返婚紗喇。
MUA 話著白色衫唔好斟茶，所以一切斟茶活動暫停，開席後再斟。
婚紗一路著到開席進場，多 d 時間同人見下，影下相囉。
成日問我睇下有邊 group 到左可以叫佢地上黎影相，但其實我都睇唔到人，個心又數唔到齊唔齊人，哈，遊魂。
心入面知有 d 人未影相既，但都要開席囉。
換過個髮型，經人地個廳出門口。
好搞笑囉，人地壽宴有對新人經過。
聽 d 人睇成長片段，好似冇乜反應。
唔得意咩？
我覺得好得意喎，我睇得好開心架。
出場喇！出場喇！
見到好多朋友，都有好多見唔到，因為個 spotlight 實在太 chang 眼喇！
又要拿住花球，又要 Q 住老公，又要顧條裙，唔係好似我想像咁可以同在場既朋友揮揮手囉。
切假既結婚蛋糕、合巹交杯。
就到我最緊張既環節喇。
好冇用囉，講左兩句就開始喊喇！
講到一舊舊，仲漏左好緊要既野...唔記得多謝我老公呀！！
我記得見到 Toffy 指住柴仔架，而家諗返我諗佢係提我多謝柴仔，但我當時諗佢叫我交咪俾老公囉...
補返先：
多謝爸爸媽媽照顧左我咁多年，而家有人接手喇，佢都會好似你地咁鍚我，對我好好。
多謝老爺奶奶，你地教得個仔好好，賜左我一個好老公。
多謝 Dr Lau，唔係你咁熱心 Sem break 都搞活動俾我地，我都唔會識到柴仔。
多謝姐妹們，今日辛苦佢你喇。
多謝兄弟們，識左你地十年，對我最好都係今日。
多謝在座既賓客，全部我同我老公同埋我地爸爸媽媽最親密既朋友，用呢一晚既時間分享我地既喜悅，為我地送上祝福。
最多謝既，係向我身邊既老公...真係好感激、好感激。
完全因你，因你完全。
:-*
到柴仔講，講得幾好丫，不過佢唔知原來佢冇表明多謝佢爸爸媽媽囉。
呵呵，嬲死呀~
過埋呢關，我又換衫。
我好鍾意呢條漸變色裙。
配一個皇冠仔，好似個公主咁~
暴龍表妹笑我有公主病囉！
巡遊敬酒。
飲杯~~ (兄弟好落力呀~)
成日俾人話唔岩位敬，但個人個腦都真係 function 唔到。
敬到好後先收到係講緊乜...
:-P
敬完酒仲可以檯檯影相，增加靚靚晚裝暴光機會~
仲可以影返席前未到既朋友！
不過好可惜，真係冇時間同到佢地傾下計。
送客喇！
個個都話我隻手凍，其實冇乜感覺。
新娘真係會變身 superwoman 架！
散 lu，返屋企 lu。
爸爸媽媽，我跟佬走喇~ :-P
Sunny 真係唔話得，仲車埋我地返屋企 (佢好似要趕返工架...)
Andy 仲幫我地搬埋野入屋。
今日真係多謝哂 d 兄弟姐妹~
大 show 做完咯，由明星變返一個普通女人。
沖完涼洗完頭，我問老公有冇覺得貨不對辦。
佢話...今日同佢一齊果個唔知係邊個...
哈哈！
Labels: 出門酒店, 婚姻註冊, 婚宴, 婚宴紅酒, 婚宴請帖, 婚禮傳統, 婚禮攝影, 婚紗禮服, 新娘化妝, 星期三緊, 結婚戒指, 花球
悠長假期
今日展開我既悠長假期喇！
第一個節目就係未來女婿仔同爸媽飲早茶。
爸爸成日話我唔請佢飲茶(其實請過幾次食其他野啦！)，今日點都唔會唔計喇掛！
跟住走去辦銀行業務。
一早約左話拿十萬yen，又唔講有 limit，結果拿得七萬五。
入埋紅酒條尾數，換埋 d 散紙，銀行業務辦理完畢。
俾柴仔睇報紙見到今日 Giordano 開倉。
為左添置 d 衫去旅行，我地都去左行下。
第一日開倉，又係平日，d 貨仲好整齊，d sales 仲好好禮貌兼會介紹產品。
係咁二行左個圈，買左百五蚊野，有十對襪、兩件衫同一條頸巾，抵！
趕去下一站 -- 去拿主花車裝飾。
唔重，但大大件囉。
靠柴仔拿返屋企，我就去做 facial。
今次有兩個人 serve 我。
但我覺得好似俾人當公仔咁武，唔係咁自在。
換左人，始終感覺唔係咁好。
仲 sell 我話 join 新 plan 有 discount...我堅持唔 join 囉。
搞左幾個鐘，柴仔打俾我話我做乜好似人間蒸發左咁...hehe...
趕返屋企，reply 返註冊場地 d 細節。
最重要既係......rundown d 附屬品出爐喇！
希望兄弟姐妹仲睇得切啦~
唉...燈塔表妹話我知 d 姐妹裙仲係拿唔到...
佢幫我搞全部唔要，全單退錢。
好在個個都有現成姐妹裙頂住。
唔係好唔開心既，煩囉。
Labels: 婚姻註冊, 婚宴紅酒, 婚紗禮服, 星期三緊, 美容
oh~ 芭瑪
今朝收到柴仔傳來既消息，話有個風黎緊！
都係頭一次唔想打風。
未雨就要綢繆下。
續家續戶打去問如果打風會點安排...
酒樓、攝影、化妝、車、衫、註冊、紅酒、花球...
結果係 - the show must go on，係冇得註冊囉。
touchwood touchwood~~
Labels: 婚姻註冊, 婚宴, 婚宴紅酒, 婚禮攝影, 婚紗禮服, 新娘化妝, 星期三緊, 花球
綵排
仲有一個月咋！
有意冇意揀左今日去做註冊綵排。
聽下點企、點行、幾時做咩。
有俾埋誓詞試讀，教下咩位稍為停一停，咩位望下對方。
個姐姐話，可以唔讀，留返正式果日先讀。
咁我梗係唔讀啦，不過柴仔有讀，只係換左 d 假名囉。
好快好快就綵排完喇。
食飯前去左揀禮物俾 Eric 個仔。
細路仔禮物真係好難揀架。
又怕好快唔岩玩，又怕仲未識玩。
兩個大唔透向玩具反斗城 BB 玩具部左兜右兜。
結果買左相中既波波同一個有聲既鎚仔。
d 波波似係玩佢老豆多 d 囉...個仔擲，老豆拾...哇哈哈！
Labels: 劃火柴, 婚姻註冊, 星期三緊
擬結婚通知書
今日請左假，去律師樓搞擬結婚通知書。
地址係永隆銀行大廈十x樓，但兩條盲丙就走錯左入永隆銀行搞搞震。
上到去俾個 reception 姐姐嚇一嚇，差 d 要打俾爸爸問我姓乜。
柴仔要簽好多個名架，我簽得兩個。
話要簽返到時簽結婚證書個名，好緊張，慢慢寫~
走之前問清楚會幾時貼向婚姻註冊處，要去影相嘛！
叮叮過灣仔。
諗住貫徹我地睇展覽既行程，吃麥當當。
已經坐低左架喇，但柴柴諗起夜晚都會食，所以走囉。
求其食間茶餐廳。
入電腦展。
初初好少人，午飯時間過後就好多喇！
個場仲好大好大，以我地掂行掂過既方式咁行，都要行成四個鐘。
可惜冇心水既野賣，有 d 又唔知係咪真係抵，只係係咪都要買 d 野，所以買左張 16G SD card。
入落相機，見到可以影二千幾張相，影兩個幾鐘頭高清片，嘩，好開心呀~
離開電腦展，行返地鐵站果邊。
上電腦城睇下要唔要 dump 心。
得一間舖頭有得賣，唔使 dump 囉，但要睇返黃金旺電先至真係比較到。
搭船過尖沙咀。
影左 d 相，我覺得好靚呀！
諗住去惠康買 pizza 食，但原來惠康執左。
今日既"展覽一條龍"，唔係好得。
去玩具反斗城想買之前睇中左既禮物俾 johnstonbaby，但得返一盒殘舊既。
任務又失敗。
我仲要好趕好趕咁食麥當當(結果勿又係食麥當當)，然後卜去"卒"背。
柴柴就要向麥當當發毛。
夜晚返到屋企要趕製 label。
因為柴柴星期日就會發動首輪轟炸喇！
Labels: 劃火柴, 婚姻註冊, 星期三緊
豆豆大婚日
今日係柴仔中學好友既大日子，我都有份出席。
佢地註冊既地方，同我將會同柴仔註冊既地方一樣，係揀既堂唔同。
哈，我可以實地觀察一番。
剛到步見到有個新娘子預備拋花球。
花球一掟出，姐妹都爭相走避。
仲要個花球跌落地，搞到支離破碎，唔，大吉利是。
除非我有姐妹要求啦，否則我都唔會掟。
成個註冊儀式其實好快，新郎新娘都冇另外發表自己既感受。
加上我腦入面諗住柴仔個傻樣，所以冇話好感動。
儀式完左之後，安排左向海豚公園影相。
我地唔係諗住去影相既，不過柴仔話唔知邊度海豚公園，勿帶佢行去睇下囉。
(我好少可以咁叻架嘛...嘻嘻...)
類似話果度好多人拍拖啦，柴仔竟然問，係咪即係我應承左 Ant 唔同其他人去果度。
@_@"
真係估唔到呢件事仲向佢心入面。
不過果個地方並唔係海豚公園。
之後我想帶柴仔去果個地方，電梯都上左一層架喇，但佢話唔使，所以結果都冇去到。
搵次我實捉你去！
夜晚果餐，佢有個同學帶左兩個仔出現，仲有個女向屋企。
嘩，已經有三個！
兩個小朋友好搞笑。
初初唔停係咁玩，之後精力急跌，支力到睡哂。
細路真係好得意。
不過個老豆要"的"兩舊泥返屋企，仲得意~
Labels: 劃火柴, 婚姻註冊, 星期三緊
伊甸園
睇蘋果，有以下一宗報導：
==============================
婚 禮 場 地 伊 甸 園 被 追 租
【 本 報 訊 】 婚 禮 熱 門 舉 辦 場 地 「 伊 甸 園 」 ， 其 位 於 紅 磡 國 際 都 會 商 場 的 舖 址 ， 昨 日 遭 業 主 入 稟 高 等 法 院 ， 指 伊 甸 園 自 今 年 8 月 起 拖 欠 租 金 及 雜 費 等 近 60 萬 元 ， 要 求 法 庭 頒 令 將 舖 位 交 吉 及 清 還 欠 款 。 伊 甸 園 回 應 稱 ， 事 件 只 屬 租 務 糾 紛 ， 暫 未 通 知 已 落 定 租 用 場 地 的 準 新 人 ， 萬 一 被 迫 遷 ， 也 能 安 排 準 新 人 到 其 他 場 地 。
原 告 Vision Million Limited ， 被 告 為 富 大 企 業 有 限 公 司 。 入 稟 狀 指 原 告 於 06 年 8 月 將 紅 磡 國 際 都 會 商 場 7 樓 三 個 舖 位 租 予 被 告 經 營 伊 甸 園 ， 月 租 87,500 元 。 今 年 9 月 加 租 至 94,000 元 。 被 告 自 今 年 8 月 1 日 起 拖 欠 租 金 、 差 餉 及 管 理 費 等 共 59.6 萬 元 。 儘 管 原 告 不 斷 追 討 ， 至 今 仍 未 清 還 ， 令 原 告 蒙 受 損 失 。
伊 甸 園 董 事 蕭 永 豐 回 應 稱 ， 案 件 僅 涉 租 務 糾 紛 ， 他 們 因 原 告 違 反 租 約 已 另 外 興 訟 ， 暫 不 方 便 透 露 詳 情 。 他 強 調 ， 伊 甸 園 財 政 並 無 問 題 ， 惟 他 們 暫 未 通 知 或 會 受 影 響 的 準 新 人 ， 相 信 即 使 最 後 被 迫 遷 ， 也 能 安 排 準 新 人 到 其 他 場 地 舉 行 婚 禮 。
案 件 編 號 ： HCA1984/08
==============================
從來對呢間野冇乜好印象。
好彩我都唔係 book 呢間。
唔係我實訓唔著。
不過燈塔表妹 book 左喎。
想通知下佢，但原來佢已經做左野。
表妹，勁！
Labels: 婚姻註冊, 星期三緊, 點睇
披嫁衣 - alpha
約左 Loffy 同 Noffy 去試婚紗。
我只係約左三間婚紗店，時間如下：
13:00 紫水晶
14:00 溫馨
15:00 Vianei
我見網上面有人去齊港九新界試幾十間，我就冇咁好氣喇。
先上紫水晶。
上個星期去睇過，記底左 d 心水型號，所以好簡單。
個姐姐搬左 d 衫出黎，有 d 同想像中有 d 分別。
因為未係 join，所以只可以試幾件。
換第一件既時候，心情好緊張架。
之前向 ESDlife 都同幾個女仔講過，好擔心著住件婚紗出黎唔知另一半會俾咩反應。
諗起益力多個廣告就搞笑。
http://www.youtube.com/watch?v=SaABX0oxJXk好在柴佬都冇表現得好驚嚇，我都安落 d。
跟住上溫馨。
唔知係咪燈光效果，佢果度 show 出黎既婚紗好以靚 d。
不過果度冇相睇，全靠個 sales 姐姐根據我既口味去搵 d 衫出黎俾我睇。
清得黎又要 d "撈搞"，唔要紗紗，對稱 dd 既...
同埋只係可以試婚紗，佢話因為晚裝款轉得快喎。
試左三件婚紗，都好鍾意呀。
最後上 Vianei。
Loffy 尋日先至陪完 friend 去，所以 sales 姐姐都認得佢。
初初睇相，冇乜幾多件揀得落手。
不過既然都黎到，都試下囉。
試左兩至三件啦，都係唔使穿鋼紗既款。
嘩，件婚紗同件紛紅晚裝都好得，閃得好靚。
可惜我諗住要一件婚紗加兩件晚裝，果度我揀唔到第二件晚裝。
貨比三家之後，肚餓。
明明睇衫之前食左吉野家，又會咁快肚餓既，乜試衫好 side 力咩？
去間餐廳坐低食個下午茶，慢慢諗清楚。
最後決定 join 溫馨。
食完野就返去 confirm。
要左四套衫個 package，三千四百八十蚊，再加小拖尾五百蚊，總共盛惠三千九百八十個大洋。
諗住租一件婚紗、兩件晚裝同一件伴娘衫。
男禮？唔係我唔俾柴仔揀衫呀，係佢話鍾意普普通通一件西裝。
咁佢鍾意囉，我又唔專制既，嘻嘻。
(後記：我笨左啦，返屋企睇返人地 d 討論，話可以講價 free 拖尾架。而家只係俾左個加衫 discount 我。)
今日只係揀婚紗，晚裝會婚前半年先揀。
換衫速度好快，揀衫有 d 壓力，因為 sales 姐姐成日要我 out d 衫。
其實件件都好靚(我要求好低)，所以好難決擇。
又唔影得相(今日試咁多都唔影得，真係 join 都唔影得。)，好難記得著起個效果。
最後揀左件裙身泡下泡下既。
呵呵呵，又搞掂一樣野。
Loffy 要走先喇，Noffy 同埋我地去訂註冊場，順便等佢都拿下資料。
我地決定左揀世紀見証呀。
望多兩望個堂，決定要 Rose Hall。
雖然唔係粉紅色粉絲，但係怕 Century Hall 黃得滯，又唔顯件紗，所以揀 Rose。
場地唔係好大，六七十人左右就會好熱鬧，希望我會安排得好啦。
又倒多三千二百四十個大洋落海喇。
Noffy 夜晚去飲，我地就向旺角散。
真係唔知點解，我又肚餓。
走去廟街食蠔餅、煲仔飯、飲支裝可樂。
食完行下街，經過 Bossini，俾件衫吸左埋去。
係小公主呀！
不嬲慳家柴仔都忍唔住手，用九十九蚊買左一套 (一件衫加一個袋)，仲即刻著左件衫。
柴仔話佢搭火車既時候，有個男人望住佢心口呀~
哈，笑死我。
Labels: 劃火柴, 婚姻註冊, 婚紗禮服, 星期三緊
註冊-睇場
今日我做領隊，帶柴柴去睇註冊場。
唔係好想搵律師到場。
因為我怕有人掛住食野，我地宣緊誓，佢就向度食花生飲汽水，諗起都掃興。
又怕酒樓 king ling kan lan，幾唔莊嚴呀。
另外搵個場，仲可以叫 d 唔請去飲既人黎，幾好咁。
註冊場，最多人知都算係伊甸園既。
但係就好似好多 bad comment，所以既然有其他選擇就唔睇呢間。
第一站去中港城既世紀見証。
http://www.centurywedding.com.hk/
幾易搵，地方幾開揚。
感覺唔錯。
第二站去尖沙咀中心既 2 in 1。
http://www.2in1.com.hk/
柴仔一聽到個名就話「二合一!?洗頭水牙？」
間野向地庫，感覺幾迫。
有人行完禮，混混亂亂咁，都冇入去禮堂睇就掉頭走。
out~
最後一站係諾士佛台既緣美傳說。
http://www.eternalring.com.hk/
比較難搵 d，同埋地點有 d 怪 - 諾士佛台裡的商業大廈的婚姻註冊場。
內裡環境都 ok 既，聽個男仔介紹，覺得佢地都幾有 heart 去經營。
場就睇左喇，其實都有心水既，不過我唔會咁爽快，諗一個星期先啦。
當然...呢個星期我又會有排驚...
仲有時間，走左上紫水晶睇婚紗。
第一次為自己睇婚紗，好心動，件件都覺得好靚。
我都冇乜要求丫，想係一字 low cut，唔想係吊帶，唔想係紗下紗下果 d。
俾柴仔發現左我睇住一頁唔揭...hehe...因為見到件紫色蛋糕好靚嘛。
約下個星期去，真係搵幾件試下上身...呵呵呵~
今晚柴仔要去飲呀，一改佢恤衫西褲既形象，只係借哥哥件野性恤衫同著牛仔褲，反而平時爛撻撻果 d 就執正左。
人人都覺得出奇，每一個人到就問佢一次，哈哈，問到唔想答。
我叫佢去做探子，睇下人地點安排。
口口聲聲叫我咪傻啦，但勿又係有睇到...讚讚~
學到要安排好影相時間囉。
我都想去下飲，偷下師，可惜短期內未有機會。
不過...點解偷師都要咁貴"學費"既...
==========
今日柴仔金句「有太陽既地方都係黑暗既」
(唔記得無啦啦做乜咁講，不過好玄，所以寫低左。)
Labels: 婚姻註冊, 婚紗禮服, 星期三緊
頻撲的假期
今日請左假。
朝早同柴仔去長沙灣填表。
呵呵，佢有文件唔記得帶。
好在唔係我唔記得姐，唔係實被扁。
個銀行界朋友都幾得意，"熬"佢最得意。
估唔到填份表都咁耐，搞到肚仔投訴，打哂鼓咁，冇食早餐嘛。
酒席果度我打左電話去 hold 喇，不過個經理放假，要星期三先去落訂。
話就話 mark 左簿，但都驚驚地，快 d 到星期三就可以了件心事。
話時話，我上次去睇場，有對 2010 年年中既新人已經去搵酒席，真係幾誇張。
我話囉，第時追女仔要咁：「你可唔可以做我女朋友呀，我訂左酒席架喇！」
哈哈。
去律師樓搞完 d 野，飲杯好似話好出名既涼茶，就丁去銅鑼灣。
去搵下傳說中賣 girdle 好好既地方。
可能係平日啦，唔算好多人，兩三個排向門口囉。
視察完就走喇，我下次自己先再去買。
呢個細世界真係細，咁都撞到另一個放緊大假既同事。
柴仔話，咁勿好囉，証明我唔係去見工。
諗下註冊既野，最好係政府註冊處既，但係咁既時勢，要大日子之前三個月先登記得既服務，會令我有排都訓唔著囉。
另一個選擇就係好似伊甸園咁既註冊場地，可以叫 d 唔請去飲既朋友去見下嘛。
但睇下同律師錢係咪差好遠啦，差好遠就酒樓註埋冊囉。
不過係最怕個場面會好難控制。
搵下資料先。
諗下間屋。
我地兩個都唔識設計，應該都唔會搵設計公司架喇。
唔識點樣又話空間感大 d，點又會冇咁壓迫，點又多 d 收納空間。
柴仔話所以買間大 dd 既屋，搞到細左都住得人。
呢個都係解決問題既方法......
去時代睇下電器。
電視播緊財經既野，有走馬燈報價，發現有好多數碼機都 show 得好差。
係有部 JVC 咩 "32FX77" 好似 ok，我話要記低 model 囉。
不過時都係有排睇有排揀。
過返海去旺角。
坐向麥花臣公園，休息下，睇下路人，傾下計。
柴仔話佢可以坐向公園一日。
如果得我一個人，如果我無目的，其實我唔係好鍾意向公眾地方流。
但有柴仔向度，我可以無目的漫遊，可以靜靜坐向度吹風。
其實我係咪有咩社交障礙呢？
無聊問下柴仔，第時一齊返屋企，會係邊個開門。
衰仔，話遙控架嘛...
「老婆開門」「老婆開燈」「老婆開風扇」「老婆開窗」
i ya...老婆定阿四呀~
Labels: 一片瓦, 劃火柴, 婚姻註冊, 婚宴, 婚紗禮服, 星期三緊
