Saturday, June 28, 2008

北上

今日同裝修師傅北上田貝四路睇建材。
我地打算向大陸買磚嘛。

上到去食個早餐,可能近火車站啦,價錢唔平囉。
但搭車就好抵。
因為師傅"熟"路,帶我地搭公車,兩蚊雞一個人之嘛。
點解個熟字要""住,因為落車之後佢唔記得點行去,要打電話問朋友...=.="

行家合居,唔係好多野姐,唔係網上面形容到要分幾日睇咁誇張囉。
行行下其實都有 d 眼花花。
咁又幾好,咁又唔錯,可惜我只係可以揀一樣。
拿哂卡片,記低哂價錢,寫埋一 d 我睇得明既產品描述,慢慢再諗。

==========

無聊小事

近日有個廣告個口號係「慳得一蚊得一蚊」。
當中個細路女計佢爸爸既人工。
我同柴仔講埋 d 小學數。
小明爸爸本月收入一萬元,工作了二十天,每天工作了八小時,請問小明爸爸每小時收入多少元?
承上題,假設小明爸爸本月收入一萬二千五百元,每小時收入不變,請問小明爸爸共工作了多少小時?

記住用 d 好單調既語調讀出上面既題目,會好笑 d,哇哈哈...

Labels: ,

Friday, June 27, 2008

To My Sweet Heart

send 左個告解 email 俾柴柴。
希望你了解啦~

Labels:

沒有電視的日子

早兩晚電視壞左。
今晚忍唔住,要出手修理。

大家睇下個效果:-
修理前:


修理後:


為左証明唔係相機問題,我仲影左電腦睇既畫面:


雖然畫面質素仲好差,但都頂住條癮先,起碼都有野睇下丫。

Labels:

Wednesday, June 25, 2008

風神

今朝打風呀~
11:15 落波,捱得多一陣都可以放全日。
不過對於我呢 d 懶惰既打工仔,放半日都好過冇啦。

公司守則話落波後兩個鐘要返到公司。
但因為我朝早訓返,所以 12點幾至知落左。
外賣麥當當都趕唔切 13:15 返到。
有 d 擔心架。
打俾個同事問佢返到未,哈,佢話佢同屋企人飲緊茶。
=.="

Labels: ,

Monday, June 23, 2008

夢中的婚禮

尋晚發夢,夢見我去註冊結婚。
已經換好婚紗,但仲著住波鞋。
因為唔記得帶...

哎呀,到時千祈唔好係咁。

弊啦,咁快發呢 d 夢,我有排擔心呀~

Labels:

Saturday, June 21, 2008

口水大會

收左樓咁耐,今日先去地產舖交佣。
正式冇拖冇欠喇。

去管業處做張住客證。
張卡白雪雪,一 d 設計都冇。
係既,咁平管理費,想點丫。
順便交埋管理費。
呢期數係上手業主架,唉,交左都係拿唔返架喇。

返上樓,我特登要柴仔俾我開門。
因為之前都係佢開既,我要自己開門入自己屋企。
嘻嘻。

陪柴仔去見佢 d 朋友。
嘩,幾個口水佬,傾左四個鐘頭!
傾到眉飛色舞,聽到我一頭冒水。

散會後仲有時間,行過建材街,望下囉。
睇到咁上下,睇到色盲。
點解?因為我向一間舖頭既街頭舖同街尾舖睇同一款磚(已經對過model no.),我一款話靚,一款話唔靚囉...

約左上 Jack Creation 度落訂。
結果我都只係 join 左 1P1V,希望都會有我心目中想要既相啦。

註冊、擺酒、婚禮攝影、婚紗攝影、婚紗禮服、新娘化妝,基本上都搞掂哂,呼,鬆一口氣。

Labels: , , ,

Thursday, June 19, 2008

跟得媽媽

唔知點同亞媽講開換人仔,我話我都換左。
佢問我換黎做乜。
先記得我冇提過我向深圳影婚紗相。
佢好似好擔心我俾人昆咁。
又問係咪人介紹、又問有冇睇多幾間先、又問俾左幾多訂、又話要去間野睇下...
最恐怖係話影相果日要跟埋去!
@@
我梗係一口拒絕啦!
帶亞媽去影婚紗相...crazy...

Labels: , ,

Saturday, June 14, 2008

登記做業主

約左柴柴今日返去登記做業主,同約埋個相熟既裝修師傅去睇屋估價。
但柴柴今朝竟然唔知醒呀!
呢個情況平時只會發生向我身上...今日太陽係咪由西邊升起呢!?
更令人難以至信既,係佢竟然仲早過我到。
究竟發生乜事...@@"

登記完師傅都未到,我地就向屋企樓下間茶餐廳試個早餐。
總括黎講,味道唔係太好,蕃茄好酸、咖啡 no good、麥皮冇味。
(30/10 後記:間餐廳已經執左)

睇屋。
我地既要求起係地板、鋪地磚、拆牆紙、油油、拆走廊假天花、重建廁所、重建廚房...
師傅畫下公仔,度下尺。
有 d 位都有俾下意見我地既。
聽佢講邊度會同我地執下,邊度點整,覺得佢都幾細心幾有要求。
都 ok 既。

搞完就同柴仔出左沙田。
去到 ikea 果邊,柴豬先話唔係好舒服,其實想飲水。
咁梗係即刻返火車站果邊買水啦。
搞笑既係,我地買左支好大好大既水黎飲囉。
真係"吹"水。

夜晚出旺角,約左 d 大學同學食飯,有幾個比較少見既都會到。
佢地圍埋講 d technical 野,我發覺我真係好 out。
加唔到咀又唔知佢地講乜。

食完個小肥羊,唔飽得黎仲勁凍。
成班去 bar 再食過。
咪講笑,真係有人叫個餐。
同大家講左我地兩個既婚訊。
其實大家都係咁上下時候啦,有個一月都結喇,有人又已經買左樓準備。
嘩,呢兩年實俾人炸死。

Labels: , ,

Friday, June 13, 2008

Dream Magazine

我終於買左我既 Dream Magazine 喇。
其實只係一本 COSMOPOLITAN bride,有咩咁 dream?
因為幾年前柴仔同我講,網上 d 人話呢本野好多野睇。
但當時又唔係要結婚,無啦啦買本結婚雜誌好似好怪咁。
之後幾年見到佢出都冇買,費事以為我迫婚啦...hehe...
(注:COSMOPOLITAN bride 係每年出一次既,大概六七月出)
今日終於名正言順咁到手喇!

Labels: ,

Thursday, June 12, 2008

收書

訂左兩本考證書用既書,今日寄到。
亞媽估幾呢兩本書二百蚊。
都唔知話佢岩定錯。
呢兩本書的確係二百蚊,不過亞媽個單位係港紙,但實際個單位係美金囉。
二百蚊美金呀~

Labels:

Wednesday, June 11, 2008

帶菌者

今日發燒呀,但係仲返工。
我都係第一次發燒唔放病假,因為唔想引起無謂既猜測。
如果病菌不幸散播,唔好怪我,怪就怪人言可畏啦。

臨放工收到通知話柴家有飯局。
唔知係慶祝 d 乜呢?
飯前成家人一齊行實惠睇傢俬,我覺得好得意,好 warm 呀。
不過到時真係揀傢俬,我諗都係我同柴柴揀既姐,唔會搞到咁大陣仗既。

Labels: ,

Saturday, June 07, 2008

新娘化妝 - Candy Lam

約左 Candy Lam 11:00 試妝。
一朝早收到電話,Candy 打俾我,問我仲去唔去試妝。
佢話黑雨喎。
去又好似辛苦左佢,黑雨都要開工,唔去我之後又唔知點安排。
結果就為自己利益著想,照去。

我冇約人幫眼呀,只係問柴仔借左部相機。
覺得奇怪?點解要問柴仔借相機?因為我冇預佢會去架。
清潔好面,我拿個相機出黎,仲同 Candy 講,「我得一個人,要麻煩你幫我影埋相。」
過左一陣,我見 Candy 望住個門口,原來有個男人企左向度,原來柴柴黎左!
嘩,開心到飛起,好在今朝決定照黎咋!

都搞左成三個鐘頭呀。
搞左 d 咁既野:


感覺個妝 ok,但 set 頭冇 KK set 得咁 detail。
不過佢話當日會執得嚴謹 d。
我地又信佢喎,所以 join 左。
揀左出門註冊+晚宴 plan,盛惠 5388 大洋。
呼,又了一件心事。

約左哥哥下午上新屋。
試妝試到咁晏,所以 "lunch" 淨係食個雞批。
上樓之前去超市買甲由藥餌同殺蟲水。
甲由們,你地死定了!

上到去再左睇睇右睇睇,影左 d 相。
我話上手業主"那渣",有相為證架。

哥哥度尺,原來專業人士度尺,好求其之嘛,把尺斜都照計既。
不過呢個尺都係"係咁意"既姐,因為遲 d 裝完修,個尺都會唔同。

尋晚返去既時候,我向商場去左洗手間先上樓。
俾柴柴話我「屋企都有廁所啦!」。
咁我今日就返屋企去囉。
點知就出事喇...塞左...
究竟係因為低層會係咁丫,定尋晚玩塞左呢?
呢個...係一個...謎...

Labels: , ,

Friday, June 06, 2008

鑰匙主人

今日係收樓既大日子!
去律師樓搞埋最後 d 手續,新屋既鑰匙到手喇。
不過有得,都有失,仲好離奇 - 我地向律師樓唔見左把橙色直遮。
真係無理。

向唔係好熟路既中環區,返去未係好熟路既馬鞍山,我地選擇左搭巴士。
就係咁就出事喇。
等車等左好耐不特止,竟然用左兩個鐘頭由中環去銅鑼灣!
訓完又訓,再訓都未到。
個人醒哂,柴柴仲無聊到打機養魚魚。
返到去總共要成三個鐘!

向一個屋村落車搵食,可能夜得滯,冇乜好食,有又覺得貴。
呢度 d 生活指數都好似幾高下。
輾轉去到間茶餐廳,都唔平架,不過見係收樓大日子,又冇乜得再揀,豪一豪囉。

返新屋喇。
管理員問我地係乜水。
因為未登記做業主,又生面口,所以返屋企都要登記。
柴仔主持入屋儀式!
第一次冇跟人尾呀!
好開心呢~

四圍再睇睇,不過黑蚊蚊都睇唔到 d 乜。
我見柴柴仲好 pro 咁左睇右睇,向 d 去水位倒下水,沖下廁所。
好多甲由囉,上一手業主都幾"那渣"。
廚房個抽油煙機仲一大兜油。
哈,第時呢間屋個女主人唔知會唔會打理得好 d 呢?

Labels:

Thursday, June 05, 2008

細屋預覧

今日又放下晝假。
柴仔過黎同我一齊搭巴士去驗樓。

返到入去先食 lunch。
我地都不約而同諗住今日食 pizza hut 個滋味常餐,心有靈犀呢~

同經紀、今日仲係業主既業主一齊上樓睇睇。
之前間屋有傢俬,今日搬清哂,睇真 d。
柴柴,點解你間屋咁細既...嘻嘻...
其實都冇咩特別既,好快就睇完啦。
個舊業主搬上樓上,話如果有信可以轉寄去果個信箱。
之前又話搬出九龍既,而家變樓下搬樓上,大屋搬細屋?
唉,理得佢丫。

出返尖沙咀,去 Jack Creation 度睇睇,聽下佢地 sell,了解下 d 服務、收費。
冇即時 join,又係要諗諗。
個 2P1V plan 計埋晒相都幾貴下,過萬架。
但 1P1V 又冇相簿、又冇早拍晚播。
好似 d service 又少得滯。
等我掙扎下先啦。

講講下,原來柴仔已經覺得我向呢件事上大洗左...
冤...冤...枉呀...

Labels: , ,

Wednesday, June 04, 2008

串串手飾店

Lunch 行下首飾店,睇下有冇野岩。
入左一間叫 bijoux de Princesse 既舖頭。
有條頸鍊幾靚,幾似上次同 Noffy 睇果個款。
睇唔到價錢牌,行埋櫃位問下個"筲屎"啦。
丫,佢態度惡劣咁話開左收銀櫃,唔方便行開,叫我自己搵。
一便口又話睇岩可以平 d,咁我又問下折實幾多錢啦 (我咁樣問都好正常姐)。
個"筲屎"竟然話「你係買先講啦,今日未發市,唔可以第一單講價但唔成」。
@_@"
下,咁都得!?

Labels:

Tuesday, June 03, 2008

幸福爆炸

今日要去律師樓,所以下晝請假。
同事問我咁幾點放工,我好理所當然咁諗係一點,因為星期六都係一點。
點知 Double 話應該唔係,以前要點三,五天工作後應該要點半。
哦,咁勿點半囉,係肚餓 d 姐。
Richard 用好詭異既語氣問我做乜放半晝,講到我係去 interview 咁。
我淨係話我星期四都放半日,星期五都放全日。
佢仲要講到乜安排得咁密咁。
Double 向旁邊叫我話「關你乜事」。
唔知點解,我好介意,好怕呢個誤會。
所以就連今日本來想著裙去試妝,結果都係怕同事亂諗野而放棄左。

其他同事去 lunch,淨返 Double 同我。
佢竟然問我係咪就黎結婚。
咁我又唔隱瞞,照實話係囉。
又會咁心水清既。

同事食完飯返黎我都仲未走得。
13:23 仲收到指令話有隻 case 要今日做完。
Richard IM 我,話 time to go。
我冇為意,仲回話 yes yes。
跟住佢 send 多句 don't be late for interview。
我即刻嬲到爆炸,一句粗口回佢。

行去地鐵站既路上,同柴柴講電話。
我仲係唔開心,決定同柴柴講嬲到爆炸事件。
佢之前都講過理得人地諗乜,所以我都怕佢會話鬼我架。
不過就算係怕,我都要同佢講。
結果...柴仔做左消防員,救熄左我既怒火,嘻嘻。

六點半約左 KK 試妝。
之前柴柴話唔去架,結果都係同我去左。
我仲約埋燈塔表妹去幫下眼。
又化妝又 set 頭,柴柴悶到傻左。
見到佢咁,我覺得我好幸福...好變態呀~

因為就算即時 confirm 都唔會有回贈,雖然好心急,但都俾少少時間自己諗下啦。
化妝後既效果就唔獻醜喇,睇下 d 頭髮啦!

Labels: , , ,

Sunday, June 01, 2008

半空?半滿?

呢排睇有關婚禮攝影既討論。
有人建議個 snap shot 另外搵,唔好個個 P V 都搵埋同一間公司。
原因係一間唔好,都有另一間補住。
又好似好有道理喎。

咁我同柴仔講啦。
佢話:如果兩間都唔好,要去周旋既話,勿要分開兩間去,分兩次投訴,煩死呀!
又講得通喎。

諗諗下,佢地 d 睇法既分別,同問你果半杯水係半空定半滿咁似既~

Labels: ,