六
跑步跑步跑步，無偷懶。
跑完落落地雨咁，留返向條村度行下囉。
經過慈善站，貪得意玩下 d 食票機，噫，點解向呢格出既！？
之前已經對過冇我份架喇喎，貪得意玩下個機咋喎！
究竟係我睇錯，定佢 system 錯？
點都好，我以後都唔會就咁掉張票，點都搏一搏。
去吉之島，行過男裝部，睇到 d 皮帶。
柴柴用開果條就黎爛喇，之前睇過 d 都唔岩。
今次見到佢就話買黎"用住先"。
唉，點會係"用住先"丫，第一日識你咩。
唔...講到愛心亞嬋會上癮。
我話死喇，咁我勿有排捱！？
要制下你至得喇！
你反而話可以利用呢點做金剛箍。
噫，又係喎。
咪住，咁你勿好著數？
行到咁上下，返屋企訓下。
我發左個好得意既夢。
今朝講左今晚打邊爐架嘛，咁向個夢入面，我見到你地叫我起身去食飯，我仲話「乜唔係打邊爐咩？」，幾真實呀。
訓醒後，又係咁喇，眼痕、咳咳地、流鼻水，乜野敏感症狀都出哂黎，好似癮起咁。
係環境污染嚴重左丫，定係我身體差左呢？
臨走前向商場兜幾個圈，講下近排既電視劇。
有一幕係 d 男人向條窄長鐵滑梯度傾計。
我見到果條滑梯好想玩呀，係好刺激果款黎架。
雖然我係鍾意玩千秋多 d 既，坐同企都打到，幾叻架。
不過而家 d 遊樂場都唔興擺呢 d 既，好少有得玩咯。
套劇集仲有講一個數口好盡既男人，佢女朋友揀識左 1444 小時既人都唔揀識左 17652 小時既佢。
我真係走去計下即係幾耐。
柴仔話喎，好唔真實。
咁忙，邊得閒記得咁清楚，邊有閒情去吸氧喎。
套餐
尋晚柴柴同我講左一 d 人地對佢未來既睇法。
我聽左之後好唔安樂。
臨訓時仲越諗越驚，真係唔開心到喊左出黎。
係咪可以話好既就信，唔好既就唔信？
但你都會相信佢背後既推論方法，咁信定唔信？
特訓
特登早少少去，但好似唔係好夠訓，有 d 頭痛。
同佢地兩個行街。
如果我係小王子，我實諗係咪有 d 乜野得罪左呢個米飯班主，搞到好似行又唔得，唔行又唔得咁。
成四十歲先教人出街要跟住，要聽話，教唔教得聽呀？
辛苦死佢地喇 (包括柴仔)。
城市姑娘鄉村遊
收到信可以去領獎。
但信既內容冇提到係乜野獎品，好神秘呀。
慳返 d，冇搭小巴，行上去。
途中遇到個小學同學，佢岩岩去完拿章程，以為我都係咁既目的，叫我慢行。
行到身水身汗，心諗如果係廿蚊商務書券就...唉...
好在，係一份唔差既獎品，仲有一個獎座。
柴仔...多謝你呀！
唔係你褪出左，幾時輪到我丫...呵呵...
帶住 d 獎品去搵柴仔。
搭住架巴士，我都有諗下會唔會見到你向路上。
我就見你唔到，你就見到我架車，仲追車添，幾傻佬呀。
你話要幫爸爸買魚杆，一路都唔覺果度有賣呢 d 野既舖頭。
突然轉入快圖美，百思不得其解。
下，原來係向快圖美買魚杆！？咁唔夾既！
今日著果件衫好耐冇著過，冇心肝既柴仔就梗係唔記得啦，仲問我係咪新衫。
讀 U 果陣已經有呢件衫啦，仲俾佢地話村姑添。
一講村姑就記得，哎呀，激死我喇！
係呀，今日入 d 鄉村地方勿著返 d 村姑衫襯返囉。
仲要去豬欄試下餵豬添。
唔試都唔知而家 d 豬鍾意食粉雷雷燒賣，哇哈哈。
見到有外國版《無間道》，唔知好唔好睇呢？
會唔會係"3 years, 3 years and 3 years, 10 years coming"呢？
行完街，返屋企。
小王子訓左向門口，柴仔向門外伸手入去摸佢。
隻蠢豬一 d 都唔郁，醒都唔醒，任人摸咁，係小公主發現左柴仔，佢先至醒。
唔...仲話要佢看門口喎，實俾人綁大閘蟹啦！哈哈！
年結
22/9/2004 - 22/9/2006
共寫 396 個點子
你既 comments 都有成 159 篇喎！
應戰
今日係駱駱渡蜜月兼影結婚相之前既最一個工作日。
佢個大假放到 10 月 4 日！
得返我一個人一腳踼...慘慘
叫做有餐壽司大餐慰勞下囉...
送舊
屋企既野越來越多，又係時候送舊。
今次既犧牲品大部份係中五既補習 Notes，英、數、Physics、Chemistry 都有。
之前都有掉過，係中七既 Notes。
點解上次係掉中七既，唔掉左中五果 d 先？
因為上次根本都唔知仲有中五既 Notes 向度，嘻嘻。
睇下 d Notes，L. Woo？ H.L. Chan？
邊個黎架？都冇印象既！
d Notes 乾乾淨淨咁，果陣點上堂架？
罪過...罪過...
去？唔去？
天氣唔係咁穩定，又冇講到話如果落雨既話去唔去，加上懶...所以今朝留左向張床度。
send 個 SMS 俾柴仔問佢跑唔跑。
柴仔收到後打電話黎，教訓左我一頓，我即刻起身碌去。
做錯事添...
唔學之前跑到盡頭行返轉頭，今次跑到一半就跑返轉頭。
趕時間嘛！下午仲有好多節目呀！
同事介紹尖沙咀有 Bazaar，今個下午專登出去睇下。
出尖沙咀既車，冇出旺角既車咁熱，仲有少少凍。
傾左陣計我又呼呼大睡。
向柴仔細心安排之下，訓到總站先落車。
靠個地址去搵，都搵左好一陣子先搵到部 lift 上去。
唔係好平，又唔係好岩心水，冇收穫。
下一個節目係公事：探訪尖沙咀分行。
得條街名，冇記到地址。
咪話我盲中中呀，我知條街唔長，實搵到既。
行過貝貝，入去睇下衫。
睇中左條裙，都幾鍾意架，但係冇 size 囉。
之前睇過又冇買到...錯過左咯...
OT 的咀咒
同事向我落左個"OT 的咀咒"......
內容係要我 7:14:59 打咭放工......
好毒...
911
今晚明珠台做一個九一一既紀錄節目，我又坐定定睇電視。
我記得當年話有飛機撞埋世貿，電視一路直播。
我覺得好奇怪，點解 d 新聞可以影住架飛機撞埋去。
後來至知果架已經係第二架。
雖然第朝要返 8:30 堂，但我都睇到好夜。
呢套片入面，有幾個場面比較有印象：
有隊消防隊，一路撤退既時候遇上一個行動不便既婦人。
話事人憑住佢既良心，決定幫婦人一把，帶埋佢走。
整隊既逃生速度，就此慢左落黎。
亦係咁樣慢一慢，當大樓倒塌既時候，佢地剛剛向一個較安全既層數。
唔...人生就係咁樣一個 package，你以為求個婦人會阻慢逃生咩？
但就正正係咁樣慢一慢，先不至於埋到最底層。
好奇妙。
有個男人打俾佢太太，但線路一直繁忙。
之後佢試打一個差一個數字既號碼，接通左，個男人就叫個接線人幫佢打電話俾佢太太。
初初個接線人係"睬你都傻"既態度，但當佢知道個男人身在世貿時，態度即刻變左，好樂意幫忙。
好多好多既 Last word，內容既變化並唔多，但都聽得人好心痛。
諗起近日聽，覺得 d 詞好好既歌：
------------------------------
愛得太遲
歌手：古巨基 | 作曲：楊鎮邦@宇宙大爆炸
填詞：林夕 | 編曲：雷頌德
我過去 那死黨 早晚共對
各也紮職以後 沒法暢聚
而終於相約到 但無言共對 疏淡如水
日夜做 見爸爸 剛好想呻
卻霎眼 看出他 多了皺紋
而他的蒼老感 是從來未覺 太內疚擔心
最心痛是 愛是太遲
有些心意 不可等某個日子
盲目地發奮 忙忙忙其實自私
夢中也習慣 有壓力要我得志
最可怕是 愛需要及時
只差一秒 心聲都已變歷史
忙極亦放肆 見我愛見的相知
要抱要吻要怎麼也好
偏要推說等下一次
我也覺 我體質 彷似下降
看了症得到是 別要太忙
而影碟 都掃光 但從來未看 因有事趕
日夜做 儲的錢 都應該夠
到聖誕 正好講 跟我白頭
誰知她開了口 未能挨下去 已恨我很久
錯失太易 愛得太遲
我怎想到 她忍不到那日子
盲目地發奮 忙忙忙從來未知
幸福會掠過 再也沒法說鍾意
愛一個字 也需要及時
只差一秒 心聲都已變歷史
為何未放肆 見我愛見的相知
要抱要吻要怎麼也好
不要相信一切有下次
相擁我所愛又花幾多秒 這幾秒
能夠做到又有多少
未算少 足夠遺憾忘掉
多少抱憾 多少過路人
太懂估計 卻不懂愛錫自身
人人在發奮 想起他朝都興奮
但今晚未過 你要過也很吸引
縱不信運 你不過是人
理想很遠 愛於咫尺卻在等
來日別操心 趁你有能力開心
世界有太多東西發生
不要等到天上俯瞰
------------------------------
睇完呢個紀錄片，都有諗下使唔使向公司添返 d 設備。
好似救命水、走佬鞋咁。
話時話，我好似連邊度係走火樓梯都唔知，弊！
發展養豬業
柴柴為左唔令小王子同小公主失望，今日去約會之前，同左佢地去行街街。
我就懶在家中養豬。
小王子同小公主有你，佢地真係好有福氣呀！
讚我
今日直跑到尾，點解唔讚人喎。
出左一個八星期既約定，我要加油加油！
(唔使諗，唔係八星期減八磅，已經咁柴，再減，仲有既？)
衰仔腳痕痕，係要踢條柱又唔收腳，痛死喇！
唔...一個奇奇怪怪既要求，你都接受，好感激你呀！
如果你下次問我有冇，我一定會答你唔可以冇，嘻嘻！
我地好好彩呀，朝早冇落雨，有得跑。
小王子同小公主就冇咁好彩喇，下午落雨囉。
柴仔明天有約會，諗住今日同佢地去左街先既，去唔成咯！
落街食餐正正魚旦河，魚皮，菜同豆漿，回家來個午睡。
(朝早減左既連本帶利返哂黎！)
我既鼻敏感有 d 料到，好麻煩呀。
神秘星人
同事去土瓜灣捉雀仔，我痴車坐，諗住去到再轉車出旺角。
點知遇著架烈火戰車，嚇餐飽。
架電單車唔知做乜鬼，時左時右，的士大哥俾佢整慶左，同佢"鏈"過。
唉，皮包骨就唔好咁撩人啦。
唉，駕搵食車又有客就唔好咁勇啦。
Cheese 仲話要拍低佢，丫呀，咪鬼火上加油啦。
幾擔心冇命出到旺角呀，約左柴仔架嘛。
同佢去拿西裝，跟住去買件恤衫。
件恤衫係上次唔岩 size 叫人有貨就 call back 既。
又話價錢唔會變，結果都係跟返新價，呃人既。
不過柴仔冇講數，照買囉。
走去書局，柴仔話要俾 d 野我睇喎。
原來佢係神秘星人黎架。
我又睇下啦，以為係，但睇真 d 都唔係既。
我果隻係深造班先會識睇架喇。
-----------------------------------
命硬剋夫，終身難有白頭郎。
紅杏出牆，無兒無女病臥床。
-----------------------------------
大吉利是...
大餐
今晚同同事去左皇家太平洋酒店柏景餐廳食自助大餐。
http://www.royalpacific.com.hk/cn/dining/CafeOnThePark.html有個螺好好食，不過我又唔敢食太多，食左 5 隻左右咋。
有個竹筒湯好好飲，飽到死都飲左兩個。
有好多款甜品，但實在肚窄，試得少少，超級可惜。
唔係話要食到抵，係真係好想樣樣試哂。
食到個肚好凸呀！
詩詩放鬆佢個肚俾我睇，好似有左 5 個月咁架！
些烏屎
好多個星期冇跑喇，今日跑返，連教練都話太耐冇運動，好支力下。
有 d 不幸既事向我地返屋企同再出門口之間發生。
對於生人唔生膽既我，慶幸只係事後至知道。
安息吧。
好眼訓呀，但係要出返九龍同亞媽幫個親戚報團，所以冇得訓覺。
上到巴士，坐最後排，機器令到個位好熱。
我挨住柴仔個膞頭訓，好熱，但好甜，尤其我知道係佢扶住我個碌黎碌去既冬瓜頭。
我諗起以前上堂，我托住個頭恰眼訓，個"爭"會放到好邊，佢就會用手護住我個"爭"，等我唔會中得太難睇，又唔會整親。呵呵。
報完團，亞媽返屋企，我地就行下先。
去買恤衫，其實果個"些烏屎"令我唔高興架。
我明明記得個 size 架嘛，佢既態度講到好似我咁都記錯。
最多只可以話係唔同舖，size 有小小出入，以佢地既 size 會差半寸左右。
唔掂呀！
行行下唔知做乜暈暈地，返到屋企要走去訓下。
掉低柴仔一個睇書打電腦...唔好意思呀...
大師
突然 d approval 拿得咁快，今日已經有個大師上黎睇風水。
兩個人，好似一師一徒咁既，睇風水，仲包捉X (主打) 同睇相。
佢睇我相，講左好多野。
- 眼神太現，戴返個眼鏡好 d
- 留長、微"戀"頭髮，做事會順 d
- 留意身體，要做檢查，小心婦科病
- 會有自己公司
- 出黎社會做事，唔好咁直
- 做事三分靠實力
- 冇宗教信仰就唔好諗要信乜
- 唔好著條子衫，淨色粉紅粉紫比較有利
- 有野要講俾另一半知，唔講佢唔會知
唔...係記得咁多喇，有 d 都 ok 既。
佢睇到有個同事好唔妥，叫左個同事寫個屋企地址向張紙度摺埋俾佢。
佢冇打開到，捽捽下好似感應緊咁，之後就講左好多幾嚇人既野。
睇完相就睇下四周圍，我跟住佢睇下搞乜，見到佢捉X囉。
睇又好似唔係好驚喎，夜晚先知味道。
佢搞完一輪，同事都話 office 同 toilet 都光猛左，唔知心理定真呢？
佢走左之後，有關同事即刻走去買所需物品 (紅地氈，八卦鏡)，並依照指示擺放。
都唔知幾時變得咁有效率。
