太陽計劃 II
今日同柴柴去買六合彩果陣，有個女人居然大膽打我地尖，我地梗係唔會由佢啦。
佢仲聲大夾惡，咁鬼冇品既。
我同柴柴都話佢買左都唔會中。
走既時候，我同柴柴繼續講緊下次見到呢 d 人咁點。
我話一定要搭佢膞頭，祝佢好運，呵呵呵。
繼續我地既太陽計劃。
行行下，見到烏溪沙xxx營。
下！？呢度係我小學去旅行果個烏溪沙！？
四周圍都係高樓大廈既！？
我記得細個去果陣好荒蕪下架，柴仔仲話佢細個去係搭船既 tim。
嘩，乜變成咁呀。
搭巴士返出沙田，又逛下宜家。
睇到一個趟門既衣櫃，柴仔望住張分兩行寫左「門前不用預留空間」咁上下既 notice，話唔明講乜。
我又望住個 notice，我唔明佢唔明 d 乜。
原來...哈哈...傻佬，唔好幫人亂加標點啦！
帶左張元氣 coupon，終於可以補返果餐喇。
柴仔話係食人棄我取壽司喎，唔...佢又解得通既。
食左 3 黃碟、3 綠碟同 3 紫碟。
比起平時同亞飯食，好似少左好多，不過都飽。
其實柴仔都唔好食壽司既，係我鍾意之嘛，嘻嘻。
有個話題，講做一樣不合符道德既事既價錢，類似每樣野向心目中都會有個價。
比較極端既例子，係人地俾幾多錢你，你先會殺一個人。
我就話唔係錢可以令我去做既野。
柴仔就話左個價，話呢個價可以令佢覺得值得去擔心後果。
(純粹空說，別當真。)
又話如果有人出呢個價叫我殺佢，叫我都應承。
因為佢都唔知有乜值得人地用呢個價去咁做，同埋解決到佢一路面對既問題。
傻啦，我寧願你唔去解決呢個問題。
同埋，最初點解有呢個問題呢？
做左，勿達唔到目標囉！？
咪忘本呀...
生日派對
明明駝駝差輸左，今日係佢走火警既，但話要開會，咁就交左個波俾我。
我呢 d 納米薯仔唯有聽命啦。
又二十層...
之後做野做到支力支力地，隻手 dup 下腰，駝駝問我係咪因為感冒。
我就講笑話...因為走火警...
佢既刻冇聲出，哈哈。
放工其實幾想返屋企，但之前應承左去同事 Gremlins 既生日派對。
佢地都知我唔係蒲人，初初 Gremlins 知我應承去，佢好似好開心咁，仲特登打電話俾我，多謝我，話係我俾佢最好既生日禮物，仲安排埋人幫我頂酒，咁我點好掃興話唔去呀。
不過我覺得事實係我去到反而掃佢地興囉。
一來我真係支力支力地啦。
二來有其他 department 既人向度，我又唔熟，冇乜兩句啦。
三來我又唔煙又唔酒又唔識差枚又唔唱K啦。
四來...唔使再講啦，以上三個都夠喇。
結果我襯換房果陣走人。
我諗下次都唔會再叫我...嘻嘻。
渡女過河
今晚一大班中學同學同亞利補祝生日。
亞利人面廣，隔離班既人都有三幾個。
有 d 畢左業咁耐都只係見過一次既人都有出席。
有個同我有 d 過節既人都向度。
咁多"生保"人，硬係覺得唔係咁自然。
亞利知道我有 d 野，撩我講下野，佢講左個故事我聽：
一個老和尚帶著一個小和尚過河，發現河邊有一名年輕女子正在發愁如何過河。
老和尚二話不說，抱起女子就過了河。
過河後老和尚放下就走，跟在老和尚後面的小和尚非常納悶，對師父的做法百思不得其解。
終於，小和尚忍不住問師父：「我們是出家人，你平常教導我不應該近女色，可剛才你怎麼能抱她呢？」
老和尚驚訝道：「我已經把她放下了，你怎麼還抱著？」
我唔百分百知個故事點配合現實，但我諗佢知我有 d 野諗，同埋想叫我唔使再諗。
始終受過影響，唔會唔記得既，但唔上心架喇。
多謝亞利一番心意。
換個角色
做 interviewee 做得多，今日做 interviewer。
請一個 ASA 成個 Department 出動哂去做 interview，幾有誠意呀。
interviewee 既表現係點就唔講啦，唔係幾岩既。
interviewer 嘛，麻麻地姐。
過程會有 dead air 囉。
同柴仔講呢個 interview 既事。
佢覺得做 written test 冇用囉，同埋有 d 問題有問題。
唔...都開左個頭咯...都要頂架啦。
佢又提議左 d 問題，但呢類型駝駝唔問架喎...
唉...interviewer 都唔易做。
廿四味
呢個禮拜喉嚨都好唔舒服，原來喉嚨生痱之呀。
早兩晚放工都搵碗廿四味飲，嘩，好鬼難飲。
今日去搵柴柴，佢帶我去飲廿四味。
唔...呢碗幾好飲。
之後仲有鼻敏感藥做贈品。
實藥到病除啦！
飛翔...飛牆...
今朝早收到柴仔既電話，問我係咪訓緊。
我仲絲絲然咁答係。
諗諗下覺得奇怪，搵個鐘睇下，原來已經 10:30。
嘩...死喇...柴仔俾我激死喇...
電話鬧鐘冇響到，睇下，點解係 26/9/2005 19:xx 既！？
噢，梗係尋晚電話 hang 機搞成咁啦！
柴仔話自己去跑步喇。
心慌慌，拿拿林寫悔過書，拿拿林刷牙洗面沖涼洗頭。
等柴柴跑完步再搵我約。
約去大圍等，一定唔可以遲到，好緊張。
明知實早到都去左先，嘻嘻。
去左第一城，一個導航員，一個車手。
嘻，我鬼有方向感咩，要我睇地圖勿都係盲中中。
下一站馬鞍山。
其實柴仔預左同我一齊冇行得咁多，所以冇預到密麻麻。
唔同既，有我陪住，指指點點，傾下計，好 d 既。
行去海邊個公園，係好舒服。
新界始終同九龍唔同。
見人地有露台，你又古靈精怪。
係喇，露台晾衫好嘛。
打機毒又發作，無啦啦創招飛"牆"快感。
嘩，好殘忍呀！
[更正：原來飛"牆"快感，唔係黎自打機，係黎自星矢架！]
教仔
lunch 講教仔。
超兒話如果佢有小朋友，會唔俾佢地睇翡翠台同本港台。
意思係淨係可以接觸英文。
我見人地英文講到 lak lak 聲，係覺得佢幾叻既。
但係我又覺得，一個中國人、香港人，唔識睇、寫中文，講句中文都唔正既話，實在太唔像樣喇。
平衡 d 好。
Unlucky Draw
公司要每個 Department 搵人做代表去走火警。
我個 Department 得三個人。
駝駝提議差包剪dup，我地 d 做細既梗奉陪架。
問好廣東話點講就開始。
結果...呵呵...駝駝一個回合就輸左。
佢仲要覆人 email 話，"because I lost the game, I will..."
人地唔知佢講乜，問返我乜事，哈。
由腳到頭
今日收到封信喇。
免得人地問我內容而要我支吾以對，索性唔拆。
仲可以大大聲，拿埋封信出黎話「未拆，唔知喎。」。
下午過 Head Office，終於有機會補鞋喇。
拿俾人補既時候，突然覺得有 d 核突。
個爭蝕到好入喇，鞋尖又花花咁，做乜唔買過對呢？
我確實有諗過架，都去睇過架喇，係冇買到之嘛。
補埋今次，買過買過...不過我上次好似都係咁講。
搞完對腳，去尖沙咀搞個頭。
去開加連威老道果間 Hair Advance，今次都去返果度。
洗剪吹焗負離子，計埋折頭都要五百大元。
仲要覺得唔係咁好睇，剪完好唔高興囉。
(後註@6月5日：我而家同人講我三個月前負離子左，冇人信囉。)
向世界出發
睇 d 向世界出發既預告片。
太多太多哭哭啼啼。
為流淚而講"感人"故事。
感覺好戲子。
覆診
我今日真係乖乖走去杜偉雄度覆診。
有乜所謂丫，橫掂唔使錢(嘻嘻)，而且我諗 d 抗生素都未完一個療程啦。
去到睇，問我仲有乜野唔舒服，我話冇乜。
係咁意照下喉嚨，又問下仲有冇痛，我又話冇乜。
犀利喇，個杜偉雄話「咁你黎做乜？」
嘩，咁都得！？
我黎覆診囉！
你做醫生唔知開過 d 乜藥俾人既咩！？
又話 d 病人唔食哂一個療程，呢 d 醫生開藥都唔開哂一個療程啦。
人地返黎覆診仲咁既態度，過份。
星期六工作天
今日柴仔做左懶豬，冇去跑步。
因為尋晚玩到兩點先走，今日好支力喎。
我要返工咋，唔係我實跑~
(嘻嘻...奸笑...)
雖然佢唔跑步，但都唔見得佢今日好優遊。
佢自己一個跑左大埔、太和、馬鞍山同九龍灣，過五關斬六將咁，都好辛苦。
好可惜我陪唔到佢。
放工約佢去旺角。
我講得唔清唔楚囉，諗住叫佢坐下先，咁上下時間先出發去旺角，但誤會左係我會先去搵佢再一齊出旺角。
我覺得好罪惡呀！
見個面，食個河粉，佢都真係累喇，食完就搭小巴走，我就搭地鐵返屋企。
下次要帶埋愛心亞嬋出動，咁就冇咁支力啦！
38.5
睜開眼睛已經 feel 到唔係好妥。
都要起身架。
落床果下暈陀陀，"欄"入廁所搵支探熱針。
探到係 38.5 度，安心去訓過。
衰就衰在下星期一 "痾跌"，但我仲未整好哂 d 野。
send SMS 同駱駱講我掉假，聽日返囉。
亞媽同我睇醫生，又走左去睇杜偉雄。
佢話我喉嚨好腫，俾左兩日抗生素我，叫我返去覆診。
本來今晚去個大學同學屋企拜年既，去唔到啦。
派柴仔去打劫先，嘻嘻。
低潮期
一個月一次好難過既關。
人地嫌少，我俾唔得多。
可以點？
好名
今日同同事食 lunch，有個話佢識左個朋友，果個人介紹自己既時候咁講：
「我姓張，英文名叫亞 Hill，你可以叫我 Hill 張。」
Hill 張...個名好得。
跟住有個同事話佢識得人姓"滴"，個名好靚既。
等佢開估，叫亞朗喎。
巴斯即刻話，「仲以為叫亞露 tim。」
@@"
廣播劇
今晚都向公司開夜車。
我果邊 office d 人都走哂喇，亞臣用公司電話打過黎，問候我兩句。
講講下佢話俾佢 mobile 既歌我聽，搞搞下變左俾廣播劇我聽。
放低電話，開左 speaker，感覺真係聽緊收音機咁，好得意。
一技之長
夜晚食飯，同事突然問我識唔識彈琴。
我好自然咁答唔識。
跟住佢問咁我識 d 乜。
我停左。
唔...係啦...我識 d 乜呢？
音樂唔得，運動唔得，又唔好聽歌睇明星，冇迷卡通人物...
諗唔到...點算...
太陽計劃
太陽出黎喇！
終於可以開始太陽計劃喇！
計埋見到太陽，今日有 3 件好彩既事發生向柴仔身上。
冇預過位就放好本簿啦，同埋揀岩支好 fit 既筆囉。
搞搞下突然諗起條幾何問題，一定要解決。
估唔到你中學既野都未俾返哂亞 Sir，仲記得 ASA。
有心肝既柴柴，預左今晚補返果晚果餐。
佢計劃帶我去食元氣或者 Pizza Hut 架！
兩樣我都好想食。
但我冇帶張折咭，食元氣又好似好唔抵。
咁揀 Pizza Hut 啦，點知裝修喎。
唉，點解咁架。
結果去食酒店式地道野，下次再補過囉。
同桌既夫婦，傾緊佢地一 d 家事。
我已經努力去唔聽，同扮唔係聽緊架喇，但都俾個女人察覺到。
仲同佢個男人講，「唔好向度講啦」。
真係唔好意思。
打錯
收到柴柴既電話。
但佢話打錯。
話本來係要打俾爸爸既，但手就按左我既電話。
真係咁掛住我！？
今晚亞 Sir 請食飯
今日調新位。
人人都好羨慕我個新位，因為只有我睇到人做乜，冇人睇到我做乜。
(office 係超開放式，排排坐，冇 partition。)
搬搬執執，搞到成十點。
亞臣撩駝駝請食飯，難得佢又 ok 喎。
本來亞臣諗住去灣仔得成食架，但駝駝見到係「caa caan teng」就好唔滿意咁，結果去左打邊爐。
唔知係佢不嬲食得淹尖，定係想請我地食好 d 呢？
