媽媽出戰
開始慢慢螞蟻搬家。
今日帶媽媽去新居參觀，仲可以拿多 d 野。
執左 d sailormoon，梗係不忘睇返下啦。
地場衛~ 禮服幪面俠~ @@~
參觀完出旺角同媽媽睇褂。
去返錦發睇，三兩下又搞掂。
柴柴仲成功爭取到送傘 tim 呀！
不過租果件唔係媽媽最鍾意果件。
冇辦法啦，希望媽媽唔會好唔開心啦，起碼都還左佢想著褂既心願囉。
(明明都試左幾件，但係影得一件)
搞掂 d 褂，去訂出門酒店。
海鮮房價：兩房 1100 三房 1200。
上次問明明兩房 1000 三房 1200。
好在對我冇影響，因為我租三房。
老闆問係咪出門用呀。
佢話唔係關心用途，而係好多大頭蝦 book 錯日子，好心提提我地。
哈，我冇 book 錯呀，未笨得哂！
跟住去睇帖既版。
一直以為有真帖睇，原來只係一張 A4 紙印左排好版既字。
再等多十日八日就有得拿喇！
到時要做工廠妹工廠仔，入餅咭入利是入帖...入...入...入...
最後一站睇晚裝。
亞媽對金都 d 衫完全冇興趣。
佢好有主見，我又唔擔心既。
今日好似做左好多野咁，我覺得自己好叻呀！
返到屋企見媽媽已經訓左，話行到好支力喎。
哈哈，我受左長期訓練係唔同 d~
Labels: 一片瓦, 出門酒店, 婚宴請帖, 婚紗禮服, 星期三緊
合體
結合兩個電腦。
cd-rom 唔岩位插...
所以，我既電腦由 36x 既 cd-rom，退步到連 cd-rom 都冇。
舊既 c drive 都係睇唔到，唉。
期待用新機既時刻快 d 來臨。
Labels: 點滴生活
頂...住先~
捱左家姐部舊機咁多個月，今日終於的起心肝...
哈哈，唔係買新機呀，係托左柴哥哥部舊機返屋企。
又再頂住先囉。
新屋先買新機用，唔使等好耐姐~
Labels: 點滴生活
62 99 出戰
今日我睇中醫呀！
Lion 睇過，佢介紹既，話皮膚好左喎。
咁我為左靚靚，梗係卜到去試啦。
八十蚊診金，每日藥粉四十蚊，共三日劑量。
約左下星期二下午覆診，睇下 d 藥岩唔岩。
無啦啦要請假覆診，嘻嘻。
睇完醫生，同柴仔同柴媽媽會合，之後柴爸爸都 join 埋。
去睇新娘褂、奶奶褂同奶奶晚裝呀！
先去睇褂，心水店舖係美華、錦發同永隆。
入到美華，我地話想睇下 d 褂。
個男人就話「下，睇咋，你等齊人再黎睇啦。」
我心諗，下，62 99 老公都向度，仲唔齊人，要唔要我叫埋果晚去飲 d 親朋戚友去睇呀！
咁我話都齊人啦。
個男人就話「你係咪租架喇？」
我「我地想睇下先。」
男人「睇咋，你睇下 d 相先啦，係租先俾 d 褂你睇。」
車，睇相使鬼黎牙，佢 d 相有幾張仲係冠南華網上面 d 相黎既。
唔使再講喇，即走！
你唔憂做我都唔辛苦你！
跟住就去錦發。
有位郭小姐即刻招呼我地。
我地都係話想睇下 d 褂，郭小姐就拿 d 褂俾我地睇，又俾我地試。
次序唔記得喇，試左一件平腳，一件大五福水波，兩件中五福水波。
鍾意水波腳多 d，因為青春 d 可愛 d。
鍾意中五福多 d，因為鍾意多 dd 紅色。
佢地俾影相既。
郭小姐見柴仔影我後面，仲幫我攝條裙向後面俾佢影。
招呼好到不得了。
呢度係果兩件中五福水波。
其實只係著左件衫，條裙係夾住架咋，所以俾柴仔笑我成個人梗哂咁。
我試完到 99 試。
又係想睇乜就有得試乜。
試左兩件棗紅色同一件黑衫紅裙。
d 褂暴哂光，冇哂神秘感 tim...
唯有唔講揀左邊件啦~
本來都諗住睇埋永隆架，但係見郭小姐招呼咁好，d 褂又好新淨，又見好多 esdlife 既姐妹都租呢度，所以都唔多心，即刻俾左訂。
一千一百六十蚊...bye bye~
不過係有樣野唔開心囉...
點解佢淨係送睡衣，唔送傘既...
搞掂 d 褂，去做帖。
係比較早少少既，不過既然帖既內容都定左，勿搞埋佢囉。
高經理拿左一本帖既真實樣板俾我地揀，但係唔見左我地最初鍾意果款帖。
揀唔落手呀，始終鍾情左果款。
好在同返高經理講，佢都肯同我地做返果款。
俾低左 d 資料，安心等通知去睇板。
(其實我知道點形容果款帖，但保持神秘，唔講~)
Labels: 婚宴請帖, 婚紗禮服, 星期三緊, 美容
試梳化
上星期六送左梳化黎喇，不過我做姐妹，所以都未有機會享受到。
今日終於登上呢個寶座喇！
仲見到電視旁放左我同柴仔結婚相個相架。
估唔到柴仔都會咁做。
好窩心~
Labels: 一片瓦
牛牛~
向我同牛牛 say bye bye 既時候俾我睇到篇咁野：
**********
都市日報
甄艷容 醫道：牛肉慎食非戒食！
中醫認為，牛肉有補氣血、強筋骨、益脾胃、消腫利水的作用，更可提高人體抗病、抗衰老能力和增強肌力。以久病氣虛、面黃目眩、血貧乏力、或骨質疏鬆的患者，更為適合。所以牛肉作為有益人體的食物，是理所當然 。
中醫學說，無論任何食物，各具有寒、熱、溫、涼四種不同的性質，牛肉是屬於溫性的食物，食後能起到溫中補虛的作用，故寒症、虛症之患者適宜服食。
此外經常有病人說，牛肉「燥熱、有毒」，故逐漸養成戒吃牛肉的習慣。其實過於戒食任何一類有益的食物，也非為正確養身之道。
牛肉本身並非有毒，反而可能是因人們的睡眠和飲食習慣，導致體質偏於燥熱。因此在服食牛肉後，所謂「熱上加熱」，引致爆發一些熱毒的病症。平日應否選食牛肉，如選食其他食物、或藥物一樣，必須視乎食物性質、食量多少、病症深淺及體質情況而定，因事制宜，慎食而非戒食。(逢周二見報)
甄艷容
註冊中醫師
**********
牛牛，咁我食唔食你好呀？
Labels: 點滴生活
Noffy's Night
尋日係 Noffy 既大日子。
留到今日先至寫，因為我大昏迷左，今日下午六點先起身。
鬼咩，飲完仲要去飲野，返到屋企仲要落妝沖涼洗頭，成五點先訓喎~
講返尋日。
朝早到 Noffy 屋企。
好悠閒既姐妹，參觀呢個千幾尺四面環海既單位。
悠閒，因為 Noffy 請左 MC 同大妗姐幫佢安排，我地 d 姐妹只係出個人，其他都聽指示就得。
大軍殺到，玩！
戴假髮、飲珍珠奶茶、啜啜膠片、爆波、愛的宣言、猜猜新娘在哪，當然唔少得開門利是啦！
愛的宣言係要新郎哥即時寫架，Noffy 怕佢作唔到，所以姐妹作左個後備。
不過新郎哥都不負所望，作到 d 野。
姐妹果篇雖然用唔著，但都等我向度發表下先。
**********
親愛的xx豬豬：
從今日起，我會令妳幸褔到痺；
吸塵抹地洗衫煮飯等我黎；
供車供樓水電煤通通由我俾；
唔嫖唔賭唔飲酒唔食煙；
早日同妳生返一打 B；
妳買野，我唔會 ge ge gut gut；
我買野，要經妳審核審核；
即係冇妳批准，PS3 只可以睇唔可以買；
如果妳買野買到冇位擺，我會同我 d 珍藏講 bye bye；
總之以後妳話點就點；
我錫妳愛妳永不變！
你的x BB
**********
依住吉時出門去男家。
冇諗過原來男家住到咁偏僻。
有幾偏？車隊到會放炮長，諗唔諗到有幾僻？
乜都唔使幫手，行行企企，玩下貓，影下相。
斟完茶拜完神，新郎新娘留向男家食飯，我地一團人就去飲茶。
食飽飯仲有旅遊巴車返女家回門。
咁長車程+食飽...好好訓~
返到女家仲有時間 hea 下，悠到丫。
搭旅遊巴去酒樓，覺得行條路有 d 怪。
到步，弊，點解係呢度架？
我之前一直都以為係"果度"，仲同柴仔講係"果度"，但原來...
諗住打電話通知佢，但果一刻唔得閒，之後就冇左件事。
好在柴仔都黎得到，但之後當然有俾柴仔笑我啦~
唉，我個地圖真係好有問題，有冇得 patch 下...
晏畫一路都係自由活動，唔使做招待，唔使安排影相。
我地仲走去督魚旦吃燒賣嘆咖啡。
唔知新人會唔會覺得 d 姐妹金好唔抵呢？
呵呵呵~
晚宴開始，新人進場，兄弟姐妹放花炮。
不過，失敗。
四個拿花炮既姐妹，得一個開到...
太實，我出盡力都扭唔開。
真掃興！
進場之後，新人例牌講下野。
之前我地叫 Noffy 準備紙巾，但佢話佢自己唔會喊。
我地都話準備定啦，可能老公喊呢。
結果，Noffy 勿又係喊。
傻豬。
睇到佢喊，我都眼濕濕。
我咁眼淺，到我果陣，我會唔會變豬頭呢？
Labels: 書友仔 S
港女
第一次聽以下對話，笑到我死~
男：想食乜野呀？
女：無所謂呀，你話啦。
男：食泰國野丫？
女：我唔食辣架喎。
男：咁打邊爐丫？
女：咁熱氣！
男：咁鋸扒喇。
女：你知我唔食牛架！
男：咁你有乜提議？
女：我真係無所謂架...
Labels: 點睇
超低能
放工走在街上...
伸手入袋搵電話...
手鍊同袋入面既拉鍊卡住左...
=.="
結果要叫個小姐伸手入我個袋幫我解左條鍊。
幾驚俾佢拒絕，以為我係街頭騙案...
超低能...
Labels: 點滴生活
美滿婚姻有方程式
報紙又有好野睇：
**********
都市日報 2009年03月03日,星期二
英國一間婚禮策劃公司訪問3000位已婚男女，發現維持天長地久的奧秘，包括每天接吻、擁抱，每周最好行房3次，只要「照辦煮碗」，大家都可享有美滿婚姻！
專門提供婚禮策劃服務的網站confetti.co.uk，向3000多對已婚人士，詢問維持美滿婚姻的秘訣。調查顯示，婚姻長久的伴侶，多數經由朋友介紹，且婚前拍拖3年半，男方最好在31歲結婚，先生比太太年長兩歲零三個月，首名兒女最好在婚後兩年零兩個月出生。
除此之外，夫婦二人大多擁有兩個共同興趣、每天接吻4次、24小時內擁抱3次、每日最少說1次「我愛你」、每星期行房3次、每月享受兩次浪漫的燭光晚餐、每星期3晚在沙發上擁着看電視、每年準備兩次驚喜的周末活動、每年去兩次本地遊及一次外地旅行。
無論夫婦倆有多恩愛，仍應天天保持密切聯繫，即每天最少3通電話、簡訊或電郵。但大家亦要給對方適度的私人空間，故應讓另一半每月兩晚跟好友共度。
**********
好鍾意 "每星期3晚在沙發上擁着看電視"！
每星期七晚仲好！
呵呵呵~
Labels: 劃火柴, 點睇
