生活點子: October 2009

Saturday, October 31, 2009

大廚出馬

今日柴仔下廚！
蠔油薯仔炆雞，炒菜心...罐頭湯...
頭頭是道，好好味呀~~

Thursday, October 29, 2009

白菜湯 - 咸蛋蒸肉餅

又下廚喇！
(一個星期先煮果一次...)

又係打俾媽媽熱線學煮餸，嘻嘻。

亞媽話...
白菜湯好飲 d 呢，燒熱隻鑊，唔使水唔使油，加菜炒到軟。
水滾落肉落薑，加埋 d 菜滾幾滾。
落小小糖，小小鹽就得啦。
咸蛋蒸肉餅呢，買梅頭瘦肉，切片。
加糖(0.1ts)，加胡椒粉，加豆粉(1ts)，dur。
加小小水(1ts)，小小油(0.5ts)，小小豉油(0.5ts)，攪。
一個方向攪，攪到膠就上碟，打旦。

我個咸蛋蒸肉餅心型架，不過柴仔冇留意囉...

Labels: 煮飯仔

Thursday, October 22, 2009

蕃茄薯仔紅蘿蔔湯 - 香蜜雞柳 - 灼生菜

柴仔返工喇。
今日下廚煮定飯等老公放工返黎食！

兩餸一湯，白飯一人一碗。
蕃茄薯仔紅蘿蔔湯 + 香蜜雞柳 + 灼生菜~
好味~

蕃茄薯仔紅蘿蔔湯同灼生菜係打媽媽熱線學既。
香蜜雞柳係向煤氣度搵返黎架。
不過冇跟足，因為我唔鍾意洋蔥又冇黑胡椒...咁上下啦~

http://www.towngascooking.com/chi/recipe/index.asp?recipe_uid=770&page_type=popup&category_select_uid=101&category_uid=203

材料
雞柳 - 160 克
蜜桃 - 1 個
青、紅椒 - 各1 個
洋蔥 - 1 個
薑 - 2 片
花生油 - 2 茶匙
註：如覺不夠味，可加蜜桃汁。

調味
鹽 - 1/3 茶匙
糖 - 1/3 茶匙
黑胡椒 - 少許
雞柳醃料：
粟粉 - 1/2 茶匙
鹽 - 1/3 茶匙
黑胡椒 - 少許

做法
1. 雞柳洗淨，用廚房紙巾吸乾水分，切條，用醃料醃片刻。
2. 蜜桃洗淨，去皮挖去核，切厚片。
3. 青椒、紅椒、洋蔥洗淨切片。
4. 燒熱油鑊，雞柳炒至半熟，盛起。
5. 再起油鑊，爆香洋蔥、青椒、紅椒。
6. 雞柳回鑊，炒至所有材料熟透，下蜜桃、調味料炒勻。

Labels: 煮飯仔

Sunday, October 18, 2009

長野‧上高地‧北陸立山黑部溫泉大自然 5 天

14/10/2009

5:30 去等機場巴士，天都未光呀！
向機場食早餐，想o拍丸，所以拿左杯水。
唔覺唔覺入閘，即刻俾人截住話 no drinks。
噫，係喎。

閘 1 上機，坐到窗口位呀！
途經台灣桃園國際機場，我地冇落機。
咁樣"轉一轉"，有兩個飛機餐食。
ok 丫，飛機餐唔係好難食姐。

香港時間九點幾起飛，日本時間差不多四點到。
十二年喇，日本，我又黎喇！

今日冇旅遊景點，第一站就係去間方圓廿里都冇野既酒店 - 郡上八幡。
食完晚飯去玩跳舞，成團得一家人同我地兩個玩。
教既同其他跳既都係日本人，都唔知佢地 up 乜。

浸溫泉。
其實都傻下傻下，唔確實 d 程序係點。
結果唔記得除拖鞋，有個日本女人提我囉。
浸住浸住古古怪怪咁，唔可以話係好享受。
返到房，柴仔仲未返黎，嘩，乜佢玩咁耐呀。

15/10/2009

今日去第一個景點係上高地，又叫「眾神的淨土」。
個名好有聖鬥士 feel，或者就係咁，所以柴仔對呢度都有興趣 d。
感覺係行郊區咁，係 d 景真係好靚。
行左兩個鐘左右啦，到左食飯既地方。
今餐要自費 lunch 架。
仲好似冇乜得揀，人人都去河童食堂。
我地叫左一個梓川定食(蕎麥麵)，一個xxx丼 (蛋豬扒飯)，盛惠2850円。
貴到丫...
食完飯趕住 shopping，而且要記得同暴龍表妹扭吉米蛋囉。
買左 d 名信片準備寄返香港。(但結果都冇寄到)

下一站 wasabi 農場。
食佢一人一杯 wasabi 雪糕，味道 ok 喎，300円一杯~
都唔計得咁多...
唔覺得 d wasabi 田有幾靚，反而對路邊小野花有興趣。
白色、粉紅色，朵朵八片花瓣，好清雅。

遊兩個景點就返酒店喇。
今晚酒店係白馬東急，方圓五十里都冇野，所以去酒店前車左我地去便利店入貨。
買左冇酒精既啤酒，呃女用既 grapefruit 酒同埋芝士圈。
好嘆~

16/10/2009

重點節目！今日上立山喇！
搭 x 種交通工具 (唔記得六定七)，由扇澤去立山。
導遊話收到消息山上已經落過雪喇！
之前知道紅葉差不多完，估唔到變左有雪睇。
我地向山腳買左個溫度計，自己睇住幾多度。

每個站除左要睇景影相蓋景點印印，仲要撲吉米野，好似係我鍾意吉米咁...
好彩一見到吉米隻公仔就買，之後幾站都見唔到喇。
仲買左筆同匙扣...
表妹，算係咁啦~

呢個 lunch 都不知食得幾快，多 d 時間用嘛。
上到室堂，我地個溫度計顯示有四度，wow~
裝 d 冰水飲，凍到入心入肺！

見到郵局！
時間無多，好趕好趕咁寫 postcard 俾 Miffy，已經冇時間寫第二封...
下次寫定貼上去會唔會好 d 呢？

(個個站都跑...)

今日得一個行程，一日比一日早返酒店。
住高岡 New Otani，係附近最有野既酒店喇！
不過過左營業時間，始終都係較靜。
搵到間郵局，但都過左辦公時間，有人向度都冇人理我地。
四圍行下，入左間店雞同鴨講咁買 banana 雪糕，真係好好 banana 味架喎！

食完晚飯返房。
搞笑咯，我地睇電視播《異獸戰》囉！
有幾多人會去旅行向酒店房睇戲！？

呢兩日係咁買野食，要買返 d 擺設至得。

17/10/2009

出發前我地自己去睇埋高岡大佛。
亦因為咁買多左隻高岡大佛吉米匙扣。
行兼六園，柴仔冇乜興趣，話好似香港公園咁，但都唔夠時間度度睇下。

去到白川鄉，買返 d 唔係食既野。
擺設呀、匙扣仔呀，我覺得靚架！
花300円入左間屋參觀，係好大，但冇乜野睇。
食飯食耐左，又係行唔哂就趕集合。

跟住去果個美濃市和紙工房，都可以話幾無謂。
都冇得落手玩造紙。(雖然如果有，都係無謂...)
d 紙品係好靚，信紙，禮物紙咁，但唔會買囉。

食飯前向名古屋熱鬧既地方行街。
行 Tokyo Hands，其實好似 sogo + log on 咁。
所以...好快行完！
收獲係一包 157 円既即沖麵豉湯！

晚飯食手桶料理。
睇個師父整魚生，將一條向魚缸游緊水既魚，變做人客檯上面既食物。
好好睇。
唔知係咪我地表現得好欣賞，個師父送左 d 壽司俾我地食~

食完飯返酒店。
導遊話半個鐘個車程，我個心諗都唔係好遠。
但原來係飛半個鐘頭 higuway，去到一間方圓一百里都冇野既名古屋 J Rinku。
好在酒店有間便利店，我地又買 d 小食返房睇電視。

今日柴仔唔知做乜事，流左四次鼻血！
佢十幾廿年都冇流過架...
日本真係乾成咁？

18/10/2009

話咁快就黎到最後一日喇。
今日冇景點，只係放我地向名古屋購物，悶死柴仔啦。

向 d 地下街左穿右穿，逛下 d 大公司，冇收獲。
好多團友都買生果，我地又冇買囉。
有個向廣場既嘉年華物體，我地走去貢貢，反而有收獲喎！
食左盒地道燒黑魚丸，買左 d 小食。
又要趕集合...嘻嘻...

lunch 犀利咯，犀利貴呀！
因為食燒烤，我地自購左和牛，8000円呀！
要慢慢咀嚼，嗒真 d~

開心既時間過得真係快，食完飯就去機場喇。
入閘之後去搵梅酒買。
有 d 雞同鴨講囉，因為要解釋我地向台灣"落地"但又唔係"轉機"。
最後都買到。

返到屋企都成十二點咯。

==========

呢幾日好開心呀！
影相好搞笑囉，兩部相機，柴仔影景既時候，我 set 腳架影人，好趕時間咁。
呢兩個唔合作既團友，成日都要趕路。
好在同團有對年青人都同我地不相伯仲。

之前聽人講呢個團會冇啖好食，唔係丫，咁多餐除左最後一日個早餐，全部都食得好好喎。
我要求低，定佢地要求高呢？
係 d 餐幾得意，餐餐都有蛋，唔同形式既蛋，炒蛋、溫泉蛋、蒸蛋...
食到我地唔敢食。

我一路膽心個喼唔夠位，結果係唔成問題架！
仲有好多位剩 tim。
睇見 d 團友向機收拾佢地既行李，要個人跪上去先關到喼，我覺得好好笑囉~

柴仔 20/10 就返工喇，我仲有排。
唔知收唔收拾到心情呢？

Labels: 蜜月

Tuesday, October 13, 2009

蜜月前

呢幾日要打點去旅行既野。
最重要係要買衫買衭！
應付平時星期六日既衫衭，唔夠應付去五日旅行。
:-P

結果冇買多個喼，因為柴家有個廿六寸。
兩個人兩個廿六寸去日本五日，夠唔夠呢？
聽日出發喇，唔知今晚訓唔訓得著呢？

Labels: 劃火柴, 蜜月

Saturday, October 10, 2009

我嫁喇!!

等到今日，我嫁喇。

一早起身就見識到暴龍既威力：-
我都係岩岩刷完牙敷 mask，暴龍表妹同亞姨都未起身。
燈塔表妹呢個時候已經到左酒店。
酒店保安打電話黎，話有人到訪，要住客去大堂接人。
我敷住個 mask，唯有叫暴龍表妹起身。
嘩，不得了，佢同 d 酒店職員開火！
bilibalajilijala~~~
終於燈塔表妹入到黎，之後 d guest 都唔使住客接。
希望酒店 d 人冇咀咒我，嘻。

左滕右滕，滕到 MUA 到左，我仲敷住個 mask，唔記得除。:-P
全個房得廁所有大鏡，所以匿向廁所化妝。
都唔係好知出面發生乜事。
姐妹陸續到，陸續化妝 set 頭。
好快就人齊，好快就大軍殺到。

我匿向房，偷聽佢地玩遊戲。
其實遊戲係我諗，d 相都係我預備架。
我真係錫住新郎哥囉~
讚下我 d 姐妹先，我都冇叫佢地預備野，但黎到又會有紅絲帶、宣言紙、宣言筆...

玩完我預備既遊戲，同我講幾句宣言 (有人寫錯新娘子個名囉...)，都準備"交收"架喇，點解無啦啦加插要做掌上壓？
哎呀，新郎哥尋日托完水，肩膞都未復完。
點解呀？點解呀？
原來...新郎哥漏左開門利是向車...暈...
掌上壓係拖時間，等兄弟跑去車拿囉。
攝影師話做咁多年都未見過新郎哥唔記得帶開門利是囉。

成功接到新娘，開始斟茶活動。
終於戴上媽媽送俾我既豬豬頸鍊。
我一路都嚷住媽媽要買豬豬頸鍊俾我，實在好鍾意~
我仲好想可以留俾我個女，一代傳一代...(可能睇電視睇得太多...)

出門喇。
搭住馮小朋友既寶馬，向男家出發！
向馬路上，攝影師向28座係咁指示我地咀咀，係咁咀，係咁咀。
哈哈，劇情需要喎...

新郎哥入門叫「爸爸媽媽，我返黎喇，我帶左老婆仔返黎喇。」
小王子同小公主就一路唔停聲。
辛苦佢地喇，要綑住向騎樓度。

斟完茶，影下相。
收到電話話爸爸唔見左銀包。
噢！
註冊落左爸爸名，改唔到人。
passport...passport...頂得到...ok...過到...
汗"

之後一堆人去 lunch，我留返向男家換衫化妝。
柴仔都留低，飯到既時候餵我食飯~
呀~em~
:-P

發現竟然冇帶 MUA d 首飾。
我最鍾意既冠呀...
MUA 問我係咪真係好想要個冠，我真係好想囉。
佢竟然肯跟埋我去註冊，幫我上冠。
實在太多謝佢喇！
因為跟埋去註冊就算係全日 plan 架喇。
(佢最終係冇收我額外錢架！)

出發去註冊。
路上好辛苦呀！
著住 girdle，好窄好窄既婚紗，坐向度感覺透唔到氣咁。
仲要上去世紀見証個路口好難搵，試左三四次先上到去。
落車先舒一口氣。

上返個冠，好快就行禮喇。
都冇時間夾多次點行，好在上次有綵排。
爸爸帶我行入禮堂，我行得好慢好僈，好好享受呢一刻。
冇加額外錢，都咁岩係鄭家富做我地証婚律師。
好好彩，好抵。

鄭家富講一輪野，到我地宣誓喇。
柴仔先，綵排果陣明明話讀到 d "你" 要望下對方，佢都冇望到。
到我讀。
「我請在場各人見證：我 xxx 願以你 xxx 為我合法丈夫，並許諾從今以後，無論環境順逆，疾病健康，我將永遠愛慕尊重您，終身不渝。」
上次綵排冇讀到，今次黎真既，我又眼淺喇。
:-*

安排28座接 d 親友去酒樓。
我同老公 (<-YEAH!!)同兄弟姐妹向附近影相。
我仲學左o靚模十式！
有美女廚房又有型男廚房。

失左一失預算，尖沙咀去旺角塞車，28座返唔到黎，兄弟姐妹要搭地鐵...
亞江就幫我收姐妹衫爛數。
我同老公坐主花車都塞左好耐至到。
我向車上又係屈住好鬼辛苦。
車程中瞌左陣，醒後佢地話我知，好多人睇花車新娘訓覺囉~

著返件好舒服既褂。
亞媽今朝冇著褂，到酒樓先換。
發覺褂舖將媽媽同奶奶件褂掉轉左入盒，著起上黎一個鬆一個緊至知。
冇乜親戚朋友咁早到，好少斟茶又好少影相。
好快又換返婚紗喇。

MUA 話著白色衫唔好斟茶，所以一切斟茶活動暫停，開席後再斟。
婚紗一路著到開席進場，多 d 時間同人見下，影下相囉。
成日問我睇下有邊 group 到左可以叫佢地上黎影相，但其實我都睇唔到人，個心又數唔到齊唔齊人，哈，遊魂。

心入面知有 d 人未影相既，但都要開席囉。
換過個髮型，經人地個廳出門口。
好搞笑囉，人地壽宴有對新人經過。

聽 d 人睇成長片段，好似冇乜反應。
唔得意咩？
我覺得好得意喎，我睇得好開心架。

出場喇！出場喇！
見到好多朋友，都有好多見唔到，因為個 spotlight 實在太 chang 眼喇！
又要拿住花球，又要 Q 住老公，又要顧條裙，唔係好似我想像咁可以同在場既朋友揮揮手囉。

切假既結婚蛋糕、合巹交杯。
就到我最緊張既環節喇。
好冇用囉，講左兩句就開始喊喇！
講到一舊舊，仲漏左好緊要既野...唔記得多謝我老公呀！！
我記得見到 Toffy 指住柴仔架，而家諗返我諗佢係提我多謝柴仔，但我當時諗佢叫我交咪俾老公囉...
補返先：

多謝爸爸媽媽照顧左我咁多年，而家有人接手喇，佢都會好似你地咁鍚我，對我好好。
多謝老爺奶奶，你地教得個仔好好，賜左我一個好老公。
多謝 Dr Lau，唔係你咁熱心 Sem break 都搞活動俾我地，我都唔會識到柴仔。
多謝姐妹們，今日辛苦佢你喇。
多謝兄弟們，識左你地十年，對我最好都係今日。
多謝在座既賓客，全部我同我老公同埋我地爸爸媽媽最親密既朋友，用呢一晚既時間分享我地既喜悅，為我地送上祝福。
最多謝既，係向我身邊既老公...真係好感激、好感激。
完全因你，因你完全。
:-*

到柴仔講，講得幾好丫，不過佢唔知原來佢冇表明多謝佢爸爸媽媽囉。
呵呵，嬲死呀~

過埋呢關，我又換衫。
我好鍾意呢條漸變色裙。
配一個皇冠仔，好似個公主咁~
暴龍表妹笑我有公主病囉！

巡遊敬酒。
飲杯~~ (兄弟好落力呀~)
成日俾人話唔岩位敬，但個人個腦都真係 function 唔到。
敬到好後先收到係講緊乜...
:-P

敬完酒仲可以檯檯影相，增加靚靚晚裝暴光機會~
仲可以影返席前未到既朋友！
不過好可惜，真係冇時間同到佢地傾下計。

送客喇！
個個都話我隻手凍，其實冇乜感覺。
新娘真係會變身 superwoman 架！

散 lu，返屋企 lu。
爸爸媽媽，我跟佬走喇~ :-P
Sunny 真係唔話得，仲車埋我地返屋企 (佢好似要趕返工架...)
Andy 仲幫我地搬埋野入屋。
今日真係多謝哂 d 兄弟姐妹~

大 show 做完咯，由明星變返一個普通女人。
沖完涼洗完頭，我問老公有冇覺得貨不對辦。
佢話...今日同佢一齊果個唔知係邊個...
哈哈！

Labels: 出門酒店, 婚姻註冊, 婚宴, 婚宴紅酒, 婚宴請帖, 婚禮傳統, 婚禮攝影, 婚紗禮服, 新娘化妝, 星期三緊, 結婚戒指, 花球

Friday, October 09, 2009

行大運

今日要四出拿明天用既物資。

十一點去拿婚紗晚裝。
一件婚紗、兩件晚裝、一條姐妹裙、蛋糕底裙、手套、小小配飾。
兩大袋野。

搭車返新居。
拿 d 大小相簿油畫、林林嬸嬸野去酒店「開房」。
M01，就係我聽日出嫁既地方。
有一間大房兩間細房兩個廁一個廚房。
好大個窗，好大個海景。
俾柴仔睇多兩睇，嘻，冇佢份享用嘛。

碌返出旺角拿褂。
三套褂、送紅睡衣同紅傘。
放低媽媽個套俾亞姨。
又趕住去開茶會。

初初諗如果佢十月十日開，我地去唔到都冇人幫我地去得到。
結果係今日五點，哈。
有人叫我地唔好去既，冇乜用喎。
但我地少出門嘛，聽下囉。

最後一站係去拿鮮花。
又幾盒野同好難拿既花球。
返酒店養住 d 花，柴仔要返屋企喇。
仲話結婚前一日唔可以見面，咁多野預備，唔見點搞得掂呀。

我去大快活同姐食晚飯。
係囉，點解今晚食大快活既？
由於覺得酒店個廁所沖涼唔係好自在，我返左新居沖涼。

媽媽忙住煮湯丸，係我至愛既糖心湯丸呀！
已經好耐好耐冇食過喇！
辛苦哂！
眾人睇完電視就開始上頭。
已經教左爸爸點講，結果都係唔記得四梳。

一梳梳到尾
二梳梳到白髮齊眉
三梳梳到兒孫滿地
四梳梳到四條銀筍盡標齊 (唔記得左)

真係烏龍~

今晚有暴龍表妹(我既伴娘)同亞姨留向酒店。
人人都話之前一晚會訓唔著，兩三點仲諗緊 rundown。
我唔係囉。
一早就想訓，係暴龍表妹捉住我同我油指甲。
哈哈，多謝哂。

今日都做左樣其他新娘子話佢地經常發生既事。
唔想俾柴仔知，但唔知點解佢都知道左。
好傻~

聽日就嫁喇。
:-*

Labels: 出門酒店, 婚禮傳統, 婚紗禮服, 星期三緊, 花球

Thursday, October 08, 2009

悠長假期

今日展開我既悠長假期喇！
第一個節目就係未來女婿仔同爸媽飲早茶。
爸爸成日話我唔請佢飲茶(其實請過幾次食其他野啦！)，今日點都唔會唔計喇掛！

跟住走去辦銀行業務。
一早約左話拿十萬yen，又唔講有 limit，結果拿得七萬五。
入埋紅酒條尾數，換埋 d 散紙，銀行業務辦理完畢。

俾柴仔睇報紙見到今日 Giordano 開倉。
為左添置 d 衫去旅行，我地都去左行下。
第一日開倉，又係平日，d 貨仲好整齊，d sales 仲好好禮貌兼會介紹產品。
係咁二行左個圈，買左百五蚊野，有十對襪、兩件衫同一條頸巾，抵！

趕去下一站 -- 去拿主花車裝飾。
唔重，但大大件囉。
靠柴仔拿返屋企，我就去做 facial。

今次有兩個人 serve 我。
但我覺得好似俾人當公仔咁武，唔係咁自在。
換左人，始終感覺唔係咁好。
仲 sell 我話 join 新 plan 有 discount...我堅持唔 join 囉。
搞左幾個鐘，柴仔打俾我話我做乜好似人間蒸發左咁...hehe...

趕返屋企，reply 返註冊場地 d 細節。
最重要既係......rundown d 附屬品出爐喇！
希望兄弟姐妹仲睇得切啦~

唉...燈塔表妹話我知 d 姐妹裙仲係拿唔到...
佢幫我搞全部唔要，全單退錢。
好在個個都有現成姐妹裙頂住。
唔係好唔開心既，煩囉。

Labels: 婚姻註冊, 婚宴紅酒, 婚紗禮服, 星期三緊, 美容

Wednesday, October 07, 2009

LSWD

今日 d 同事問我係咪 last day。
經更正後，話我今日係 last single working day。
哈哈，係呀，返埋今日就開始我既悠長假期喇！
lunch 同我食左餐好既，我仲走左去買西餅俾佢地做下午茶。

由於最後一日有 printer 用，把握時間決定埋婚宴個座位表。
係咁同柴仔 email 黎 email 去。
搞完個座位表先做埋公司 d 手尾，其實我唔做同事都可以做到既，但費事要人執手尾啦。
九點幾先走呀，計唔計 OT 好呢？

收到 Miffy 話姐妹衫有問題，等左成個鐘都拿唔到。
舖面又有好多人都係等緊，仲話有人報警。
佢話聽日再去過。
em...我都係唔好諗咁多喇...

Labels: 婚宴, 婚紗禮服, 工場 H, 星期三緊

Tuesday, October 06, 2009

決定

今晚突然發現，決定左嫁俾一個男人之後，隨之而黎既係一大堆大大小小既決定。
大至擇日、註冊地方、婚宴地方，小至邊間租衫、租邊件衫、邊套首飾襯邊套衫......
頭都爆！
好在有有主見既柴柴~
:-*

Labels: 星期三緊, 點滴生活

Sunday, October 04, 2009

背影

應該係最後一次向月台見到柴仔既背影，以後佢就會同我一齊走。
所以我打電話俾佢，叫佢企定俾我睇多陣！
:-p

Labels: 劃火柴

Saturday, October 03, 2009

近來最悠閒的一天

好想買牛仔衭。
但試左一條試唔岩，跟住就返左屋企......
點算，我咁難買衭，又得咁少衭，唔通去旅行要日日著同一條衭......
唉...

返到新居，又發現一個壞消息。
之前 d 衫發毛，全部洗過，但件羽絨洗到一笪笪！
點算呀！？
仲有十一日就要去旅行喇！
灰...

Labels: 點滴生活

Friday, October 02, 2009

oh~ 芭瑪

今朝收到柴仔傳來既消息，話有個風黎緊！
都係頭一次唔想打風。

未雨就要綢繆下。
續家續戶打去問如果打風會點安排...
酒樓、攝影、化妝、車、衫、註冊、紅酒、花球...
結果係 - the show must go on，係冇得註冊囉。
touchwood touchwood~~

Labels: 婚姻註冊, 婚宴, 婚宴紅酒, 婚禮攝影, 婚紗禮服, 新娘化妝, 星期三緊, 花球

Thursday, October 01, 2009

國慶六十週年購物日

又做衰女，收到 morning call 後又返訓。
出得門口既時候，柴仔已經開始左第一輪購物...買左個鬚刨。
諗住國慶大減價，點知仲貴過之前睇既！
不過冇辦法，都要買。

買左個26寸喼。
其實冇概念要幾大個、幾多個喼至夠。
買住一個先，再諗。
買左個腰包仔袋證件同錢。
想買個背包但冇貨...
今日都未買夠野，下次繼續。

夜晚砌 rundown。
係，仲有九日...

終於搞掂左！
寄左一個 copy 俾婚攝。
但係未寄得俾兄弟姐妹，因為仲有 d 物資表未搞掂。
星期六啦，有架喇~

==========

我又發埋 d 好恐怖既夢：
著住婚紗，到左男家樓下，發覺我未化妝未 set 頭！
call 化妝師，佢話唔記得左黎，問我地址向邊，即刻飛的黎。
我鬧佢話知唔知化妝對新娘幾重要，不過同時個心又諗自己尋日做乜唔打俾佢 confirm。

記住記住，一定要之前 confirm 過哂 d 人/野~

Labels: 星期三緊, 蜜月

生活點子