生活點子: May 2009

十月十日新娘

搞結婚既人多數都會蒲 ESDlife。
就係咁，我認識左一班都係十月十日結婚既新娘子。
今日大家約左出黎聚會。
我都諗唔到，我會同未見過既人出黎囉。
六個女人 bilibala 咁，好搞笑~

HYUNDAI

買 DVD 機喇。
平 dd，辛苦柴仔由旺角托返屋企。
初初駁 HDMI，顯示"與輸入訊號不相容"咁上下既字句。
幾擔心呀！
搞左好耐駁返三色線，睇到啦，但冇高清唔開心囉。
柴仔再搞下，調返個輸出，有埋高清喇！

聽福山雅治既歌。
同一屋簷下年代已經鍾意佢喇。
仲記得當年亞利反對我一次過買幾隻 CD。
所以就只係買左呢一隻。
得幾隻歌，幾百蚊，而家就唔捨得買咯~

Labels: 一片瓦, 劃火柴

HR

下午，電話響。
我：「午安，ITxxx。」
來電者：「喂，唔該 xxx。」
我：「係。」
來電者：「我係 HR 架......」

一瞬間，原來個腦可以諗好多野...
係咪中左？
係咪叫我落大堂？
係咪要執野？

好彩只係諗多左。
只係一個普通查詢。
向呢個敏感時期，好心就唔好用一把咁低沈，咁死左人既聲打電話俾人，仲要響 HR 朵啦，會嚇親人架~

Labels: 工場 H

試酒

約左柴仔同柴哥哥試紅酒。
但原來係成個柴家出動
柴媽媽問我做乜唔叫埋我爸爸，我都唔知點答

我都有試呀，有柴柴向度，安全嘛！

Labels: 婚宴紅酒, 星期三緊

想我‧不想我

時時刻刻都要諗住我、想住我、掛住我。
除左食豬扒飯果陣......

Labels: 劃火柴

笨人出手

向火車站行出黎間中學條斜路，見到個踏單車既女仔炒車跌左落坑渠。
見佢冇朋友向附近，所以我出手相助。
記得柴柴話過唔好扶跌低既人，要佢自己借我力起身，咁我照做囉。
問佢有冇電話，打俾佢 d 朋友，佢話冇，我又笨笨咁唔識借我電話俾佢打。
有個亞叔經過，睇佢個款應該成日踏單車既人。
佢走埋黎睇個女仔，拿哂抹紙同膠布出黎幫個女仔處理傷口。
我睇住亞叔整，同扶住個女仔囉，陰公，震架。
差不多搞掂，有個男仔就走埋黎，個女仔話係佢朋友。
咁 ok 啦，散。
我覺得呢件事好得意囉。
幾個唔識既人，突然企埋一齊去處理一件事，瞬既又各行各路。
可能幾十年後會認識呢個女仔，講起踏單車既事，講起炒車，講起當年有個笨蛋唔借電話俾佢打，然後就知道，我地曾經相遇...我就係果個笨蛋...
哈哈哈~

Labels: 點滴生活

香港公園

午飯，同檯有一對母子。
個媽媽將麵包上面"loan"左既部份刮落檯面，搞到檯面"撈咁搞"。
個仔仔同佢講道理，話佢咁做唔岩，個媽媽仲係咁反駁。
睇到成個過程，柴仔話呢個媽媽有呢個仔真係三生有幸。

去亞東同阿嬌既婚宴之前，柴仔同左我去香港公園影相！
我提議果陣，柴仔又話我傻。
結果佢都係有帶到相機出黎，仲帶埋腳架 tim 呀！
可以影多 d 兩個人既相喇！
好開心~
柴仔真係好抵錫！

Labels: 劃火柴, 工場 E

死心不息

尋日拿完個吸塵機，今日成身痛。
好在有私家愛心亞嬋。

柴柴死心不息，又去踼館。
今次同到 d 人講下，但我感覺佢地好唔 nice。
可能嫌柴仔太後生。
冇即時話 ok 既，等柴仔諗下先啦。

同柴仔睇鞋、恤衫、DVD 機。
但真係得個睇字，一樣都買唔到。
睇 d 女人用拔毛機，個 sales 介紹「呢款可以連根拔起」。
柴柴聽到毛管棟，哈哈！
可能佢諗緊佢 d 腳毛~

Labels: 劃火柴

燃燒假期

今日請左假，但都一早起身，因為接左好多任務。

媽媽問我做乜放假都咁早起身，我話去做 facial。
「做 facial 要請假！？」
哈哈，假期就黎過期，是但囉。
其實仲要去買米缸、洗米兜兜同拿吸塵機既。
要讚下自己啦，雖然老鼠拉龜咁，但都將個吸塵機安全運返屋企！

最艱鉅既任務，就係要準備晚餐！
因為想柴仔感受下放工返屋企食飯，所以特登揀今日試。
一向只係拿手煮公仔麵既我，成功煮到一餐飯係一個大考驗。
不過，對柴柴都係一個大考驗...勇氣大考驗...哇哈哈~

新丁蒲街市。
數住要買乜野，買漏左就麻煩啦。
一路口 up up...冬瓜、咸蛋、瘦肉、蕃茄、薑、雞翼...
「薑可唔可以買細舊 d 呀？」
「煲湯瘦肉最少買幾多呀？」
「雞翼係咪就咁煎就食得架喇？」
簡簡單單既送咋，不過有蔬菜、有肉、有湯、有生果，算係咁啦。

碗碟唔係成日用，所以煮飯前什麼都要洗洗洗。
新飯煲又要睇下說明書點用。
預備既過程中有同柴柴通過電話，不過好快就收線。
因為我話再講今晚就冇飯食，嘻嘻。

好多意外發生呀！

最核突係洗米果陣。
點解我倒小小洗米水，個盤會咁多水既！？
仲越來越多 tim！
仲有菜碎！
天呀！倒灌呀！

最激氣係煲湯果陣。
放哂材料落煲，但個電磁爐認唔到個煲，唔著。
明明話電磁爐用得架喎......
好在有另一個煲頂上。

最驚係煮餸果陣。
已經開到好細，但都霹靂 park lark 咁，好驚囉。
最後用最細既一度煮，俾柴仔話我炆餸。

嘩，煮左幾個鐘呀！
d 野食賣相都 ok，柴仔都食得落。
食完又洗洗洗，搞到十一點！
我知柴仔心急要走架，冇車嘛。
但佢冇催我囉，唔忍心掛，嘻。

**********

我初初只係諗住煮午餐肉炒蛋、菜同罐頭湯，但柴柴話想轉蕃茄炒蛋。
咁我既菜單就變左蕃茄炒蛋，煎雞翼同冬瓜湯。
我唔識整蕃茄炒蛋架嘛，上網睇點整囉。
搵到咁教：

材料: (二人份)
蕃茄兩大個
雞蛋三隻
青蔥兩條
生抽, 糖少量

做法:
1. 蕃茄切成小塊, 蛋打至起泡 (懶的話可以電動打蛋器 ^3^) 後加一茶匙生抽及兩湯匙水, 蔥切段.
2. 鑊中下二湯匙油, 煮熱後下蛋汁, 翻炒至大半熟, 盛起備用.
3. 同一鑊中下蕃茄、蔥段及一茶匙糖, 翻炒至蕃茄出汁.
4. 加入炒蛋, 兜勻即成.

我見兩個蕃茄好似好少，用左三個，但原來係好多架。
唔食蔥，所以冇落。
未有生抽，用鹽代替。
一路睇住張貓紙黎煮。
新手算係咁啦~

Labels: 劃火柴, 煮飯仔

披嫁衣 - beta

約左今日試衫，都幾緊張架。
有人教過要化少少妝去試先好睇，我都化下囉。
冇化開妝，冇工具冇技巧，所以之前走去買粉底胭脂惡補。
冇話俾柴柴知我有咁既安排，想俾個驚喜佢。
唔知有冇嚇親佢呢？

搞掂個妝出門口，都幾唔慣，好驚好核突，自己又唔知但係人地陰陰笑。
仲要身負重要任務 - 去黃金買保護貼！
向個麻甩地方，真係想快 d 搞掂走人。
但之前聽柴仔講好既保護貼要百幾蚊，我見果 d 五十蚊都唔使，擔心唔岩使，所以向個麻甩場兜兜轉轉。
問完柴柴，五十蚊都殺。
走！

返到去，柴仔見到我，冇表示驚嚇都冇話靚...
如果好睇，佢既反應應該唔會係咁...
嘻嘻，算囉。

玩新玩具~
拍左一張我覺得好溫馨既相

我影左 d 屋企，柴柴又用佢好定既手拍片。
駁去電視播返出黎，好清好靚，播片個效果仲好正好正！
每張相既過場有效果，又會由一邊 pan 去另一邊，好似睇緊樓盤介紹咁~
好新鮮，睇得好開心！

出尖沙咀，又去踢館。
不過冇人囉，真係懶惰。
橫掂去到海旁，影下相囉。
有個同胞叫我地幫佢影相，我地又幫佢影。
又係好靚架！
唔通新玩具真係咁勁！？

要準備戰鬥喇！
柴柴、奶奶、媽媽、亞姨、暴龍同燈塔，嘩，多人到丫。
實有排試，所以之前已經通知左佢地食左野先好黎。
我試返上次 confirm 果一件婚紗。
一試出黎就被踩到地底泥咁...俾下面啦，話哂都係我上次既選擇丫。
係咁試，除左好肯定唔鍾意層層紗，我已經冇乜方向。
唯有先轉戰晚裝。
係我自己埋架揀一堆黎試既。
聽人講晚裝好難落手，都唔係丫，我好快揀到喎。
揀左兩件，見另外一件個款幾好，我仲問有冇婚紗型。
真係有呀，不過係大拖，要再加三百蚊。
試左上身，都幾鍾意。
confirm 啦~不過要俾多三百蚊，好肉赤呀~
奶奶同媽媽都揀唔到衫，暴龍就 confirm 左伴娘裙。
總共搞左三個鐘！！
辛苦哂大家~

Labels: 婚紗禮服, 星期三緊

可遠觀

朝早去拿左相機同電飯煲。
仲有好多私人醒，所以都幾多野拿。

搭馬鐵返去上電樓梯果陣，顧住袋野，一時唔為意，竟然扶左落一堆黏液度！
核突程度爆哂燈！
想搵 d 酒精洗手但係搵唔到。
等到返屋企至勁洗手。
感覺好難受......

我同柴柴對住個新相機，好開心呀！
但係見個螢幕冇保護，就唔想搞佢住。
馬上落街食飯，搜購保護貼！
可惜...只係買到碗、碟、圍裙...就係買唔到保護貼。
忍下手，望住先囉。
聽日先！

Labels: 劃火柴

生活點子

Sunday, May 31, 2009

十月十日新娘

Thursday, May 28, 2009

HYUNDAI

Monday, May 25, 2009

HR

Thursday, May 21, 2009

試酒

Monday, May 18, 2009

想我‧不想我

Sunday, May 17, 2009

笨人出手

Saturday, May 16, 2009

香港公園

Saturday, May 09, 2009

死心不息

Friday, May 08, 2009

燃燒假期

Saturday, May 02, 2009

披嫁衣 - beta

Friday, May 01, 2009

可遠觀

About Me

Countdown

Links

Labels

Previous Posts

Archives

This Page's Comments

Visitor Counter