生活點子: November 2008

窗簾

去揀布。
我仲好老定咁話好快會揀完，點知揀左個半鐘。
呵呵呵~

清潔工

柴仔派我去買防倒流。
哈，所托非人啦，都唔知買左 d 乜。

約左人度尺造窗簾。
好耐之前向呢間舖頭買左個浴屏，好耐之後先至裝。
裝左之後好耐都未裝修完，而家先至造窗簾。
果個人都...下！
嘻嘻。

今日做清潔工嘛，落街搜購清潔用品。
WD-40、地拖、拖把、掃把、膠桶、手套、廁所刷、活奇能、漂白水、藍威寶、祝君安好、牙刷...買左成三百蚊架！
仲買左兩個飯盒返屋企食，食飽好力氣做野。

測試活奇能既威力。
哎呀，勁得滯，蝕左 d 塑口。
好頭痕，點搞？

吸塵機送左黎喇！
好鬼大個架，成個機械人咁既樣。

三段火力，開到 high 好鬼嘈。
吸下 d 灰、木碎，都幾好用既。

抹左廚房、廁所同地板。
其實大部份都係柴仔做，辛苦哂~

睇下清潔後既廚房：

(地拖掃把抹紙周圍擺，好 lau gau 添。)

(呢個就係對我好重要既地台喇~)

睇下清潔後既廁所：

呢隻投降小熊毛巾架，真係可愛到~

Labels: 一片瓦

離場

搞左咁多個月，師傅終於離場喇！
搞搞清潔，入傢俱電器...
好快好快可以成家喇！

Labels: 一片瓦

打針

停左一兩年冇打流感針，今年打返。
一來公司免費提供，二來發覺自己病多左。
真係年紀大，機器壞......

Labels: 點滴生活

閉關

預備考試中，所以甩期甩得好緊要。
但我點都唔會放棄之前既日子架！
12月啦，我會追返架喇~

Labels: 點滴生活

架

放工出旺角買玻璃角架。
本來諗住買埋毛巾架，但揀唔到。
好嚴重既選擇困難症...
其他我已經好努力架喇。
舖頭都差不多關門，好緊張好快咁睇。
但款唔係好岩，又覺得貴。
向其中三間行出行入睇下，比較下，好似個傻婆咁。
最終，都只係帶得個角架返屋企...

Labels: 一片瓦

十下十下

補購慳電膽。
因為師傅打爛左波波燈其中一個，同埋要買三個俾廚房，三個俾廁所。
先係買錯左形狀，所以唔岩入波波燈。
唔俾退錢，唯有換第 d 野......拖板。
俾柴仔由街頭笑到街尾...
之後再發現買錯數目。
拿，三個俾廚房，三個俾廁所，波波燈就打爛左一個同想轉一個黃膽入廁所，即係波波燈要兩個，共買八個。
究竟點解裝哂之後仲有一個剩既呢？
...因為我笨囉...=.="

電磁爐裝好左喇。
買爐果陣送左幾個煲，所以有得試爐。
煲下水咁囉。
聽聞煲水就係入伙，哎呀，唔知日子時辰好唔好添。
戌時...記住...戌時...

柴仔整埋個電腦掣。
電腦人自己整電腦掣，嘻，返工仲對唔夠。
不過呢個唔使工具既新設計，好似幾難搞。
見到柴仔要出哂力咁夾。
好痛~

唔知因為低層，定 d 裝修味，屋企好多飛飛野。
好多隻企住向廳燈對上既天花，睇到都毛管棟。
間唔中有 d 去到我地觸得到既地方，佢既命運就...
哇哈哈！

Labels: 一片瓦

添傢俬

今日既目標係床同埋電視櫃。
去到目標舖頭，噫，未開門既。
係未開門丫，定係執左？
好失望呀...

不過我唔想咁易放棄。
向佢隔離間食店吃個 lunch。
問下 d 伙計，睇下係咪未開。
問到係冇咁早開呀！
食完四團行，再返黎就開左喇~
即刻捕捉我既獵物：

(我揀既電視櫃係圖入面個款，但係係黑橡木)
將獵物逐件逐件捕捉，係好多野要諗，但過程好得意架。

目標達成，又係閒逛既時候。
一田大減價，梗係要去趁下啦。
嘩，多人多到丫，唔使錢咩?
有 d 區多人多到都行唔到。
又唔係有心買野，搞到都冇乜心機行。
雖然係咁，但我都有收獲，哇哈哈~

Labels: 一片瓦

腳震震

公司今日走大火警。
走大火警，即係唔係到隔火層咁簡單，係要去隔...隔幾條街既空地。
二十八樓呀！
真係想換波鞋走。
不過諗諗下，如果真係火警，我邊有得換波鞋，到時先唔得，就死人喇。

落到地下都腳軟。
但最辛苦，係去空地之前要過條天橋。
落天橋果下，對腳真係震，要扶住先行到。
陰公~

Labels: 點滴生活

冬天不凍

今朝起身針熱水，針唔出，似為個水壺壞左。
去著廁所燈，又唔著，意識到應該係停電。
打開大門，漆黑一片，睇下個家用電話，冇哂訊號。
望下落街，又正常丫。
再開大門，噫，冇事喎。
睇下電話，又冇事喎，開埋燈都得喎。
我好似發左場夢咁，又有 d 好似俾人整蠱咁。
打電話俾爸爸，確實左有停電呢件事。
哈，證明唔係我思覺失調。
出門口...冇 lift 搭呀，OH NO！

聽日要去飲，所以改左今日同東瓜少爺西瓜小姐去街。
去街前佢地都懵然不知，所以冇催出門口。
東瓜少爺某 d 位係會跟貼柴柴腳邊。
又好似係我拖住至係咁。
當我話「睇下我拖住幾聽話」，柴仔就話「佢驚行得前，你又唔識路，返唔到屋企咋。」
唔...我唔否認有咁既可能性...嘻嘻...
:-P

新雪櫃今日終於送黎喇！
七月買，今日先到。
買果陣係預左十月先送貨既。
不過到左十月，都一直都送唔到，仲夠膽話唔再出果隻 model！
經過同直銷及信興一番查詢後，我既雪櫃終於到手~
好開心呀，仲要同我既雪櫃合個照！

夜晚又行下 d 電器雜貨地方。
柴仔睇燈膽，好用心咁睇。
原來佢睇下有冇熱膽 (唔知點叫)，話開左會暖 d，安向廁所度，咁我沖涼就冇咁凍。
仲話睇要睇埋暖風機。
嘻，咁多年既冬天都捱凍沖涼，以後既冬天，有熱膽、有暖風機、有你，我一定會好溫暖。

Labels: 一片瓦, 劃火柴

Toffy's Night

今日係 Toffy 既大日子。
正正式式做一次姐妹。
上次家姐結婚，話就話做伴娘，不過超簡單。
淨係見開門利是都唔記得收，同埋放工先去婚宴，就知幾唔伴娘。

去到 Toffy 屋企換衫...
唉，條裙始終冇改短，勁拖地。
唉...

姐妹化妝都幾花時間。
大軍到左都未搞掂。
兄弟又好蠱惑，又話口渴又話要去廁所，全部乘機入屋，仲想衝破防線！
哼，點會俾佢地咁易到手！

我地都係心地善良型架，只係設計左玩收集祝福語、甜甜襪襪、甜酸苦辣同愛的宣言之嘛。
不過都有意外囉。
玩甜酸苦辣果陣，我地預備左糖水(唔係紅豆沙果 d 糖水，係煮飯果 d 糖沖既糖水)、白醋水、廿四味同 wasabi 水，俾新郎哥加十兄弟享用。
本來諗住十兄弟人人有份，但估唔到新郎哥咁有義氣，搶住一個人頂哂。
結果，新郎哥勁"湯"。
真係 If anything can go wrong, it will. (Murphy's laws)......
Toffy，唔好意思呀~

玩愛的宣言，由於新郎哥唔係好識中文，讀起上黎都好搞笑，要兄弟教講囉。
但係又講得幾感人喎，搞到新娘、外父仲有我呢個眼淺姐妹都眼濕濕。

由於冇去男家呢個環節，全部人就由兄弟車去酒樓。
間酒樓幾好服待喎。
有哂 coordinator，安排好斟茶、數人數、進場...亦都好照顧 Toffy。
所有野順順利利。

晚宴都有好多節目。
新郎哥好似開演唱會咁唱左好幾首歌：真情流露、Evergreen...
有哂感情，感動死人。
又有抽豬豬，賓客反應都好熱烈。
我既婚宴，應該唔會搞咁多野咯。
難得咁多朋友聚埋一齊，希望我安排到同每個 group，甚至每個人都可以傾下計啦。

Labels: 書友仔 S

劈劈

聽日我既好友 Toffy 結婚喇！
今晚約左 Miffy 同 K 哥"劈劈"。
其實真正目的係為左慶祝 K 哥生日既，不過咁岩約左今日，咁岩變左"劈劈"。
哈哈。

好鍾意呢三個人既組合。
乜都講得。
可以互"疾"，可以分享，可以講歷史，可以講現在，可以講將來...
雖然話我同 Miffy 傻，但又樂意繼續答我地 d 問題。
由 7:45 傾到成 11:00。
好開心。

Labels: 書友仔 S

善良的姐妹

星期二做姐妹，今日去試衫。
四個女人試衫，原來都要搞幾耐架。
上次已經度左尺寸，但今次試都唔 fit，仲要改囉。
試完走去飲杯野。
餓鬼 Miffy 今晚去飲，都要吃個麵打底。
傾下玩乜野遊戲。
我地都算好姐妹啦，都唔係諗 d 好變態既遊戲。
開門利是都問過女主角先定價。

搞掂哂就散水，我同柴仔去海馬睇傢俬。
見佢上次張檯有問題，都冇話推三推四唔肯換。
睇下叫師傅報價個衣櫃幾錢囉，差好遠就買個現貨算。

差唔多七點，走去買廁所果兩個角架同廁紙架。
老闆娘一報，同我地下午問老闆個價錢唔同。
好在都肯計返下午個價俾我地。

經過有檔野推銷緊 360 地拖。
上個星期都睇過架喇，今日又睇。
佢 show 到真係好似好得咁，一百蚊叫做有兩個，都有 d 想買。
新屋係時候要買清潔用品嘛。
不過睇睇下，柴仔發現左上一個 round 買左既小姐，今個 round 仲向度，仲要個地拖唔見左。
我地懷疑係媒囉。
走。

返新屋，見廁所同廚房個檯面石都已經整左。
廁所果個幾靚，幾襯色。
試爐試水，花洒用到，熱水都 ok。
哈哈，今個冬天有無限量熱水沖涼喇！

Labels: 一片瓦, 書友仔 S

賀 CS

為慶祝舊同事榮升 CS 之喜，約哂咁多屆師兄弟姐妹出黎食餐勁既！
向鹿嗚春設宴，當然係升職果兩個請客啦！
Salt 話間野好出名架喎，不過我唔識囉。
我見識少~

岩岩個九月已經係第六屆喇。
我係第一屆個批，嘩，好老！
其實我果屆已經離開哂間公司，不過都請埋我地，真係俾面。
我果屆今晚得我到，對住差唔多有一半都唔識既人，好在都冇發毛。

食完仲向香格里拉門前拍照，扮哂野，哈。
佢地話，要將升職請上上下下食飯變為指定動作。
嘻，我有乜所謂，我點都係食果個，有 so 有 so。
哇哈哈~

Labels: 工場 E

真係新屎坑

新既餐檯今日送黎，換走之前果張次貨。
不過都仲係要委屈張餐檯，要佢封下塵先，因為仲未裝修好。
同個廁所做左個簡單而隆重既啟用儀式。
嘻嘻，唔知個屎坑可以香幾耐呢？
試埋個花灑，但係出唔到水...
壞左？點算呀？

出旺角行街。
冇乜屋企同結婚既野搞，去左睇相機。
睇下囉，第時去旅行都要買返部架啦。
諗諗下，到我地去旅行，除左團費，仲要買好多野先去到。
衫衭O急相機......
嘩，大破財~

行到支力，搭架扶手電梯既時候，柴仔俾大髀我坐。
呢個動作，我記得以前爸爸都會咁做。
兩個都係好錫我既男人。
好感動呀~

經過阿土麵線好多次，今日終於試一試。
em......well......
我食完中左毒囉。
究竟點解會咁既呢？
唔通我真係僵屍？
=.="

Labels: 一片瓦, 劃火柴

生活點子

Sunday, November 30, 2008

窗簾

Saturday, November 29, 2008

清潔工

Friday, November 28, 2008

離場

Wednesday, November 26, 2008

打針

Monday, November 24, 2008

閉關

架

Sunday, November 23, 2008

十下十下

Saturday, November 22, 2008

添傢俬

Friday, November 21, 2008

腳震震

Saturday, November 15, 2008

冬天不凍

Tuesday, November 11, 2008

Toffy's Night

Monday, November 10, 2008

劈劈

Saturday, November 08, 2008

善良的姐妹

Friday, November 07, 2008

賀 CS

Saturday, November 01, 2008

真係新屎坑

About Me

Countdown

Links

Labels

Previous Posts

Archives

This Page's Comments

Visitor Counter