神乎奇技
下雨，唔使跑步，呵呵。
買六合彩，做左件錯事啦。
事情係咁既，我話買一張六合彩，個職員聽錯左，俾左兩張我。
我好反射式咁話「我要一張咋」，咁個職員就收返一張。
離開果陣先至諗，哎呀，我應該要埋，可能呢個就係個天賜俾我既機會。
冇啦，冇左喇。
搭車出九龍，柴柴用佢僅餘既地埋知識，講解山前山後雨勢差異問題。
兩個笨笨，見超市煎茶大減價，好平好平有四支，就買左四支走。
即時飲一支，仲要拿住三支四圍走。
一向懶得拾袋既柴柴，我可以肯定佢會將果三支野放入袋，黎緊三個星期都隨時有野飲。
晚飯向麥當當搞掂。
食完無聊搵 d 廢物玩玩。
見圖
photo @ McDonDon
在雨中
今日又唔生性，搭遲左班車，又遇岩塞車，結果要打的。
落住好大好大既雨。
的士向東廊度飛馳。
d 雨狠狠咁打落個擋風玻璃度，望出去白濛濛咁。
(前面架車係睇唔到既，得小小車尾紅燈睇到。)
唔知點解有一刻我覺得我係去緊機場。
仲有種好失落、好寂寞既感覺。
...肯定係未訓醒...
六月生日會
中學同學今天聚在一起。
題目係六月生日會。
過期既 (1/6) 未到既 (7/7) ，都係主角。
亞飯帶左個好特別既消息黎：
佢同男友會去澳洲流浪一年。
驚訝、佩服、羨慕、擔心...百感交集。
咁瀟灑，我就做唔到喇。
握到 握不到
早兩日媽媽跟亞姨去澳門。
由於亞姨行動唔係好方便，出入都多用的士。
媽媽講佢地兩次搭的士過橋來回乙水仔同澳門既情形。
一次，司機知道只係過橋，面黑黑，問多句都唔睬咁。
一次，同樣係過橋，司機問想用邊條橋過。
媽媽同亞姨點識丫，司機就問係咪黎旅遊，不如兜佢地周圍睇下好唔好。
結果一個司機賺得 dd，一個賺多好多。
機會在，也要人去把握。
豬豬餐牌
同柴仔去食野，已經諗左要食韭菜豬雜湯 (唔知係咪咁叫)。
佢望住個餐牌，好疑惑。
個餐牌咁寫：
韭菜
豬豬
紅腸
什麼韭菜、豬豬、紅腸？
我話：「你就豬豬，係韭菜、豬紅、豬腸呀！」
哇哈哈...
雪糕
難得一日端午節假期，待在家中。
見老豆鑽牆，幫手拿吸塵機囉。
點知個鑽唔岩使，鑽極都鑽唔到，咁我收工，收返埋個機啦。
轉頭佢走去問人借另一個鑽，人地仲肯幫佢鑽埋，咁我又要搬返個吸塵機出黎囉。
大熱天時，搞到身水身汗，我話要食雪糕補數。
估唔到向來唔鼓勵食雪糕飲汽水既老豆，真係走左去麥當當買左兩杯雪糕返黎。
雖然我屋企好近麥當當，但天氣太熱，雪糕都溶得好緊要。
見佢論論盡盡咁拿住兩杯係咁滴落地既雪糕返黎，真係好好笑。
諗起人地以為佢買雪糕俾細路，但原來係買俾佢果個成三十歲既女，仲好笑。
感光電筒
聽日放假，我提醒柴仔唔好矇查查走左去返工。
不過佢話似係會發生向我身上多 d 喎。
em...
我用手提電話做鬧鐘嘛，教左星期一至五響。
如果為聽日放假而暫停星期二響既話，咁好可能唔記得教返，咁下個星期二就弊喇。
柴仔話，咁可以教個鬧鐘向正常時間響之前鬧，等我關左佢，教多個鬧鐘向正常時間響之後鬧，等我著返佢...
=.="...
乜咁似「呢個電筒有光就會著，冇光就絕對唔會著」既 feel 既...
Shopping
哎呀，唔知醒 tim...
雖然我都預左唔跑，但我話會陪柴柴架嘛...
上星期我話好熱，想買裙仔著下。
今日柴柴就拉左我去又一城行街街。
係咪有 d 奇怪點解我地揀又一城，無他既，因為我地有一疊"數唔完"既 coupon 囉。
可借丫，結果都買唔到裙，不過都有收穫，買左頂帽囉。
之前果頂唔疏氣，跑步好焗嘛。
仲有剩 coupon，柴仔係咁二話睇十三瞞徒。
我真係想睇架，不過我十二都未睇，驚有前文，所以都係算啦。
想去飲杯 coffee，但搵唔到位。
返老家又冇野岩食。
來來去去幾轉都未有定案，喝死我喇。
結果向 foodcourt 各自幫襯唔同食店，一拿到杯可樂就係咁啜。
正...
食完飯，走去坐樓梯。
邊睇人溜冰，邊聊聊天。
好舒服。
行刑
今日要帶小王子去打針。
去到柴柴家門，見到柴爸爸同柴柴安撫緊小王子，佢抽筋呀！
知佢見到我會好肉緊，所以我退後左 d。
再聽到柴柴叫我走，唔好俾佢見到我，我又行遠 d。
(嘩，柴柴叫我滾蛋呀，哈哈哈。)
諗諗下費事佢聞到我陣味，走返去搭 lift 果度。
跟住就好似等手術消息咁，左踱右踱。
好在終於都冇事。
係咪剪頭髮掙扎搞到熱得滯呢？
幾傻仔丫，搞到抽筋咁辛苦，仲要變左火車軌身加毛筆尾。
搭的士帶佢兩個去醫生度。
睇見其他狗狗既反應都幾好笑，大大隻狗要主人拉佢拖地咁入醫生房。
小王子呢，張醫生桌好似燙腳咁，係咁扒住柴柴。
走都搭的士呀，因為買埋糧，兩個人搞唔掂咁多野。
辛苦死柴柴喇。
