生活點子: January 2006

年初三

往年年初三都去姑媽度既，不過今年姑丈入左醫院，所以唔使去。
今日既節目，就變左去柴仔屋企，但咁岩柴爸柴媽都唔向度。
柴仔努力打仗，我就同小王子小公主影寫真。

剛剛黎既時候，小王子得一個磚多 dd，你睇佢而家幾大隻。

你睇佢個樣，古古惑惑咁，又唔知有乜鬼主意。

小公主既三七面。

年初二

食完午飯，唔跟亞媽去拜年，留低同舅父地一齊。
唔係又好似尋日咁發呆，又未去過亞姨度嘛。
舅父落廚整西餐，吃扒，都似模似樣架。
興起整個沙律，有乜生果都切落去，後來砌到好似個蛋糕咁。

呢個係沙律。

頭盆係三文魚刺身、沙律同一片菠蘿。

主菜係大蝦、牛扒同薯茸。 (賣相好似撈搞左d)

年初一

新年快樂！恭喜發財！

新一年既開始，我訓到日上三竿先起身。
新一年既開始，我第一餐飯係三件蘿蔔糕同一個芋頭飽。
年廿八該做既事，我今日先做。
拾完個豬欄，歇一歇就要出發去個姑媽度。

去到果陣成間屋得七個人，四個打麻雀，一個匿左向房度(佢唔出街我都唔知佢向度)，一個係工人負責煮飯，仲有一個係我。
堂哥好後先到。
無所事事左個幾鐘先有飯食，食完就走人喇。

細個果陣唔係咁冷清架，好熱鬧架。
有兩圍麻雀，有人煮我至愛既糖心湯丸，有堂哥同堂姐帶我去睇戲，食飯都要分大人細路圍。
記得有一年睇《龍過雞年》，堂哥話我同堂姐笑得太失禮，以後都唔帶我地睇笑片。
又記得我地班細路會打開佢個雪櫃睇下有乜好野食，通常都會吸引過食緊果 d。

今日最有意思既係收到堂哥既利是。
可惜亞嫂要返工，見唔到面。
佢以為到我結左婚就使俾利是我，錯喇，收足佢一世呀！
呵呵呵！

團年飯(二)

尋日向我屋企團完，今日向柴柴屋企團。
去到等佢打完仗先同我行街街。
小王子傻豬啦，見到我又以為有街街去，向度扭計。
我地出門口果陣，佢叫得慘到好似俾人虐打咁。

我買唔到衫呀，不過買到對波鞋。
佢買唔到電話呀，不過買到條褲。
都叫做有 d 收穫啦。

排隊拿盆菜都排左成半個鐘。
同我屋企岩岩相反，我屋企就大既出 $ 出力，佢屋企就細既搞掂。
辛苦哂咯。
食完仲要俾人扭去行花市。
唔食果 d 正宗冰糖葫蘆 lu，咁貴，又食親都鬧。
冇法啦，鬼叫我地食過 d 唔正宗但又好食 d 既咩。
雖然來回既時間仲多過行個花市既時間。
不過新年嘛，點都要行下既。
都行得好開心丫。

團年飯

今年既團年飯好特別，因為有你。
你應該感到好榮幸、好驕傲，因為你係第一個到我屋企同我屋企人食飯既人。
從來冇一個朋友、同學有咁既機會。
亦因為咁，我好鬼緊張。
之前係咁提亞媽記得 confirm 訂盆菜。
又諗屋企唔夠椅，要唔要企埋一邊食，會唔會唔高興。
最驚係你 d UFO 唔生性，捉住你唔俾你走。
好在，一切順利。
個盆菜好唔好味，我已經唔知道，唔在乎。

Offer

收到消息。
第一時間係好開心既，但之後就頭痛萬分。
打折喎！日夜癲倒喎！
點好呢？
頭...又痛又痕...

深水埗全港最窮

【明報專訊】深水埗是全港最貧窮的地區，緊隨其後的是觀塘及元朗區。據去年一項研究該區貧窮問題的調查指出，深水埗區內逾11萬名住戶中，超過一成住戶每月收入只有2000至6000多元，遠低於全港市民入息中位數，若以個人收入計算，即月入不足3000元。

有該區區議員建議，政府應投放更多資源改善該區貧窮問題，包括發展獨居長者支援計劃，及在區內創造更多就業機會等。
--------------------------------------------------
我係深水埗區既其中一份子。
$_$

個人私隱

公司收到個叫人參加某講座既 email。
手多多睇下個 attachment。
一個 .xls，第一眼冇咩特別，係 d 合資格參加既人名表。
睇真 d，用 sheet 2 既？
又手多去 sheet 1 睇下。
一睇，有冇搞錯......
公司其中 1148 個人既個人資料，一覽無遺。
出生年月日，幾時加入公司，供邊個 MPF plan，就連身份証號碼(連括號)都有。
我就唔係話想搞事既，不過我覺得真係幾離譜，所以同左銀銀老闆講。
提下發呢個 email 出黎既人唔好有下次都好丫。
不過，原來係 side 氣既......

鐵齒銅牙

擘大口...呀...
大概半個鐘多 d，我又變返鋼牙。
不過今次只係整左上面六隻牙。
唔連大牙，舒服好多。

返到屋企食蘋果...哎吔！
嘩...痛到丫...
又要用刀仔切細粒細粒喇，冇左大口大口咬既樂趣。

食餐好

呢個星期要吃好野，要吃蘋果。
因為今個星期五...

同亞火哥地食日本野。
係呀，又係日本野，正正。
貴又唔係話好貴，又都幾好食喎。
(我地話要去食下午茶拉麵果間既女人街分店)

睇 Noble 去韓國既相，好羨慕。
羨慕佢有得去旅行係其一。
最羨慕係佢同翻譯兵既友誼。
來自不同地方既人向歐洲相識。
只短短一個旅程，今天，Noble 到兵兵屋企作客。
佢向香港，都未必過得咁熱鬧，咁開心。
我冇乜機會會有咁既經歷，太多顧慮喇，唔恨得咁多。

閒逛

相約於新XX既大XX吃燒味。
鄰座有兩位奇怪既小姐。
各自買野食，各自排隊領自己個餐。
仲講左 d 奇怪既說話。
大概她們太閒。

聽說金魚街快要消失，便走去逛逛。
突然有好幾架消防車救護車駛入果條小街。
佢地根本都好難前進。
有私家車夾向呢條車龍既中間，個司機都幾無奈。
如果係大單野既話，分分鐘要困向果度幾個鐘。
有 d 大街轉緊入去既車就即刻轉軚，不過後面既車迫得好緊，好似有心唔俾佢走得到咁。
兩個無聊人，咁都睇一餐。

奇蹟會發生向相信佢既人身上。
我們要相信。

復課

又要返學喇。
之前亞 Sir 太忙，顧唔好我地，所以課程暫停。
而家大單 project 完左，復課囉。
一個星期兩晚堂。
一個星期早放兩日工。
一個星期兩日牡丹樓...

馬莎餅

今日放工唔知發乜神經，走左去馬莎買筒廿蚊既餅開心下。
中六七果時同學仔請食，之後都只係食過一兩次。
好重好重牛油味，好好味，好好味。

守護天使

我向呢度將個貓貓送返俾你。

天使的話

你也送了這個貓給我

--------------------------------------------------
曾經有個朋友同我講過佢自己既故事.....
響一年幾前，佢同相戀左好多年既女朋友分手，傷心欲絕....就響呢段時間, 佢睇左一部不知名既電影，內容係講有個人死左之後去到天堂，果度有好多好多天使，仲有好多好似電視機既機器.... 天使請呢個人坐低，然後呢 D 機器就開始放映呢個人既一生。

就係咁, 呢個人就睇住自己既一生好似電影咁播放....
但係, 佢發現機器每次放映緊佢逃避現實既場面，畫面就會停格，而呢部機器曾經停格響 :

1. 佢第一次激嬲爸爸媽媽而唔敢道歉
2. 佢深深愛上一個女人但係又唔敢表達
3. 為人父親既時侯，唔敢表達自己對仔女既愛
4. 到死既時候, 都唔肯講出內心所想

就係咁，呢個人一生既片段放完啦...天使們討論一陣之後同呢個人講 : -
你呢一生人裡面, 完全缺乏愛同埋勇氣，所以我地要請你重回人間，
去學一學咩野叫愛同埋勇氣之後，先至再番上黎呢度。畫面一轉，呢個人又再一次出世啦 .. 因為佢要重新去學咩叫愛同埋勇氣。

我個朋友話比我知，呢部電影令佢非常震撼同埋感動 ..
因為, 原來如果佢呢世學唔識咩叫原諒，佢就要來生再學; 如果佢呢世學唔識勇敢面對，佢又要來生再學; 咁樣, 佢覺得點解唔響呢一世就學好呢兩樣野呢???

呢個朋友既一番說話，令到我重新提起勇氣去面對我應該要面對既生活同事情。

其實, 係天使的話!! 電影裡面有一位天使曾經咁樣講過：

有好多人進出你既生命; 但係只有真正愛你同鍚你既人先會響你個心裡面留底佢地既腳印, 眼淚同心跳..

如果一個人背叛你一次，係佢既錯﹔
如果一個人背叛你兩次，咁就係你既錯...

失去金錢既人，失去好多﹔
失去朋友既人，失去更多﹔
失去信心既人，失去所有。

美麗既人係天然形成，美麗既心先至係難能可貴。

你同我係朋友，你會帶比我另一位朋友，咁我地互相就有三個朋友，
我地就開始成為一個小組，就好似一個圈圈，
無開始亦都無結束, 無貴賤亦都無彼此...一路延續落去...今生今世...

**************** 守護天使 *****************

有一個天使派我黎到您身邊守護您....
你可以將呢封〝天使的話〞送比你想要守護既人, 如果你發覺呢封信被送回頭,
即係話, 你要守護既人亦都同樣守護住你....

想和你分享兩宗真人真事

你送了這個貓給我

--------------------------------------------------
有個孝子，他的父親居住環境甚差，夏日炎炎，家沒有冷氣，只有一座很殘的電風扇。孝子答應要買部新的冷氣給父親，可是，因為工作忙碌，一直抽不出時間去實行。終於有一天，他去買了部冷氣，翌日就會送到父親的家去。可是當晚，他父親家風扇燒著了，火警中這老人家在睡夢中身亡。

有個做警察的丈夫，工作又忙又不定時，太太懷孕入了院，他也不能經常抽空探望，直到嬰兒將要誕生前的一刻，他明明來到醫院，接過電話後又因要工作而趕著走了。結果女兒出生了，但太太卻因難產而去世了。

這樣的時刻，他竟然都不在她們身邊。

有時我會覺得，不是每個兒女都能與父母融洽相處，又或者，不是每個兒女都有幸可與父母經常共處。當我在飯後與媽媽一起看電視時，我總是發覺她的白髮又多了點，身體又瘦了點，這種感覺總令我想要流淚。

當你又情願與朋友唱K也不願回家吃飯時，或者應該想想，能去愛也是一種福氣。

還記得9.11事件嗎？
當時有人在臨別前打電話回家給家人或最愛，
但也有人.................只能亂撥個號碼，打給一個陌生人去說再見。

如果是你，你會打給誰呢？

愛一個人，不要愛得太晚！

特別送比你 !!!

堂姑仔

今日堂哥結婚，放工之後入沙田觀禮。
細個都可能觀過禮，不過全無印象。
好簡單既儀式，新郎新娘婚姻官各講段說話，好 standard。
望住堂哥，細細個一齊玩，到而家大個，結婚喇，感覺好得意。

夜晚去飲，我一家人坐主家席，因為係男家既長輩喎。
又係好 standard 既睇相片段，堂姐變左第二女主角。
新郎新娘出場講野，一 d 多謝感激既說話。
新娘子一路聽堂哥講，一路眼濕濕，到佢自己講，都己經唔係好講到。
我呢 d 咁眼淺既人，當然都眼濕濕埋一份。

開席，其實對新人都食唔到乜野滯。
尤其新娘子，成日都要換衫，又要敬酒。
送客前聽到新娘子話好肚餓，要打包一 d 野返去食。
呢 d 大 show，姐姐話佢就唔會搞，亞媽都話唔想。
點解唯獨是我咁鍾意呢？

Annual Dinner

頭獎日本雙人來回機票
二獎XX雙人來回機票
三獎XX雙人來回機票
仲有幾千幾千現金獎
嘩...今年賺大錢啦

枱獎沖涼液...係咪 OT 用？

思覺失調

今晚同印花們食飯，地點揀左旺角既壽司亭。
又係日本野，因為我同亞飯都鍾意食。
Loffy 要返工冇黎，我地有話題講到佢既屋企人。
講講下我講左一件事出黎，但係連 Toffy 都唔知既。
大家都覺得咁既事冇可能 Toffy 都唔知。
死喇，係咪我自己諗出黎既呢？
係咪我某次發夢之後就以為件事係真呢？
好迷惑 tim。

生活點子

Tuesday, January 31, 2006

年初三

年初二

Sunday, January 29, 2006

年初一

Saturday, January 28, 2006

團年飯(二)

Friday, January 27, 2006

團年飯

Thursday, January 26, 2006

Offer

深水埗全港最窮

Wednesday, January 25, 2006

個人私隱

Friday, January 20, 2006

鐵齒銅牙

Monday, January 16, 2006

食餐好

Saturday, January 14, 2006

閒逛

Thursday, January 12, 2006

復課

Tuesday, January 10, 2006

馬莎餅

Monday, January 09, 2006

守護天使

天使的話

想和你分享兩宗真人真事

Saturday, January 07, 2006

堂姑仔

Friday, January 06, 2006

Annual Dinner

Thursday, January 05, 2006

思覺失調

About Me

Countdown

Links

Labels

Previous Posts

Archives

This Page's Comments

Visitor Counter