Wednesday, November 30, 2005

夜歸

晚上 7 點幾,同房同事走。
冇耐佢折返,話其他同事已經走哂,得我一個留向度唔係咁好,叫我都執野走,佢等埋我。
路上傾下計,佢話佢就因為係大單野所以先趕住做,我點解都要晚晚搞到咁夜。
鬼咩,日透開會、site visit、搵人,文件野勿夜晚先做囉。
十幾萬樣野都話趕,年尾結算趕洗錢丫嘛。
對出面又忙,對入面仲要去搞乜鬼嘉年華會,搞呢搞路。
唔係話嫌做得夜,出面 d 人 7 點幾好早 tim 啦,但得一個人向度做,冇意思囉。
越諗越唔開心,一路搭車一路頭 dup dup。
返到屋企即刻搵柴柴。
唉,再係咁落去,命都短幾年。

Monday, November 28, 2005

Site Visit

雖然唔係單拖赴會,但都唔好得好多。
感覺唔係咁好。
掛個名係專業,但我一 d 都唔專,資源錯配。
銀銀老闆淨係話「唔識即場解決問題,所以勿有手尾囉。」
「經驗唔夠囉,下次 site visit 我同埋你去啦。」
唉,都核突左啦。

Saturday, November 26, 2005

Mongkok Bazaar



一句「唔買都去睇下喇喂~~」,咁今個星期六就有目標喇!
好多豬,正呀!
其中有對黑白豬,我開始幾鍾意。
原因...十月二十九日果度會有 d tips。

睇 d 中式衫,我唔係咁鍾意。
尤其係綿"立"果 d 花,硬係得好似......

你既好朋友有打算喇,但你對佢既出發點有所質疑。
點都好啦,唔係玩玩下既就算係咁啦。
對呢個打算,我一路都覺得有年齡限制,以為會好 d。
但你就話我古老。
我歡迎你既想法,嘻嘻。

秋風起,蛇蛇好鬼肥。
d 蛋散我食哂啦,一滿碗變到剩返緊緊夠舖碗底。
觀察條櫥窗蛇既活動,諗下佢個腦會諗緊乜,又諗下佢究竟有冇腦。
你個衰仔就話:「你都有,佢點會冇。」

Thursday, November 24, 2005

強迫觀念症

1. 你有否經常洗手、清潔,過度潔癖?
2. 你有否經常檢查事物,如檢查門戶水喉和爐具?常常覺得有事煩擾自己,但又感到無法擺脫?
3. 要用很長的時間才能完成日常活動?
4. 你是否對事物的擺放非常在意?是否必須按照你獨有次序?
5. 當你身處在擠迫的人群裡;你是否會感到不自然或傷感?

以上既問題都答係既話,就要小心。

我既答案:
1. 會洗手,但唔係潔癖,如果唔係我屋企就唔會係咁。
2. 出門口關門之後會開返門睇下有冇熄風扇。
3. 係。
4. 部份係,如床 d 公仔同袋入面 d 野。所以有人郁過我 d 野,我通常都會知。
5. 不自然囉。

出事喇......

Wednesday, November 23, 2005

警察

地點:地鐵車廂
人物:一個媽媽,一個女,一個警察

媽媽同女企向車廂中間。
警察企向門口。
個媽媽同個女講:「你再 yik 丫,叫警察伯伯拉你!」
車到站,警察下車,媽媽往門口方向行。
你估下個女做乜?
個女拉住媽媽叫唔好。
佢梗係以為媽媽真係去搵警察啦。
細路仔真係得意。

但係...
點解 d 大人咁鍾意撻「警察」個朵去嚇細路既?
仲有,我以前聽「警察叔叔」多,呢個警察又唔係好老,點解變左「警察伯伯」既?

Friday, November 18, 2005

禽感針

今日大部份時間心情都幾好,因為約左打針,打完可以歸家。
係同個“艾勒梗”亞太講完個電話就非常燥。

我真係好怕呢個亞太。
佢係我返工第一個接觸既客仔,第一個問候我既客仔。
上次同佢開會我投哂降。
佢用向街市賣野 d 人既聲線向度講野,背景係一班人討論中。
佢每講一句野,我個頭就痛一痛,係真係肉體上既頭痛。
佢張我 technical 既野我唔識,我又唔識用咩手法可以耍走佢。
我唔開心,大部份係來自我既無能感。
一坐低,procedure 唔識,technical 唔識,十隻手指都數唔哂既 project,唔知發展經過,唔知頭唔知路......
日透開會、打電話,夜晚執手尾、對數、作文、林林 some some 既凡文俗節。
夜 d 放工都又靜又黑。
算啦,唔講工作喇,一句到尾好唔開心係啦。

打完個針已到放工時間。
行下街,睇下 VCD 店。
返屋企仲吃個古力新地。
安慰下自己都要掛。

Thursday, November 17, 2005

牙籤

以為普普通通食餐晚飯,原來小鳥另有目的。
鬼咩,要等女友放學,勿搵我地做牙籤囉。

講今日 d 激氣野。
親身經歷有 d 野一定唔可以經過某 d 人既口。
即係果 d 你同佢講你拍拖,佢會同人講你就黎結婚果 d。
希望佢今次冇搞大件事啦。

Tuesday, November 15, 2005

不孝

為求達到目的,放左亞媽上枱。
不過...過程有 d 樣衰。
向電視劇出現既情節,發生左向我身上。
係未衰到呢頭得罪果頭見返姐。
好好地半天假,都未放夠又要返公司喇!

Saturday, November 12, 2005

聯婚

今日仔應個炸彈約會,放工之後冇街街去。
先回家再單拖返學。
好在個女人冇問點解。

放學搵你,你笑隔離果對新人余 X 聯婚。
不過我都覺咁既名就就咁余府宴客勿算囉。

夜晚亞飯俾野我玩,我玩左 d 咁野出黎:


你話似唔似?

Friday, November 11, 2005

蘇州船

打交,上堂,聚餐,到今日先可以再搜索目標。
向巴士上面,我一路都留意住 d 小巴,尋找你既身影。
如果真係見到,會係幾咁有趣。
我先到步,四圍都好多人,諗住企定等,但好礙眼,都係搵間野扮行。
去果條巷度食麵,又真係唔係好特別既,最多話佢特別少野揀囉。
搵你既 target,可惜又冇左。
唔正經去有,正經去就冇。
整定...

Monday, November 07, 2005

煩躁

亞員走左喇。
上個星期五因為我要出去開會,未聽哂點分配工作就走左。
結果,好多野都有我份。
今日見到個 in tray,感覺真係一流。
佢地又未見過我,我又未見過佢地。
做到好忟,仲要俾個同事捉住係咁吹水。
雖然佢唔係講無聊野既,但我個心好想去做野又走唔甩,好忟囉。
返到位好想發爛楂,最好有過山車,有飛機過,或有個大耙俾我 turn 下。

經過秘書小姐間房,我真係好羨慕。
平時行過都已經見佢玩新接龍架喇。
今次行過見佢睇緊小說。
唉......

Saturday, November 05, 2005

大刺激

今朝好神心,一早起身走左去剪頭髮。
未見過我曲髮既朋友,唔好意思,你已經冇機會喇!
短短曲左四個月多 d,而家又直返喇。
實在太難打理,忍得到四個月都好勁架喇。
唔止整直左,我仲剪短左好多,係近五年最短既一次。
咁樣搞一搞,我向髮型屋坐左五個鐘。
諗住有個時間可能要辛苦亞仔自己四圍行下,點知我仲早。

佢收到炸彈,但唔係好想出席。
問題就好似畢業典禮咁。
佢連自己既畢業典禮都唔出席,又點會去人地果個呢?
佢跟住解釋,咁到自己果時當然要諗埋自己另一半鍾唔鍾意想唔想。
死喇,咁佢既另一半係咪都要諗下呢一半想唔想呢?
弊, loop 死喇。

Tuesday, November 01, 2005

車箱中

今朝搭穿梭巴,司機開住聽收音。
聽到幾個笑話,都係一 d 諷刺時弊既內容。
一個講彌敦道,一個講禽流感。
我聽完都有笑,我見到司機都有笑。
帶住個好心情返工。

放學搭地鐵,嘩,奇景。
我挨住玻璃位,斜對面近 d 我果度坐左對情侶。
女人企左起身,背住我,向住個男人。
女人個身剛好遮住個男人,我睇唔到佢地搞緊乜鬼。
動作上似係女人幫男人捉緊虱。
良久之後,女人坐返低。
我見到個男人...頭頂多左四支針...
嘩,剛才女人幫男人拮針呀!
返到屋企將件事話俾老爺知,佢話我應該即時走佬。
危險人物喎!