任務失敗
一朝早柴柴自己北上拿埋個大相同七寸相簿。
等我訓晏 d，又唔使 side 車錢。
結果，相係拿左，但又係激氣既。
大相整左，冇左上次既瑕疵，有左另一個瑕疵。
七寸相簿，冇整過。
柴柴照拿，係費事再激氣，係事再 side 車錢。
唉，算啦。
同柴柴睇醫生。
近呢年我地兩個都病得好密。
又唔係財多，做乜身子咁弱呢？
終於等到劉德華條衭減返價，柴柴終於帶左佢返屋企。
為左試下個洗衣機，去買洗衣粉返屋企洗佢條新衭。
返到屋企，佢就通渠，我就研究洗衣機點用。
開左快洗，我就大安指意坐定定等。
柴柴倒完通渠劑過黎睇。
打開去水喉個廚櫃，仲話師傅做乜整桶水向度唔倒左佢。(果個櫃放哂用剩 d 磚、油同其他裝修野)
洗衣機一去水，弊，噴泉咁~
我地一直冇留意果度去唔到水！
所有裝修野要搬走，抹抹抹。
笨手笨腳既我幫手試水，嘩，仲大鑊，搞到個廚房好似海灘咁。
(我以前返大陸 training 都發生過洗衫洗出海灘事件，咁邪！？)
柴柴試，估計係外面塞塞地囉，星期一又要搵管業處。
封好 d 位，即管洗埋機衫。
變左洗衣機去水，洗碗盤就谷水，洗衣機停左去水，洗碗盤 d 水先慢慢走。
仲要自我安慰話多左個自動過水既洗碗碟機...=.="
睇返柴柴通渠果邊，又係失敗囉。
唉，都唔知點搞。
低層 d 水渠真係咁差！？
Labels: 一片瓦, 劃火柴, 婚紗攝影, 星期三緊
我們的相簿
柴佬好快手已經 upload 哂我地 d 結婚相喇。
保持神秘，遲 d 先 post 個網址啦！
Labels: 婚紗攝影, 星期三緊
不可能的粟米湯
終於復活喇！
考試真係好困身，想去玩果陣覺得好有罪惡感，想溫書果陣就覺得好眼訓。
過左讀書時間，讀書真係辛苦 d。
放監就返大陸，拿相呀！
一幅油畫、一本十八寸相簿、一本十二寸相簿、一本七寸相簿、兩個相架、一幅簽名布...
左睇右睇，幾靚幾靚~
不過幅油畫同本七寸相簿有問題，要修理，冇得拿住。
又要再上去。
拿返新居，安置好就去 shopping。
用一百蚊惠康現金券呀。
樣樣買 d。
柴仔話不如買粟米湯返去煮。
我就一盤又一盤冷水淋落去，嘻嘻。
冇碗呀~冇匙呀~冇洗潔精呀~冇蛋呀~
最重要係...冇罐頭刀呀~
哈哈！
Labels: 劃火柴, 婚紗攝影, 星期三緊, 點滴生活
排版
今日又返深圳，目的係睇排版。
我地冇限定邊張相要向邊本相簿，任佢發揮，應該冇難度。
可能太冇難度，佢即時至執......
睇一本等一等，睇一本等一等。
柴仔個頭出煙。
夜晚向柴家食飯。
柴媽媽俾對龍鳳鐲我試。
哇哈哈，我有我既龍鳳鐲喇！
柴媽媽仲靜雞雞同我講，話結婚果日針茶要預埋柴仔 d 亞姨姨媽。
點解要靜雞雞同我講？
因為怕左柴少爺囉~
話怕佢唔肯喎。
嘩，柴媽媽都要怕左佢，咁我......
Labels: 婚紗攝影, 星期三緊, 結婚首飾
買 買 買
柴柴都睇左網上面既結婚相喇。
佢投訴囉，因為十張相，冇一張睇到佢既樣。
哈，劉大師真係咁唔鍾意佢~
師傳話可以買潔具、燈，我地今日就去掃貨。
樣樣都有目標架喇，所以唔使逛好耐。
廁所、洗手盆要揀 Toto，又唔想好貴，其實冇乜選擇。
要就個蚊型廚房，所以星盆又唔使頭痛。
呢三樣野向同一間舖頭買。
初初老闆每樣野計平 d，計我地總數三千三十蚊。
師奶仔講價，慳埋果三十蚊。
唔可以再慳喇，因為三千蚊先送貨~
到燈喇。
好耐之前向 B&Q 見到一款 Panasonic 既燈就愛上左。
好簡單既白色膠殼燈，望住盞燈就好似望住個蛋撻咁。
剛好呢款有一大一細，我就安排左佢地放向大房同細房。
向同一間舖頭買埋壁燈。
我地揀左燈泡形果盞，哈，成 set 就話唔高雅姐，一盞壁燈仔就冇問題啦。
客廳燈係最令我心大心細既燈。
呢盞又好，果盞又靚，真係揀到買果刻先定。
(俾左錢，仲諗咩~)
諗埋廚房同廁所既檯面石。
用假石好定真石好？
假石好貴，但好似易打理 d。
真石平 d，但好易有漬。
最後決定用真石，因為檯面太細，比例上切走太多位，唔係咁抵。
第時換大屋，有個大廚房，先再用假石啦~
Labels: 一片瓦, 婚紗攝影, 星期三緊
好消息
柴仔考試合格左喇!!
叻叻~
破天荒走黎接我放工。
一齊搭旅遊巴出九龍灣，一齊搭巴士返新居。
(一定要講旅遊巴，唔可以講接駁巴。)
為慶祝柴柴考試合格，仲請我食左餐好野。
(本來點計都應該係我請，因為合格就要慶祝，唔合格就要安慰，嘻嘻。)
返到屋企，發現 d 結婚相放左上果間公司個網喇！
睇完又睇，睇完又睇，睇完又睇......
今晚開心到訓著覺都會笑醒~
Labels: 劃火柴, 婚紗攝影, 星期三緊
選擇
上個星期揀相失敗，今日再戰。
可惜都係出左狀況。
約左 11:00 揀，但係我向睡夢中收到柴仔既電話，問我向邊！
嘩，已經係 10:06 喇！！
我唔知醒呀~
打哂仗咁都成 11:15 先去到大埔墟。
柴仔仲一路嚇我，話遲到，time slot 過左就安排唔到時間睇，要再約過。
搞到我憂心忡忡。
成 12:00 先上到影樓，好彩，有得睇。
冇記錯有 187 張相，先以自動播放幻燈片形式睇一次。
預備左相機影 mon，笨手笨腳咁要入電，要 set 時間，要記得關閃燈，搞到頭好多張都影唔到。
中間手又唔快，機又唔快，搞到有幾張只係影到轉相既樣。
影影下仲要冇得再影，因為我之前見到 show 2048，以為係有 2048 張相可以影，所以冇 format。
原來我睇錯，2048 係指解像度，所以 memory card 爆左，尾果 d 影唔到。
三本相簿、兩個相架、一幅簽名布、一幅大相，總共要揀 77 張相。
我既選擇性選擇困難症又發作。
咁梗係尋求柴仔既終極意見啦。
揀左 77 張，挑左 4 張特別處理，其他我地冇限定點排，俾 d 設計師搞掂。
我見佢冇俾張"同意放上網"既紙我地簽，勿開口問佢囉。
佢有俾返我地簽，不過我冇睇清楚內容就簽左，冇事掛。
諗諗下，會唔會係覺得我地 d 相唔靚，根本冇打算放上網，所以冇叫我地簽呢？
哈哈，咁我勿好唔知醜？
約 10 月尾再去睇排板，12 月初有成品拿。
唔知結果有冇得放上網呢？
Labels: 婚紗攝影, 星期三緊
我的野蠻男友
今日去揀相呀。
但係原來上次個姐姐仔冇登記，所以未 ready。
奧賣吉~好失望呀。
仲要晨早上左去，白行一趟，side 車錢仲訓少幾個鐘。
雖然俾返個小小紀念品安撫我地，但係都唔高興。
提到七寸相簿，佢話冇喎，我繼續唔斷氣咁問，佢就話再 check check 先。
一路返黎，柴柴一路向度鬧鬼。
原來，佢都幾野蠻。
返落黎去旺角行。
做左好多件事呀，睇電磁爐同洗衣機既結構、揀吸咀石、買門鐘、買電腦掣面板。
雖然人地話呢個係舊款，但係我鍾意囉，所以都決定用呢款電掣！
pi..pi..park..park..pi..park......正~
Labels: 一片瓦, 婚紗攝影, 星期三緊
結婚相簿
食飯既時候討論，話影左結婚相都唔會拿出黎睇，除非...
數十年後...
我：老豆，我地本結婚相簿放左向邊呀？
柴佬：勿向個電視櫃囉！
我：唔見呀，你出黎幫手搵啦！
柴佬：無啦啦搵黎做乜姐！？
我：俾亞女睇丫嘛！
女：老豆，點解亞媽有咁多套衫，你得一套既？
柴佬：問你亞媽啦~
Labels: 劃火柴, 婚紗攝影
3V
終於到左今日喇！
天氣好好，實在太感動喇~
六點鐘爸爸就叫我起身，之前果晚 12 點幾訓，所以都 ok 既。
去買本 e-zone，預備俾柴仔睇，因為聽生日包講，我化妝 set 頭果陣佢會發呆。
差不多時間就打個電話俾柴仔，話佢知我買左 e-zone，費事佢買多本。
衰仔聽到我電話，估我同佢講我唔知醒，哼，我先冇咁懶惰。
同佢講我買左 e-zone，又話我未睇過就過關俾人收左，乜咁架~
本來叫佢帶相機架，但係佢已經出左門口，唯有用電話頂當啦。
好早好早，未夠 8:30 就到左，人地都未開門。
俾左尾數，揀埋 lunch 既外賣，小琴就開始幫我化妝。
小琴講普通話架，佢幫我化眼睛既時候，叫我望上我就望左下，叫我望下我就望左上。
哈哈，雞同鴨講~
一日共 serve 3 pair 人。
有一 pair 人遲到，冇得化妝住，安排左佢地揀衫先。
我心入面就擔心，d 靚衫會唔會俾佢揀哂。
哈，船頭又驚，船尾又驚...
柴仔的確呆左向度，俾佢揀下衫囉，但其實都要我揀左衫先，佢 d 衫至可以定，所以都幾 side 氣。
我化完妝到柴仔，我就去揀衫，先揀室內既晚裝。
試左幾件，結果揀左件深紅色既。
著住揀左既衫，開始 set 頭，小不點就同柴仔配衫。
因為我個 look cool cool 地，就同柴仔配左個不羈 look，著恤衫唔 sip 衫，打呔唔索呔。
wow~ 好型呀~
搞掂哂預備好影室內，但因為攝影劉大師未到，行行企企左一陣。
黎喇黎喇，唔知係咪因為佢遲左，好似好趕咁。
一見到柴仔係四眼仔，就話眼鏡會反光。
試影幾張，唔反光呀，不過折射問題，柴仔塊面凹左。
所以劉大師俾左兩個選擇我地，一係除眼鏡，一係除眼鏡片。
我覺得除眼鏡就唔係柴仔，但除眼鏡片柴仔就會好唔舒服，我決定唔到呀。
劉大師在旁不停施壓，話咁都要諗既咩。
最後柴仔都係決定除眼鏡片。
劉大師一輪「對對對」「下巴高 d」「膞頭高 d」「看我」，好快就影完室內。
跟住就揀一件長拖紗、一件平腳紗同一件晚裝影室外。
揀完又換妝 set 頭，柴仔配衫。
佢實在太簡單喇，所以可以好好咁吃個米線，我就一路 set 頭一路吃，都冇乜胃口 tim 呀。
突然間好似趕到甩褲咁，係咁催執野 (辛苦柴仔喇，我仲 set 緊頭)，仲要柴仔同我著鞋 (幾怕俾雷劈呀)。
廁所都冇得去就出外景喇。
先去仙湖，我著既係有膞白色長拖。
影落先知呢件衫有礙擺 post，做唔到 d 趴地動作。
不過唔會好大影響掛，有好多其他 post 架嘛。
可能冇左個眼鏡，柴仔眼睛變得好敏感，成日眨眼。
劉大師又話佢唔識笑，影幾張都笑唔好就叫佢「閉咀，別笑」。
另外兩 pair 都唔係影一日，所以成個仙湖得一件衫。
我有兩件，所以影完仙湖第一景點就上車換衫，然後轉妝 set 頭。
搞掂個 look，時間岩岩佢地影完第一景點，上車去第二景點。
呢度有個草地，要趴落去影。
隻手掂住 d 草覺得怪怪咁，仲咁岩咁衰有隻小動物 lan 上我手，救命。
其實我都唔係咁鍾意親親大自然，除鞋行草地行沙灘果 d，都係咪搞我。
影完仙湖去海灘。
之前亞生已經同我講左果度會好墟陷，場面好壯觀，所以見到長長既海灘佈滿左一堆堆影結婚相既人，都冇好出奇。
我地唔影便服，時間理應好鬆動，但劉大師好似好唔滿意柴仔表現，影幾張都唔得就又心急又mun，所以感覺好急趕咁。
臨尾等人影便服，我地勿大把時間向度 hea。
天光影到天黑。
不過我又唔係好支力咋喎。
之前預備既寶礦力、得力素同今朝臨急買既蚊怕水，掂都冇掂過。
可能外景全程穿波鞋，搭車會休息下，小不點又會幫我地打傘、送水、噴蚊怕水，加埋心情關係啦。
落埋妝走人，去食鼎泰豐。
香港食好貴架，大陸平平地試下囉。
咁就向上面過左一日，下次 九月二十日去揀相，好期待~
Labels: 婚紗攝影, 星期三緊
補充體力
上次聽亞生講，要預備 d 補充體力既食物去影結婚相。
今日我去入左貨喇~
Labels: 婚紗攝影
跟得媽媽
唔知點同亞媽講開換人仔，我話我都換左。
佢問我換黎做乜。
先記得我冇提過我向深圳影婚紗相。
佢好似好擔心我俾人昆咁。
又問係咪人介紹、又問有冇睇多幾間先、又問俾左幾多訂、又話要去間野睇下...
最恐怖係話影相果日要跟埋去！
@@
我梗係一口拒絕啦！
帶亞媽去影婚紗相...crazy...
Labels: 嘉士, 婚紗攝影, 星期三緊
北上
好多年冇上過去喇，羅湖既 e-道都係第一次玩。
唔同哂啦，我一 d 都唔認得咯。
兩個鄉下人出城，靠我地 d 自己明人地唔明既普通話，嘿，死梗。
不過有柴仔呢個地圖王，都去到要去既地方。
真係唔知柴仔係乜野構造，built-in 左地圖咁。
上到去聽下介紹，其實都一早心中有數。
聽下小小意見咩日子邊度靚囉。
結果，我最唔想既日子最靚。
實熱到溶，真係冇計。
上次覆診後都好有誠意啦，約左聽日談判。
人生第一次呀，好緊張，即刻搵 Noffy 過返兩招。
唔知會點呢？
Labels: 一片瓦, 劃火柴, 婚紗攝影, 星期三緊
