好姐妹
幫 Toffy 做姐妹，今日揀姐妹衫。
見到 Toffy，原來佢有左 bb 呀~
好快做人媽咪喇！
噫...咁我地班同學仔勿...叫姐姐好喇！！
向我地試衫既時候，柴仔去提貨。
因為受唔住名牌減價既誘惑，二千一百八十八買左 Grohe 廁所水龍頭同廚房水龍頭。
都睇唔過眼盞波波燈仲掛向度待售，又搬埋佢返屋企。
返到去見有隻大膽小蜜蜂闖左入我地屋企。
柴仔好睇唔過眼，要將小蜜蜂置諸死地。
各大小動物，唔想死得咁慘，下次睇路~
Labels: 一片瓦, 書友仔 S
結婚相簿
食飯既時候討論，話影左結婚相都唔會拿出黎睇，除非...
數十年後...
我：老豆，我地本結婚相簿放左向邊呀？
柴佬：勿向個電視櫃囉！
我：唔見呀，你出黎幫手搵啦！
柴佬：無啦啦搵黎做乜姐！？
我：俾亞女睇丫嘛！
女：老豆，點解亞媽有咁多套衫，你得一套既？
柴佬：問你亞媽啦~
Labels: 劃火柴, 婚紗攝影
3V
終於到左今日喇！
天氣好好，實在太感動喇~
六點鐘爸爸就叫我起身，之前果晚 12 點幾訓，所以都 ok 既。
去買本 e-zone，預備俾柴仔睇，因為聽生日包講，我化妝 set 頭果陣佢會發呆。
差不多時間就打個電話俾柴仔，話佢知我買左 e-zone，費事佢買多本。
衰仔聽到我電話，估我同佢講我唔知醒，哼，我先冇咁懶惰。
同佢講我買左 e-zone，又話我未睇過就過關俾人收左，乜咁架~
本來叫佢帶相機架，但係佢已經出左門口，唯有用電話頂當啦。
好早好早，未夠 8:30 就到左，人地都未開門。
俾左尾數，揀埋 lunch 既外賣，小琴就開始幫我化妝。
小琴講普通話架，佢幫我化眼睛既時候，叫我望上我就望左下，叫我望下我就望左上。
哈哈，雞同鴨講~
一日共 serve 3 pair 人。
有一 pair 人遲到，冇得化妝住，安排左佢地揀衫先。
我心入面就擔心，d 靚衫會唔會俾佢揀哂。
哈，船頭又驚，船尾又驚...
柴仔的確呆左向度，俾佢揀下衫囉，但其實都要我揀左衫先，佢 d 衫至可以定，所以都幾 side 氣。
我化完妝到柴仔，我就去揀衫，先揀室內既晚裝。
試左幾件，結果揀左件深紅色既。
著住揀左既衫，開始 set 頭，小不點就同柴仔配衫。
因為我個 look cool cool 地，就同柴仔配左個不羈 look，著恤衫唔 sip 衫，打呔唔索呔。
wow~ 好型呀~
搞掂哂預備好影室內，但因為攝影劉大師未到，行行企企左一陣。
黎喇黎喇，唔知係咪因為佢遲左，好似好趕咁。
一見到柴仔係四眼仔，就話眼鏡會反光。
試影幾張，唔反光呀，不過折射問題，柴仔塊面凹左。
所以劉大師俾左兩個選擇我地，一係除眼鏡，一係除眼鏡片。
我覺得除眼鏡就唔係柴仔，但除眼鏡片柴仔就會好唔舒服，我決定唔到呀。
劉大師在旁不停施壓，話咁都要諗既咩。
最後柴仔都係決定除眼鏡片。
劉大師一輪「對對對」「下巴高 d」「膞頭高 d」「看我」，好快就影完室內。
跟住就揀一件長拖紗、一件平腳紗同一件晚裝影室外。
揀完又換妝 set 頭，柴仔配衫。
佢實在太簡單喇，所以可以好好咁吃個米線，我就一路 set 頭一路吃，都冇乜胃口 tim 呀。
突然間好似趕到甩褲咁，係咁催執野 (辛苦柴仔喇，我仲 set 緊頭)，仲要柴仔同我著鞋 (幾怕俾雷劈呀)。
廁所都冇得去就出外景喇。
先去仙湖，我著既係有膞白色長拖。
影落先知呢件衫有礙擺 post，做唔到 d 趴地動作。
不過唔會好大影響掛，有好多其他 post 架嘛。
可能冇左個眼鏡，柴仔眼睛變得好敏感，成日眨眼。
劉大師又話佢唔識笑，影幾張都笑唔好就叫佢「閉咀，別笑」。
另外兩 pair 都唔係影一日，所以成個仙湖得一件衫。
我有兩件，所以影完仙湖第一景點就上車換衫，然後轉妝 set 頭。
搞掂個 look，時間岩岩佢地影完第一景點，上車去第二景點。
呢度有個草地，要趴落去影。
隻手掂住 d 草覺得怪怪咁，仲咁岩咁衰有隻小動物 lan 上我手，救命。
其實我都唔係咁鍾意親親大自然，除鞋行草地行沙灘果 d，都係咪搞我。
影完仙湖去海灘。
之前亞生已經同我講左果度會好墟陷，場面好壯觀，所以見到長長既海灘佈滿左一堆堆影結婚相既人，都冇好出奇。
我地唔影便服，時間理應好鬆動，但劉大師好似好唔滿意柴仔表現，影幾張都唔得就又心急又mun，所以感覺好急趕咁。
臨尾等人影便服，我地勿大把時間向度 hea。
天光影到天黑。
不過我又唔係好支力咋喎。
之前預備既寶礦力、得力素同今朝臨急買既蚊怕水，掂都冇掂過。
可能外景全程穿波鞋，搭車會休息下，小不點又會幫我地打傘、送水、噴蚊怕水，加埋心情關係啦。
落埋妝走人，去食鼎泰豐。
香港食好貴架，大陸平平地試下囉。
咁就向上面過左一日，下次 九月二十日去揀相，好期待~
Labels: 婚紗攝影, 星期三緊
龍鳳鐲
放工走左去 Just Gold 試隻龍鳳鐲。
幾型架，不過原來成三萬蚊一隻。
睇下好喇。
(source: Just Gold
http://www.justgold.com.hk/justgold/html/images/p/Love-2.jpg)
望左咁多日，聽日終於影相喇！
好天好天好天好天......
Labels: 星期三緊, 結婚首飾
不該買的鬧鐘
好緊張天氣，成日望住個天。
見舊雲好得意，手痕影左幅相。
夜晚同柴仔行過日本城。
見到個鬧鐘貼住張紙：「超靜音鬧鐘」。
諗多左少少，覺得好好笑~
:-P
Labels: 劃火柴
《喜歡‧愛》
**********
究竟....我是「喜歡」妳...還是「愛」妳 ?
一個跟蹤著大家多年的老話題，一直以來都存在著很多不同的詮釋及定義。
有人認為，看見喜歡的人會快樂，但看著自己愛的人會心跳會加速，會害羞。
有人認為，你喜歡的人可以多於一個，你會欣賞他某方面的才華或優點，會喜歡跟他傾談、相處﹔假如失去了他，會有點可惜的感覺。你愛的人只可以有一個，你會欣賞他的全部，會珍惜每一次跟他在一起的時間﹔假如失去了他，會傷心得肝腸寸斷。
有人認為，愛是深深的喜歡,喜歡是淡淡的愛。
以上的分析，聽過很多次，非常同意。今天在有線的15台「創世電視」，看到一個名為《真的戀愛了》播道會，內容也提及愛與喜歡的分別，主講者的觀點我很有同感「喜歡一個人，你會喜歡他的好﹔愛一個人，你會連他的壞也愛」。
「喜歡? 愛?」其實，我亦有不少回答的經驗，不同時期就會有不同的答案，在這裡我嘗試跟大家分享一下。
喜歡一個人，如果發現她有「自私」的舉動，可能會開始有所保留﹔
愛一個人，我會希望她自私，我要我愛的女人懂得鍚自己。
喜歡一個人，我會讓她感受到浪漫、快樂﹔
愛一個人，我會靜靜地將保險受益人一欄填上她的名字，希望在我離開以後，她還可以感受到我的愛。
喜歡一個人，在她悲傷的時候我會感同身受﹔
愛一個人，在她哀痛的時候我會比她更痛。
喜歡一個人，我可以將我擁有最好的東西都給她﹔
愛一個人，我不需要給她最好的東西，因為她可以擁有我，包括我最好的，當然亦包括的最壞的...哈哈。
喜歡一個人，我會偷偷望著她，心裡靜靜的甜起來﹔
愛一個人，我會明目張膽的望著她，甜得像是要宣佈「我找到了」。
喜歡一個人，我會千方百計讓她的今天比從前快樂﹔
愛一個人，我會歇盡所能令她的將來比今天更快樂。
**********
我...感覺到...
Labels: 點滴生活
鸚鵡
又打到黎~
我下星期影結婚相喇，要好天呀~
Labels: 點滴生活
補充體力
上次聽亞生講，要預備 d 補充體力既食物去影結婚相。
今日我去入左貨喇~
Labels: 婚紗攝影
行慢 d 啦喂
今朝同 Richard 去中環開會，走既時候行去地鐵站。
嘩，佢行得快到丫。
好在我有新鞋穿，急步 d 都唔會話拋離好遠。
如果仲係穿舊果對！？
你行先啦~
Labels: 工場 H
小病
柴仔病左呀，向新居附近睇醫生。
開 file 嘛。
都仲有出旺角行街睇電視、睇水龍頭。
去到球場，坐左向度，小柴就咁就訓左。
男人，保重身體呀~
Labels: 劃火柴
層次
蘋果日報
2008-08-16
【本報訊】旺角嘉禾大廈發生五級大火已六日，但昨日現場仍瀰漫著一股哀傷氣氛。殉職消防員陳兆龍兩位胞姊，昨日致電香港電台節目《千禧年代》表示：「相信冇人想發生咁既事，兆龍係因為佢既職責，選擇咁去做，我地感到光榮，亦尊重佢既決定。希望嘉禾住客唔好覺得對我地有虧欠，唔好太介懷，希望佢地振作D去面對日後生活，努力去生活。」
陳胞姊又感謝各界捐款，但她表示：「爸爸媽媽既心意，同兆龍既心意，係留番兩個老人家夠用就可以，其餘我地會捐去慈善機構，之後各界人士想捐錢，可直接捐去慈善機構，社會上有其他人需要幫助。」
********************
純粹睇呢篇報導，我會覺得...
同樣有家人離世，
有人會怨會仇恨會要賠償。
有人看得開，還會安慰別人，仲會將有餘既幫其他人。
Labels: 點睇
試寐 四
又...又試寐...
把握最後既機會，終於買左喇！
中獎既係睡康寧一張四尺半既床褥，折實價四千蚊有找。
礙於間房既古怪間隔，只可以買到四尺半床。
第時有機會換大屋，一定要買張大 d 既！
(兩條柴枝訓咁大張床......)
外傳：
我仲買左對新鞋，即刻著住走。
嘩，行返工可以快五分鐘喇~
Labels: 一片瓦
小動物樂園
屋企發現越來越多小動物。
今次仲大膽走到我既床上。
姐姐，救命呀~
Labels: 點滴生活
第一件傢俬
wow~ 收到 Toffy 結婚既消息！
突然跑出，今年十一月十一日結婚喇。
扒我頭呢~
嘩，一個星期飲兩次，會唔會膽固醇又爆標呢？
我為新居添左第一件傢俬喇！
係一張玻璃餐桌連四椅，計埋送貨安裝，盛惠一千四百三十八元。
Labels: 一片瓦, 書友仔 S
媽媽周記
今日報紙小文章：
媽媽周記：孩子，請包容我們老了……
孩子，當有一天，父母變得囉囉嗦嗦時，請別忘記你們如何要求過我們一遍遍朗讀童話故事，一首首唱著兒童歌謠？
如果有一天，父母的記性變得差的話，請多多提醒，因為我們也不斷提點你們記得帶手冊、帶筆盒、帶功課。
當有一天，父母連自己吃飯的能力都沒有時，請包容我們，因為我們花了多少時間去教你們使用筷子，並一次又一次把掉在地上的食物拾起？
如果有一天，父母不懂得穿衣服時，請幫一幫我們，因為我們的骨頭變得僵硬了，雙手也沒法屈曲起來。還記得父母是如何小心翼翼幫忙穿衣服，生怕弄痛你們？
如果有一天，父母走路跌跌碰碰的話，請給予多一點耐性，慢慢扶著我們走，因為當你們學走路時，父母從不鬆懈牽著你們的手，一步一步向前走。
孩子啊！當有一天，父母連自行如廁的能力也欠缺時，請別埋怨，也別苦惱，把我們交託別人照顧吧，因為父母想保留唯一的尊嚴，在你們心中留下美好的回憶。
願天下的孩子永遠孝順父母。
突然有 dd 感觸
Labels: 點睇
試寐 三
又試寐喇！
去左新世紀，蓆夢思、愛皇健、雅蘭、睡之漣...差不多間間都試哂。
大概都有心水啦。
睇下 LCD 電視。
睇到好似玩找錯處咁。
其實高清都唔係好靚咁既。
夜晚同大學同學食飯。
去食打邊爐，唔係咁想囉。
話左唔想食打邊爐架嘛，食親都好熱氣。
係咁飲竹庶矛根，又冇食至愛既肥牛同魚皮。
好在 d 煙唔係吹我果邊。
SoSo 宣佈佢十一月十六日結婚喇！
搞得好豪下，住三百幾萬樓、酒店註冊、酒店擺酒。
有後盾係唔同 d。
Labels: 一片瓦, 書友仔 U
試寐 二
lunch 自己走去試蓆夢思。
鬼鬼祟祟咁，又驚俾人睇到。
都幾舒服，不過好鬼貴囉！
放工同柴柴返去。
向實惠試訓，張張都訓下。
又訓返睡康寧，訓到冇哂腰骨。
都係買唔到，哈哈！
Labels: 一片瓦
試寐 一
返新居睇下舖磚既情況。
唔...細房唔合格啦，歪哂既。
好明顯冇用個十字架啦。
唔滿意，唔收貨呀！
好耐之前知道睡康寧呢幾日會大減價。
走左去試寐，預左聽日買，因為 HSBC 咭星期五有折。
左試試右試試，都唔知鍾意訓硬定訓軟。
睇怕聽日都買唔到。
Labels: 一片瓦
兩個笨決定
笨決定一
向銀行填 form，簽左個名就走。
之後先至識擔心...
笨決定二
夜媽媽去福仁商場睇燈。
去 d 咁三山五嶽既地方，要柴仔擔心。
好笨呀~
Labels: 點滴生活
胸襲10秒判無罪 全台仿效閃電性侵
今日的都市日報有以下一則新聞:
**********
胸襲10秒判無罪 全台仿效閃電性侵
榜樣 去年台灣彰化的一宗襲胸10秒的案件，被判定無罪後，全台陸續出現襲臀、襲胸、舌吻都控制在10秒內。
上個月初，台中市一名女子在電梯間，遭到襲臀，歹徒居然這樣對她說：「我只是摸你一下而已，摸你也不到5秒啊！」行政院長劉兆玄下令組成專案小組，並表達立場，要求改善。 (都市)
**********
撞鬼。
Labels: 點睇
燈燈燈
鋪左 d 磚，個半拋光效果好靚。
不過幅相好似唔係好 show 到個效果。
向美心食完 lunch，去街市行下，噫，發現我地笨左啦，街市好多平野食呀。
又多款，做飯堂都得。
唯有遲 d 再試啦。
搭 87D 去旺角睇燈。
主要睇書桌燈點搞，結果廳都複睇左一次。
有盞八個頭既我幾鍾意，但我地唔使咁大盞燈。
話有六個頭既，但效果又唔知會係點。
有 set 燈泡形燈，我地都覺得好得意，但的確冇左 d 高雅感。
睇到一隻書桌燈，我覺得 ok，柴仔竟然話似抽油煙機...
有 d 上星期去睇，明明話優惠做到上星期日，今日去到佢話優惠做到聽日，呃人既。
唔知係咪好幾個星期都係咁行法，柴仔話冇行得咁支力，又係喎。
睇婚紗鞋，想搵 d 前高後高既款。
冇辦法啦，人矮嘛，又唔係件件婚紗有得改短。
先去旺角中心，但 d 款好嚇人，不過起碼知道有。
再去金都，d 款 ok 呀，全部 tailor made for 結婚嘛，但貴 d 囉。
唉，慢慢再睇啦...
Labels: 一片瓦, 婚紗禮服
謝絕探訪
本來打算今晚上去新居睇一睇。
但師傅話鋪左磚，未乾，最好唔好上去住。
哦。
Labels: 一片瓦
//
3/2/09 17:28
ccming //
3/2/09 22:03
