生活點子: February 2007

古惑小王子

今日早 d 同狗狗們行街，因為柴柴夜晚有節目。
過橋準備返屋企既時候，小王子向個結界前坐低左唔願行。
佢咁樣我地通常都以為佢係"支力"得滯。
見佢望下望下返轉頭，咁我地行去睇下啦，點知小王子係咁跑。
唔係"支力"喎，原來係唔想返屋企住。
同佢跑樓梯，俾佢同小公主做下自由狗。
古惑既小王子就襯機上演真實版「逃」。
嚇死人呀，好在柴柴踩得住條帶，先不至走狗咋。

61368

睇《鳳凰四重奏》果陣已經計劃寫呢篇點子。
見馬德鍾計佢同佢女朋友一齊幾耐，我又計一計。
我同柴仔一齊已經 61368 個小時喇！
對比「流流長」，呢個唔係大數，但都唔細囉。

睇返以前 d message，唔睇都唔記得，乜我地以前係咁既咩？
一路諗返 d 片段...嘻嘻...
冇大起大落既事，冇好轟烈既事，但就一路都好開心，好開心。

諗起以前講過一句野。
上半部份唔係好記得，淨係記得有「轟轟烈烈」四個字。
下半部份就係「只求平平淡淡在你身邊」。
係架，夠架喇~~

其實曾經以為今日會有 d 事發生，但結果冇囉。
嘻嘻，諗多左...

預祝

因為正日柴仔要去春茗，所以今日提早慶祝。

柴仔安排左既節目係去睇戲。
去沙田 UA，排隊買票睇 19:45 《門徒》。
排隊既時候四圍望下，柴仔就好疑惑咁話幢野拆左，向邊度睇戲，入口向邊。
我都好疑惑咁話，邊有拆到野姐，勿就係買緊飛呢個位隔離之嘛。
佢又講到似層層，我又覺得我冇記錯，但事實係點既呢？
冇人知咯...

買完飛去又一城行下街，順便換左 d 恆生 cash dollar。
我就有 target 既，所以都即刻就用哂 d 券。
柴仔果ｄ就用唔著咯。
咁岩向呢個日子黎到呢度，舊地重遊，諗起你捉住人地浸酒。
好耐都冇果種味道 lu。

返沙田搵野食。
千挑萬選，揀左雞仔餅同蔘桂圓。
開場喇！見個預告片既片頭同 d 音樂，唔對路...
匿埋用柴仔既衫領遮住對眼。
自己咪埋眼同用手遮係冇效架，因為我實心野。
冇估錯啦，真係恐怖片，乜都冇睇，淨係聽到聲都驚驚。

《門徒》嘛，話唔上好好睇，有 d 無聊位囉。
無啦啦做乜搞野既，無啦啦要去救狗狗既，無啦啦又要餵鴿既...
坐隔離位果個男人乜都笑一餐，睇佢仲好笑。
係挑起左一個話題囉，究竟劉德華講既 supply and demand 道理岩唔岩呢？
咁即係 d 核突雜誌，又係同一道理？
究竟係有雞先，定係有蛋先呢？

睇到好晏先出黎，搵唔到食 tim。
冇乜選擇下走左去食粥。
話呢餐唔算架，下次再食餐好既。

由"中心點"離開，各走各路。
一個往羅湖，一住尖東。
打對面月台坐，我拿起電話，影左下面呢張相：

呵呵呵~~~

打劫

今年返工既新年氣氛，同上年好唔同。
上年返到公司，d 人突然唔係好識你咁。
今年就開開心心四出打劫。
一黎就係公司人人有份既利是，跟住駱駱同駝駝都俾左特別利是我。
駝駝派利是果陣好虛陷，因為亞臣一見佢拿疊利是出黎，就即刻通風報信，打電話叫埋房入面 d 人出黎。
有個 vendor 走埋黎問我結婚未，我話未，反問返佢，佢結左囉。
跟住佢鬼鬼祟祟咁俾封利是我，再講返公事，叫我幫手做 d 野。
我話乜好似賄賂我咁架。

放工打電話俾舊舊老細(澧爸爸)，佢生日嘛。
記得我上年祝佢心想事成，佢話我 out，教左我句 in d 既。
咁我今年就用佢果句，祝佢「為所慾為」。
同佢傾左半個鐘頭，係咁講佢個前 staff。
(因為佢唔同呢個 staff 續約)
都同呢個 staff 食過一次飯既，覺得佢好多野講、好熱情、好動。
澧爸爸就俾佢一次主動激親。
佢主動幫隔離 department 做野囉，自己野又未做哂喎，人地睇到都核突啦。
又話佢唔小心，唔諗後果，好不滿咁。
哈哈，係咪都係我最好呢？

初二

諗住會早食飯，所以七點前就到左大姑媽屋企。
一個細既都冇到，呆等到八點幾先食飯。
下年我都係唔去。

聽到一 d 表面既物質貢獻，有人問點解佢冇。
唔了解人地背後成個故事、環境，唔好問點解。
如果唔係，我都有好多"點解"想問。

初一

四點幾起身，整左 d 蘿蔔糕同芋蓉包。
夜晚冇去二姑媽屋企，自己叮波仔食。
成日都冇出過街。
第一次咁樣過大年初一。

年卅十晚

今日 sung 鼻涕既時候， d 鼻涕都黑黑地。
拜尋日 d 黑煙所賜啦，個肺又受左罪喇。

柴仔尋晚 annual dinner。
聽佢講 d 獎品好豐富呀，好過我地果 d 好多。
抽 table prize 既方法都好特別。
(雖然都可能係唔知向邊度抄返黎...)
每人手上都有張號碼紙，台上就播賽馬，邊隻馬跑出，就邊個號碼中獎。
搞到個個都叫 x 號上上上，輸左既又好似 d 馬迷咁 meet 飛。
好有氣氛。

同柴仔討論一個好深既問題。
究竟乜野係做好事？乜野係作孽呢？
你以為捐 d 衫出去係做善事，但人地拿 d 衫去賣，用得返黎既錢去做壞事。
咁你係做左好事？定算係成就左件壞事呢？
係積左陰德？定係好陰質？
好玄喎...

夜晚去行個細花市。
上年沿途都有 d 檔仔架，但今年冇哂。
純粹行左個圈，乜野都冇買到。

搭地鐵返屋企果陣，向月台見到有個男仔好粗暴咁對個女仔。
個男仔拉住女仔既手，一野 fing 佢埋月台幕門，喝話「上車喇」。
唔似係飲醉左，唔似係玩。
嗌交 / 發脾氣搞到咁，好虐待姐。

火燒旺地

朝早都好忙呀，要清野唔好壓過年嘛。
下午收到駱駱電話，bb 出左世喇！
一點過 dd 出世，有七點幾磅呀！
幾肥肥白白咁喎。
(駱駱預早請左假去生仔，睇唔到佢個狼狽樣 tim。)

下午差唔多三點，有人話 pantry 睇到樓下係咁攻 d 煙上黎。
我都有走去八下，嘩，真係好激架喎。
搵人打電話問下管理處乜事，係咪火燭。
得返黎既答覆係「冇野，唔使走，有進一步消息會通知你地。」
我同同事講，會唔會好似 911 咁，初初都話冇事唔使走。
個個都返返位繼續做野，再過多陣，有人話見走火梯有人走喎。
再打去問管理處，佢地答「係呀，要走喇！」
嘩，咁都得既！
唔打去問我地就死得啦！

唔知要搞幾耐，所以去 locker 拿埋袋走。
(小朋友千祈唔好學)
我地公司向 20 樓，有同事選擇搭 lift，呢個我都唔敢，我揀行樓梯。
好在係星期五，casual wear，唔係著住對高跟鞋走佬都幾係野。
不過咪話，都幾腳軟架，可能因為加埋有小小緊張啦。

落到樓下，梗係影返 d 相啦。
你睇，我地就正正向冒煙果度既上一層。
都幾大煙架。

向條街度遊蕩，有同事就捉緊時間打機。
亞臣就講三級野，話知度點解呢度叫小西灣。
(因為佢見走落街多數都係佬。)
搞到 5 點左右至返上去，但仲好大煙味，好難頂呢。

駱駱生仔 $_$

好似成日講駱駱 d 野 tim。
佢係我身邊第一個有仔既人，好多野聽架嘛。

佢太太已經過左預產期喇，但 bb 仲未肯出世。
入過醫院檢查，見到其他大肚婆生極都生唔出，仲嚇親 tim，話要去私家開刀生。
駱駱就要同佢張羅囉。
一時間又諗唔起邊間醫院有生仔服務，我勿又幫佢問下人囉。
都幾狼狽咁。
搵到有得生仔既醫院，時間又太"廠"撮，冇期。
最後搵浸會，要四萬蚊呀！ @@"
都冇辦法啦。

情人節 VI

之前問下柴仔今晚去邊度好，佢話鐵爐堡等喎！
真係激死人呀。
(鐵爐堡即係邊度？勿 online game 其中一個城囉！)
結果梗係有出黎啦！
你估柴柴真係咁冇心肝既咩！

五毫子朋友

駱駱突然請下午假，留返廿幾個電話等我打。
仲話最多聽晚陪我 OT。
咪玩啦，聽晚佢自己 O 飽佢。

今晚都唔 O，因為約左 d 老朋友食飯。
今次係亞利約既，初初佢冇提到有其他人架。
後來問我想唔想約其他人，我勿提議囉。
點知佢話已經約左，古古惑惑咁。

約左向信和果度食意粉屋，係我話想食既。
但係我地人多，等左好耐都冇多人桌。
結果轉地方囉，去左周記避風塘。
野食唔錯喎，可以介紹俾人 tim 呀。
佢仲有情人節餐，d 菜名改得好咸濕架。

席間佢地問起我有冇收到佢地既 SMS。
問我做乜收到唔覆。
我話因為唔知係咪網內，唔捨得俾五毫子。
佢地話原來我地既友情五毫子都唔值。
梗唔係啦，慳家之嘛！
佢地都係講下笑既姐。

亞飯送左一紮糖花俾我，有好多隻顏色好靚架。
我就同在坐既朋友分享，一人一支。
仲話十年後拿返出黎相認。
圖中就係我果支喇。

十一點幾，追魂電話又響起。
成卅十歲人，仲俾人追魂。
我話傾緊計，佢仲話有乜咁多野傾。
唉，囉唆定關心，睇下係咩人啦。

2 月 10 日

多謝 Jeffrey 同亞哥既電話。
多謝 Andy哥同 Edmond 既 ICQ。
多謝 Jacky, RingoF, Wallace, Ginny, ChristineC, Lun, KaKa, Kwan, 亞敏同師姐既 SMS。
唔好意思，唔係個個 message 有覆，要五毛子個嘛...唔捨得。

朝早照樣同柴柴跑步。
嘻嘻，柴柴終於有微言，投訴我越黎越晏喇。
床呀床，下次我唔同你咁痴纏咯。
見柴柴一路都冇乜表示，跑完行返屋企既時候，我用古惑既眼神望住佢。
好在佢都記得，但係佢話唔會 send message 俾我，費事我儲埋儲埋一大堆垃圾。
車，點會喎。

返上樓之前去買任務物品：圓尺。
諗起柴柴向個袋度變 d 錢出黎個情形就好笑。
返到去就做勞作，一切準備好就出發。
可惜天公不做美，任務失敗，唯有打道回府。

但我地又點會咁易死心丫，食飯前再試過。
有 d 雞手鴨腳，但總算做到。
有途人望下望下，睇我地搞乜鬼架。
但兩個人做 d 傻野 (其實不知幾正經)，旁人既眼光都可以置之不理。

夜晚冇得同柴柴一齊呀，因為係公司 Annual Dinner。
咁既日子 Annual Dinner，真係掃興。
我仲要仲左招，席間係咁打乞痴流鼻水，又唔敢食 d 眼訓藥。
咁既病樣...點會有運抽得到獎丫。
d 同事係咁劈酒，醉到打人 (MD 都受害)、訓地...
我見抽哂獎咯，勿同駱駱走人囉。

今日就咁過左喇。

禮物

亞媽送左個銀包俾我，我係幾鍾意呢個牌子既。
但係就唔係好鍾意個款同顏色，d 格唔係咁岩使，又唔係好夠位，咁點算呢？
唔通 side 左亞媽一番心意？

掃貨 (任務失敗)

今個月差唔多爆 credit limit，計過度過，仲僅僅夠去掃下貨。
見新世紀有 target 鋪，買野又有得抽獎，所以約柴仔放工去逛逛。
我先到，柴仔公司仲有野做，勿邊行邊等囉。

好想買衫、鞋、袋...
都想買羽絨既，但以近幾年幾既天氣睇，著既機會好少。
況且而家咁既天氣，買羽絨好似好傻喎...
行到兩隻腳都抽根，又唔好意思停落黎，死頂咁行。
行街街成咁，都折惰咯。

到成九點先見到柴仔面。
食埋飯，傾陣計，d 店都關門咯。
佢好少做到咁夜架，我都算唔好彩喇。
任務失敗，有 d 失望。
返到屋企，仲要面對 d 另類每月的煩惱。
唉，好 down 呀。

維景酒店

又到公司食大餐既日子，今次去銅鑼灣維景酒店。
唔知馬生點解知道我好好甜品，係咁望住我，同我老闆密針密針，講我仲會食幾多碟。
食物評語嘛，甜品款式較少，海鮮種類較多，食物質數唔差。
唔覺唔覺都食到好飽，返到屋企支力得好緊要，可能 d 血都去左做消化掛。
又要跑多兩公里喇~~

早 > 午 > 黃昏

尋晚柴仔仲要做公司野，搞到好夜，所以今日唔跑早場，約左跑中場。
點知唔知醒起身，結果跑黃昏。
都幾好跑丫。

家姐大日子 (下集)

今日家姐大日子 (下集) -- “擺酒”。
因為只係夜晚，所以我冇請假，放工先至去。
有人叫我同老闆講早少少走...
你話有冇可能丫？

今晚唔同尋日咯，都係著返尋日件衫，但係冇 set 頭冇化妝。
忙住做針茶小姐，洗杯針茶遞茶，一腳踢。
柴柴坐埋一邊，唔知有冇悶親呢？

家姐大日子 (上集)

五六點左右，家姐叫醒我，叫我入房訓，佢要開始上妝喇。
嘩，我都未見過我家姐咁既樣。
佢搞完到我。
本來話冇 set 頭既，結果都整埋。
嘩，我都未見過我自己咁既樣。

向房度針左茶先。
我呢個新丁伴娘，都唔知有乜要做。
黏住柴柴企埋一邊，開門利是都係新郎哥自動送上。

噫，柴柴電話有 message。
佢睇完之後同我講：「數碼通係第一個同我講生日快樂既人。」

我記得架，我真係記得架，你知架~~
我係冇表示囉...er...
柴柴口話冇野喎，唔介意，但我都係覺得好無地自容~~
要面壁思過一返。

針完茶就落禮堂喇。
柴仔俾家姐同準姐夫捉左做司儀。
對住我 print 俾佢既貓紙，俾佢話鬼我邊有人拿住成張 A4 紙做貓紙。
嘻嘻...嘻嘻...

行禮喇，證婚人、新人同律師上台，各人就坐。
亞媽又走埋上台，以為自己都係證婚人，哎呀...
尋晚有個烏龍外父，今日有個烏龍外母，真係天生一對。

好快就完左呢個簡單既儀式。
有少少野食下，影下相。
係喎，都唔記得形容下我件衫：薄切切既吊帶裙。
向十幾度既天氣下，係一個冰鮮伴娘。
出到室外影相...嘩...披返件毛毛，唔暖得哂架，叫做多層紗隔陣風咁架咋。

影完相，家姐大日子 (上集) 就完咯。
換返衫...哎呀...過頭笠...
個妝同個頭咁行，點捐呀！？
結果只係捐件大領冷衫，落返妝，叫做正常 d 咁同柴仔去街街。

生活點子

Sunday, February 25, 2007

古惑小王子

61368

Saturday, February 24, 2007

預祝

Wednesday, February 21, 2007

打劫

Monday, February 19, 2007

初二

Sunday, February 18, 2007

初一

Saturday, February 17, 2007

年卅十晚

Friday, February 16, 2007

火燒旺地

Thursday, February 15, 2007

駱駱生仔 $_$

Wednesday, February 14, 2007

情人節 VI

Tuesday, February 13, 2007

五毫子朋友

Saturday, February 10, 2007

2 月 10 日

Friday, February 09, 2007

禮物

Thursday, February 08, 2007

掃貨 (任務失敗)

Wednesday, February 07, 2007

維景酒店

Saturday, February 03, 2007

早 > 午 > 黃昏

Friday, February 02, 2007

家姐大日子 (下集)

Thursday, February 01, 2007

家姐大日子 (上集)

About Me

Countdown

Links

Labels

Previous Posts

Archives

This Page's Comments

Visitor Counter