平淡
尋晚打機打得夜得滯 (三點呀!)，今日兩個人都訓到死豬咁，進行唔到我地慶祝結婚一週年既 B 計劃。
(B 計劃 = 從回舊地飲個下午茶)
柴仔煮個愛心通心粉，蒸 d 燒賣，食完就要返去同小王子小公主行街喇。
同平時要行街既星期日一樣，一切都一樣。
一週年正日，只得呢份平淡，我都知係尋晚累事囉。
但得你一句"生日快樂"，我真係有少少失望囉...
Labels: 劃火柴, 星期三緊
預祝
預祝我地結婚一週年，揀左食我最愛既元氣 sushi。
柴仔其實唔係好食生野架，佢陪我食囉，佢主要都食熟野。
嘩，赤海蝦最正~
炸多春魚都好好味~
蟹子唔知點解好差...
仲食埋芝士蛋糕！
好豐富呀~
total 14 碟，我飽到食唔落呀~
見到下面碟野送黎，柴仔就有個爛 gag...
「生熟食物點可以放埋一齊架!?」
=.="
Labels: 劃火柴, 星期三緊
黑仔
又到左清假時間。
今日下午開始放假，放到下個星期一先返。
上個星期收到通知有相拿，就今日去拿囉。
崎嶇咯...
- 放工放遲左大半個鐘
- 224X原來平日下午冇車
- 去搭28又岩岩走車
- 搭到28向紅磡又塞車
搞到五點先拿到相走。
去到巴士站又走車...唉...
諗住可以好清閒咁煮餐飯，結果六點半先動到手。
仲要個爐又虧虧地，搞到柴仔返到屋企都未有飯食...唉...
蒜蓉豆鼓蒸排骨 + 炒條菜 + 湯...
個湯...要後上囉...
青紅蘿蔔粟米湯~
Labels: 婚禮攝影, 星期三緊, 煮飯仔
我嫁喇!!
等到今日，我嫁喇。
一早起身就見識到暴龍既威力：-
我都係岩岩刷完牙敷 mask，暴龍表妹同亞姨都未起身。
燈塔表妹呢個時候已經到左酒店。
酒店保安打電話黎，話有人到訪，要住客去大堂接人。
我敷住個 mask，唯有叫暴龍表妹起身。
嘩，不得了，佢同 d 酒店職員開火！
bilibalajilijala~~~
終於燈塔表妹入到黎，之後 d guest 都唔使住客接。
希望酒店 d 人冇咀咒我，嘻。
左滕右滕，滕到 MUA 到左，我仲敷住個 mask，唔記得除。:-P
全個房得廁所有大鏡，所以匿向廁所化妝。
都唔係好知出面發生乜事。
姐妹陸續到，陸續化妝 set 頭。
好快就人齊，好快就大軍殺到。
我匿向房，偷聽佢地玩遊戲。
其實遊戲係我諗，d 相都係我預備架。
我真係錫住新郎哥囉~
讚下我 d 姐妹先，我都冇叫佢地預備野，但黎到又會有紅絲帶、宣言紙、宣言筆...
玩完我預備既遊戲，同我講幾句宣言 (有人寫錯新娘子個名囉...)，都準備"交收"架喇，點解無啦啦加插要做掌上壓？
哎呀，新郎哥尋日托完水，肩膞都未復完。
點解呀？點解呀？
原來...新郎哥漏左開門利是向車...暈...
掌上壓係拖時間，等兄弟跑去車拿囉。
攝影師話做咁多年都未見過新郎哥唔記得帶開門利是囉。
成功接到新娘，開始斟茶活動。
終於戴上媽媽送俾我既豬豬頸鍊。
我一路都嚷住媽媽要買豬豬頸鍊俾我，實在好鍾意~
我仲好想可以留俾我個女，一代傳一代...(可能睇電視睇得太多...)
出門喇。
搭住馮小朋友既寶馬，向男家出發！
向馬路上，攝影師向28座係咁指示我地咀咀，係咁咀，係咁咀。
哈哈，劇情需要喎...
新郎哥入門叫「爸爸媽媽，我返黎喇，我帶左老婆仔返黎喇。」
小王子同小公主就一路唔停聲。
辛苦佢地喇，要綑住向騎樓度。
斟完茶，影下相。
收到電話話爸爸唔見左銀包。
噢！
註冊落左爸爸名，改唔到人。
passport...passport...頂得到...ok...過到...
汗"
之後一堆人去 lunch，我留返向男家換衫化妝。
柴仔都留低，飯到既時候餵我食飯~
呀~em~
:-P
發現竟然冇帶 MUA d 首飾。
我最鍾意既冠呀...
MUA 問我係咪真係好想要個冠，我真係好想囉。
佢竟然肯跟埋我去註冊，幫我上冠。
實在太多謝佢喇！
因為跟埋去註冊就算係全日 plan 架喇。
(佢最終係冇收我額外錢架！)
出發去註冊。
路上好辛苦呀！
著住 girdle，好窄好窄既婚紗，坐向度感覺透唔到氣咁。
仲要上去世紀見証個路口好難搵，試左三四次先上到去。
落車先舒一口氣。
上返個冠，好快就行禮喇。
都冇時間夾多次點行，好在上次有綵排。
爸爸帶我行入禮堂，我行得好慢好僈，好好享受呢一刻。
冇加額外錢，都咁岩係鄭家富做我地証婚律師。
好好彩，好抵。
鄭家富講一輪野，到我地宣誓喇。
柴仔先，綵排果陣明明話讀到 d "你" 要望下對方，佢都冇望到。
到我讀。
「我請在場各人見證：我 xxx 願以你 xxx 為我合法丈夫，並許諾從今以後，無論環境順逆，疾病健康，我將永遠愛慕尊重您，終身不渝。」
上次綵排冇讀到，今次黎真既，我又眼淺喇。
:-*
安排28座接 d 親友去酒樓。
我同老公 (<-YEAH!!)同兄弟姐妹向附近影相。
我仲學左o靚模十式！
有美女廚房又有型男廚房。
失左一失預算，尖沙咀去旺角塞車，28座返唔到黎，兄弟姐妹要搭地鐵...
亞江就幫我收姐妹衫爛數。
我同老公坐主花車都塞左好耐至到。
我向車上又係屈住好鬼辛苦。
車程中瞌左陣，醒後佢地話我知，好多人睇花車新娘訓覺囉~
著返件好舒服既褂。
亞媽今朝冇著褂，到酒樓先換。
發覺褂舖將媽媽同奶奶件褂掉轉左入盒，著起上黎一個鬆一個緊至知。
冇乜親戚朋友咁早到，好少斟茶又好少影相。
好快又換返婚紗喇。
MUA 話著白色衫唔好斟茶，所以一切斟茶活動暫停，開席後再斟。
婚紗一路著到開席進場，多 d 時間同人見下，影下相囉。
成日問我睇下有邊 group 到左可以叫佢地上黎影相，但其實我都睇唔到人，個心又數唔到齊唔齊人，哈，遊魂。
心入面知有 d 人未影相既，但都要開席囉。
換過個髮型，經人地個廳出門口。
好搞笑囉，人地壽宴有對新人經過。
聽 d 人睇成長片段，好似冇乜反應。
唔得意咩？
我覺得好得意喎，我睇得好開心架。
出場喇！出場喇！
見到好多朋友，都有好多見唔到，因為個 spotlight 實在太 chang 眼喇！
又要拿住花球，又要 Q 住老公，又要顧條裙，唔係好似我想像咁可以同在場既朋友揮揮手囉。
切假既結婚蛋糕、合巹交杯。
就到我最緊張既環節喇。
好冇用囉，講左兩句就開始喊喇！
講到一舊舊，仲漏左好緊要既野...唔記得多謝我老公呀！！
我記得見到 Toffy 指住柴仔架，而家諗返我諗佢係提我多謝柴仔，但我當時諗佢叫我交咪俾老公囉...
補返先：
多謝爸爸媽媽照顧左我咁多年，而家有人接手喇，佢都會好似你地咁鍚我，對我好好。
多謝老爺奶奶，你地教得個仔好好，賜左我一個好老公。
多謝 Dr Lau，唔係你咁熱心 Sem break 都搞活動俾我地，我都唔會識到柴仔。
多謝姐妹們，今日辛苦佢你喇。
多謝兄弟們，識左你地十年，對我最好都係今日。
多謝在座既賓客，全部我同我老公同埋我地爸爸媽媽最親密既朋友，用呢一晚既時間分享我地既喜悅，為我地送上祝福。
最多謝既，係向我身邊既老公...真係好感激、好感激。
完全因你，因你完全。
:-*
到柴仔講，講得幾好丫，不過佢唔知原來佢冇表明多謝佢爸爸媽媽囉。
呵呵，嬲死呀~
過埋呢關，我又換衫。
我好鍾意呢條漸變色裙。
配一個皇冠仔，好似個公主咁~
暴龍表妹笑我有公主病囉！
巡遊敬酒。
飲杯~~ (兄弟好落力呀~)
成日俾人話唔岩位敬，但個人個腦都真係 function 唔到。
敬到好後先收到係講緊乜...
:-P
敬完酒仲可以檯檯影相，增加靚靚晚裝暴光機會~
仲可以影返席前未到既朋友！
不過好可惜，真係冇時間同到佢地傾下計。
送客喇！
個個都話我隻手凍，其實冇乜感覺。
新娘真係會變身 superwoman 架！
散 lu，返屋企 lu。
爸爸媽媽，我跟佬走喇~ :-P
Sunny 真係唔話得，仲車埋我地返屋企 (佢好似要趕返工架...)
Andy 仲幫我地搬埋野入屋。
今日真係多謝哂 d 兄弟姐妹~
大 show 做完咯，由明星變返一個普通女人。
沖完涼洗完頭，我問老公有冇覺得貨不對辦。
佢話...今日同佢一齊果個唔知係邊個...
哈哈！
Labels: 出門酒店, 婚姻註冊, 婚宴, 婚宴紅酒, 婚宴請帖, 婚禮傳統, 婚禮攝影, 婚紗禮服, 新娘化妝, 星期三緊, 結婚戒指, 花球
行大運
今日要四出拿明天用既物資。
十一點去拿婚紗晚裝。
一件婚紗、兩件晚裝、一條姐妹裙、蛋糕底裙、手套、小小配飾。
兩大袋野。
搭車返新居。
拿 d 大小相簿油畫、林林嬸嬸野去酒店「開房」。
M01，就係我聽日出嫁既地方。
有一間大房兩間細房兩個廁一個廚房。
好大個窗，好大個海景。
俾柴仔睇多兩睇，嘻，冇佢份享用嘛。
碌返出旺角拿褂。
三套褂、送紅睡衣同紅傘。
放低媽媽個套俾亞姨。
又趕住去開茶會。
初初諗如果佢十月十日開，我地去唔到都冇人幫我地去得到。
結果係今日五點，哈。
有人叫我地唔好去既，冇乜用喎。
但我地少出門嘛，聽下囉。
最後一站係去拿鮮花。
又幾盒野同好難拿既花球。
返酒店養住 d 花，柴仔要返屋企喇。
仲話結婚前一日唔可以見面，咁多野預備，唔見點搞得掂呀。
我去大快活同姐食晚飯。
係囉，點解今晚食大快活既？
由於覺得酒店個廁所沖涼唔係好自在，我返左新居沖涼。
媽媽忙住煮湯丸，係我至愛既糖心湯丸呀！
已經好耐好耐冇食過喇！
辛苦哂！
眾人睇完電視就開始上頭。
已經教左爸爸點講，結果都係唔記得四梳。
一梳梳到尾
二梳梳到白髮齊眉
三梳梳到兒孫滿地
四梳梳到四條銀筍盡標齊 (唔記得左)
真係烏龍~
今晚有暴龍表妹(我既伴娘)同亞姨留向酒店。
人人都話之前一晚會訓唔著，兩三點仲諗緊 rundown。
我唔係囉。
一早就想訓，係暴龍表妹捉住我同我油指甲。
哈哈，多謝哂。
今日都做左樣其他新娘子話佢地經常發生既事。
唔想俾柴仔知，但唔知點解佢都知道左。
好傻~
聽日就嫁喇。
:-*
Labels: 出門酒店, 婚禮傳統, 婚紗禮服, 星期三緊, 花球
悠長假期
今日展開我既悠長假期喇！
第一個節目就係未來女婿仔同爸媽飲早茶。
爸爸成日話我唔請佢飲茶(其實請過幾次食其他野啦！)，今日點都唔會唔計喇掛！
跟住走去辦銀行業務。
一早約左話拿十萬yen，又唔講有 limit，結果拿得七萬五。
入埋紅酒條尾數，換埋 d 散紙，銀行業務辦理完畢。
俾柴仔睇報紙見到今日 Giordano 開倉。
為左添置 d 衫去旅行，我地都去左行下。
第一日開倉，又係平日，d 貨仲好整齊，d sales 仲好好禮貌兼會介紹產品。
係咁二行左個圈，買左百五蚊野，有十對襪、兩件衫同一條頸巾，抵！
趕去下一站 -- 去拿主花車裝飾。
唔重，但大大件囉。
靠柴仔拿返屋企，我就去做 facial。
今次有兩個人 serve 我。
但我覺得好似俾人當公仔咁武，唔係咁自在。
換左人，始終感覺唔係咁好。
仲 sell 我話 join 新 plan 有 discount...我堅持唔 join 囉。
搞左幾個鐘，柴仔打俾我話我做乜好似人間蒸發左咁...hehe...
趕返屋企，reply 返註冊場地 d 細節。
最重要既係......rundown d 附屬品出爐喇！
希望兄弟姐妹仲睇得切啦~
唉...燈塔表妹話我知 d 姐妹裙仲係拿唔到...
佢幫我搞全部唔要，全單退錢。
好在個個都有現成姐妹裙頂住。
唔係好唔開心既，煩囉。
Labels: 婚姻註冊, 婚宴紅酒, 婚紗禮服, 星期三緊, 美容
LSWD
今日 d 同事問我係咪 last day。
經更正後，話我今日係 last single working day。
哈哈，係呀，返埋今日就開始我既悠長假期喇！
lunch 同我食左餐好既，我仲走左去買西餅俾佢地做下午茶。
由於最後一日有 printer 用，把握時間決定埋婚宴個座位表。
係咁同柴仔 email 黎 email 去。
搞完個座位表先做埋公司 d 手尾，其實我唔做同事都可以做到既，但費事要人執手尾啦。
九點幾先走呀，計唔計 OT 好呢？
收到 Miffy 話姐妹衫有問題，等左成個鐘都拿唔到。
舖面又有好多人都係等緊，仲話有人報警。
佢話聽日再去過。
em...我都係唔好諗咁多喇...
Labels: 婚宴, 婚紗禮服, 工場 H, 星期三緊
決定
今晚突然發現，決定左嫁俾一個男人之後，隨之而黎既係一大堆大大小小既決定。
大至擇日、註冊地方、婚宴地方，小至邊間租衫、租邊件衫、邊套首飾襯邊套衫......
頭都爆！
好在有有主見既柴柴~
:-*
Labels: 星期三緊, 點滴生活
oh~ 芭瑪
今朝收到柴仔傳來既消息，話有個風黎緊！
都係頭一次唔想打風。
未雨就要綢繆下。
續家續戶打去問如果打風會點安排...
酒樓、攝影、化妝、車、衫、註冊、紅酒、花球...
結果係 - the show must go on，係冇得註冊囉。
touchwood touchwood~~
Labels: 婚姻註冊, 婚宴, 婚宴紅酒, 婚禮攝影, 婚紗禮服, 新娘化妝, 星期三緊, 花球
國慶六十週年購物日
又做衰女，收到 morning call 後又返訓。
出得門口既時候，柴仔已經開始左第一輪購物...買左個鬚刨。
諗住國慶大減價，點知仲貴過之前睇既！
不過冇辦法，都要買。
買左個26寸喼。
其實冇概念要幾大個、幾多個喼至夠。
買住一個先，再諗。
買左個腰包仔袋證件同錢。
想買個背包但冇貨...
今日都未買夠野，下次繼續。
夜晚砌 rundown。
係，仲有九日...
終於搞掂左！
寄左一個 copy 俾婚攝。
但係未寄得俾兄弟姐妹，因為仲有 d 物資表未搞掂。
星期六啦，有架喇~
==========
我又發埋 d 好恐怖既夢：
著住婚紗，到左男家樓下，發覺我未化妝未 set 頭！
call 化妝師，佢話唔記得左黎，問我地址向邊，即刻飛的黎。
我鬧佢話知唔知化妝對新娘幾重要，不過同時個心又諗自己尋日做乜唔打俾佢 confirm。
記住記住，一定要之前 confirm 過哂 d 人/野~
Labels: 星期三緊, 蜜月
三個女人一個墟
約左 ESDlife d 人食 lunch，順便領取物資。
又係一個好人囉，幫一眾姐妹返大陸辦平貨。
三個女人，傾到停唔到。
要返工咋，唔係食多個 tea 都得。
臨走時其中一個講，「下一次見面已經係人妻喇~」。
哇哈哈...係係...
夜晚去酒樓試 CD DVD。
有隻播相既唔得囉，其他都 ok。
要再製作過，辛苦柴仔~ :-P
行過 d 街都未覺得有大減價，咁點購物呀！？
Labels: 婚宴, 星期三緊
柴的電腦
今日行程緊湊。
先去買褂鞋。
呢個項目我冇乜要求，去返旺角樓梯底好出名果間度買。
呢間野都幾犀利喎，我諗有蒲 ESDlife 既人都會識。
真係好快，十五分鐘都唔知有冇就走得。
下一站去 Trinice 揀花。
上到去佢有再介紹架，不過免得花多眼亂，要返之前自己揀好果 d 款。
花球
俾四大長老既襟花
俾家姐姐夫哥哥同佢女友既襟花
俾兄弟姐妹既襟花手花
彷彿係一系列咁架，因為個個都有 d 白色小花！
約左亞生拿茶具。
佢實在太好人喇！
幫我向大陸買茶具，有平貨之餘，我仲可以慳返 d 車錢。
再下一站就係黃金。
今次到買柴仔既電腦。
不過佢唔好彩，個 case 向平果間冇貨，要去第間買貴 15 蚊，LCD 又冇左 惠康 coupon 送。
大袋細袋返新居砌機。
又遇到困難喇！
SATA 頂住個火牛，搞好耐加夾粗黎先整到。
柴仔仲整到流血都唔知，我見到個機有血，佢先發現原來係佢流緊......
夜晚仲要招呼 E 記既朋友仔黎參觀。
呢班野唔賭唔舒服，不過我乜都冇，得好益智既 UNO。
哈哈，所以都冇坐好耐就散 lu~
好充實呀~
Labels: 一片瓦, 婚紗禮服, 工場 E, 星期三緊, 花球
綵排
仲有一個月咋！
有意冇意揀左今日去做註冊綵排。
聽下點企、點行、幾時做咩。
有俾埋誓詞試讀，教下咩位稍為停一停，咩位望下對方。
個姐姐話，可以唔讀，留返正式果日先讀。
咁我梗係唔讀啦，不過柴仔有讀，只係換左 d 假名囉。
好快好快就綵排完喇。
食飯前去左揀禮物俾 Eric 個仔。
細路仔禮物真係好難揀架。
又怕好快唔岩玩，又怕仲未識玩。
兩個大唔透向玩具反斗城 BB 玩具部左兜右兜。
結果買左相中既波波同一個有聲既鎚仔。
d 波波似係玩佢老豆多 d 囉...個仔擲，老豆拾...哇哈哈！
Labels: 劃火柴, 婚姻註冊, 星期三緊
縱橫遊
去聽旅遊講座，落埋搭 tim 呀！
十月十四至十月十八！
未出發先興奮呀！
Labels: 星期三緊, 蜜月
炸彈女
我都開始炸人喇！
Labels: 婚宴請帖, 星期三緊
炸彈男
柴仔展開首輪轟炸喇！
Labels: 婚宴請帖, 星期三緊
擬結婚通知書
今日請左假，去律師樓搞擬結婚通知書。
地址係永隆銀行大廈十x樓，但兩條盲丙就走錯左入永隆銀行搞搞震。
上到去俾個 reception 姐姐嚇一嚇，差 d 要打俾爸爸問我姓乜。
柴仔要簽好多個名架，我簽得兩個。
話要簽返到時簽結婚證書個名，好緊張，慢慢寫~
走之前問清楚會幾時貼向婚姻註冊處，要去影相嘛！
叮叮過灣仔。
諗住貫徹我地睇展覽既行程，吃麥當當。
已經坐低左架喇，但柴柴諗起夜晚都會食，所以走囉。
求其食間茶餐廳。
入電腦展。
初初好少人，午飯時間過後就好多喇！
個場仲好大好大，以我地掂行掂過既方式咁行，都要行成四個鐘。
可惜冇心水既野賣，有 d 又唔知係咪真係抵，只係係咪都要買 d 野，所以買左張 16G SD card。
入落相機，見到可以影二千幾張相，影兩個幾鐘頭高清片，嘩，好開心呀~
離開電腦展，行返地鐵站果邊。
上電腦城睇下要唔要 dump 心。
得一間舖頭有得賣，唔使 dump 囉，但要睇返黃金旺電先至真係比較到。
搭船過尖沙咀。
影左 d 相，我覺得好靚呀！
諗住去惠康買 pizza 食，但原來惠康執左。
今日既"展覽一條龍"，唔係好得。
去玩具反斗城想買之前睇中左既禮物俾 johnstonbaby，但得返一盒殘舊既。
任務又失敗。
我仲要好趕好趕咁食麥當當(結果勿又係食麥當當)，然後卜去"卒"背。
柴柴就要向麥當當發毛。
夜晚返到屋企要趕製 label。
因為柴柴星期日就會發動首輪轟炸喇！
Labels: 劃火柴, 婚姻註冊, 星期三緊
Exing
今晚同 d 姐妹去 Exing 揀裙款。
我冇特別要求，淺色短裙就得架喇。
結果揀左以下幾款：
係 d 腰帶會唔同色，因為個個姐妹各有心水。
粉紅、綠、紫...幾好幾好！
Labels: 婚紗禮服, 星期三緊
過大禮
今日過大禮喇！
程序真係超級搞笑！
柴仔叫醒我，話同哥哥十二點左右出到黎。
到再 call 我，我叫佢地先到餐廳搵位。
我同亞媽跟住到！
哈哈，係呀，係一齊食飯呀，搞笑呢！
食完飯，亞媽先返屋企等，我同佢地去買果籃。
因為亞媽話唔搞過大禮 d 野，但又唔好兩手空空唔好睇，所以要買兩個果籃，收一個回一個。
帶住佢地到我上星期踩左線既生果店，要兩個果籃，講明係過大禮用既。
有兩個人執，我見到有個搬 d 梨黎，我就上前話唔要梨，佢仲話冇所謂，係另外執果個都話唔要。
梗係啦，過大禮用點可以有梨，勿分梨分梨，唔得！
搞掂，果籃靚靚，原來都好重架。
拿住兩大個果籃，向屋企出發！
到左樓下大堂，我先返上屋企，柴柴就同哥哥交代有乜要俾我地。
睇住閉路電視，到喇到喇，即刻匿入房！
開住條門 lar，聽下外面講乜。
笨左啦，早知 set 個相機錄起佢！
亞媽問乜柴柴冇上樓？
柴哥哥話佢唔上得黎嘛！
哈，亞媽都冇我地咁好氣~嘻嘻~
亞媽收哂 d 野，入房睇下再封利是。
我都裝下封禮金，但亞媽話唔睇得。
亞媽出返去，交幾封利是俾柴哥哥。
有外交大利是，回大禮大利是同女婿銀包皮帶衭大利是。
呢個時候我鬼鬼祟祟咁拿封禮金睇，嘻嘻。
但心驚驚俾亞媽撞破，所以都冇數。
柴哥哥走喇，我出返廳，媽媽返房，發現我移動過封禮金，哇哈哈！
儀式完畢，我落去會合返柴柴同柴哥哥。
果籃好重嘛，一齊返柴家先囉。
我話過完大禮，即刻接左個新娘返屋企。
咁既程序，係咪真係超搞笑先！
外交大使任務完成
夜晚返新居，玩煮飯仔。
又整豬扒，柴仔好似一定要整到美味豬扒為止。
哈，仲要食幾多餐豬扒呢？
兩餸一湯白飯一碗，唔怪得 d 人結左婚之後實肥啦！
平時一家人食飯，邊會食咁多餸呀~
Labels: 劃火柴, 婚禮傳統, 星期三緊, 煮飯仔
立山黑部
我地既目標 - 立山黑部！
Labels: 星期三緊, 蜜月
//
30/7/10 14:22