生活點子: March 2010

芥菜咸蛋湯 - 芋蓉排骨

Labels: 煮飯仔

沙爹金菇肥牛

柴仔主理-沙爹金菇肥牛
好似多水左 d 喎~
不過都好味，勁！

Labels: 煮飯仔

回來我身邊

都唔記得幾時借俾 Miffy 既兩隻范曉萓，今日返黎我身邊喇！
隱約仲記得當年佢向我屋企，企向個 CD 櫃前挑碟既情形。
早幾日諗起碟入面既歌，但唔見隻碟，只係聽左健康歌算數。
而家有得聽喇~

Oh 眼淚~~~

Labels: 點滴生活

一日四餐

因為我要做野，所以今日留左向屋企。
訓醒就做，做到夜晚七點，早餐要柴仔切蛋糕，lunch 要柴仔外賣飯盒，照顧周到~
:-*

走得甩走去計劃晚餐。
大廚斬雞，半隻薯仔炆，半隻整湯。
食完飯，臨時又要做多陣野...

做完野，兩公婆一齊玩人鬼情未了湯圓版~
我頭一次搓湯圓，都唔識點搓，柴仔好俾心機教我呀。
我搓糖心味，佢搓花生味。
佢話同我一齊煮野食好開心呀！
佢咁講我都好開心~

Labels: 劃火柴, 煮飯仔

生菜魚肉湯 - 蘿蔔炒魚肉

柴大廚既一魚兩味~

生菜魚肉湯 + 蘿蔔炒魚肉

Labels: 煮飯仔

超甜木瓜雪耳汁 - 西蘭花炒肉片

今日請左假睇中醫。
時間岩岩好，仲可以去搵柴公食 lunch。
陪佢去平時食飯既燒味店，陪佢去搵 RAM。

送佢返工後搭巴士返屋企。
塞車呀，訓醒見到公園，差 d 卜落車。
點知原來仲未過海，我見到既公園，係維園......

今晚我下廚。
個菜好味(雖然柴仔話咸左 d)，但個湯...慘不忍睹...
雪耳煮得耐得滯，又小水...好杰...
蜜棗落得多得滯...超甜...
結果，柴仔要加水煲過...
:-P

超甜木瓜雪耳汁

西蘭花炒肉片

Labels: 煮飯仔

迷失書局中

lunch 時間有時會走去書局睇下書。
之前咁岩見到一本張小嫻小說冇封到，就日日去打釘打左佢。
其實好耐冇睇過佢 d 小說喇，係之前同 Rice 傾計講開，又想睇下。
好在趕得切釘完，之後已經封返喇！

今日再去書局，有好多好多書既書局，突然乜野書都提唔起勁去睇。
語文書，睇左用唔到。
經濟書，睇左我又冇心去玩。
勵志書，講既大道理我都懂。
旅遊書，又唔係去。
愛情小說...唔...好似太唔現實。
...
咁大間書局，咁多書，我竟然唔知有乜好睇。
好似好 lost 咁...

Labels: 點滴生活

High Tea

又係消費 cash dollar 既時候。
我地又黎到又一城買 cash coupon。
因為上年太多使費，今次有幾百蚊。
我地走去 Queen's Konditorei High Tea~
每人一件 cake 一杯咖啡幾件餅仔。
哈哈，好優遊咁。
埋單一百五十四蚊，真係豪~

Labels: 劃火柴

咸味綠豆沙

上水 Miss 剪左 d 自己種既有機臭草俾我地。
初初我地都話唔要，但剪左，有人要，我地又要 d 囉。
向火車谷 d 臭草味出黎，真係幾大陣味。
去買海帶今晚整左佢。
咁多人拿左，會唔會其實得我地真係有煮呢？

d 沙搞到個煲蓋好 "lau gau"

製成品...ok ge...咸咸地囉.....

Labels: 煮飯仔

愛心早餐

今朝既占醬治早餐，好味到不得了！
好幸福啊~

Labels: 劃火柴

80後買樓

轉載自：
http://hk.myblog.yahoo.com/misssheep-sheep/article?mid=4
http://www29.discuss.com.hk/viewthread.php?tid=11711554&extra=page%3D1&page=1

==============================
一直以黎,我係discuss都係「塘邊鶴」，好少發post.但呢排睇到唔少人講80後買樓問題，令我有感而發，同大家分享一下。

我係80後，都係大學生，仲要係三大其中一間既畢業生。一直以黎，我都係屋企既希望。一家住公屋，一家五口只有老豆萬多元收入，所以屋企都好想我大學畢業，可以改善家庭環境。但好不幸，畢業時正值03年沙士，當時大學畢業生既起薪點大概係6000至7000蚊。同年我老豆又退休，兩老都需要我份家用，真係屋漏更兼逢夜雨。

03年我寄左差唔多二百封信，見左幾十份工，都無一份請。我第一份見既工係同我本科完全唔相關既物流文員，人地問我「你咁既學歷做文員，會唔會有0的委屈?」，當然最後佢都無請我。果陣見工行到腳都損，有一次忍唔住係街度喊左出黎，問自己點解會咁慘? 最終幾經辛苦終於搵到一份同本科有關既工作，月薪8000，對當時既我，已經係欣慰。不過睇住人地學歷同我差唔多，人工高我咁多，真係覺得好唔抵。

我好記得自己第三個月出糧，係1月份，亦係第一期grant loan還錢既時候。8000蚊月薪，4000蚊俾屋企，4000幾蚊還grant loan,一出糧乜錢都無洗過就嘔突，真係心傷。果陣唔好話買樓，開飯都有問題。

果時我不時思考自己既出路，終於有一晚俾我諗到: 我成日以為自己係名牌大學畢業好叻，但諗深一層，我毫無經驗，而比起同屆畢業生，我又無過人之長，咁人地憑咩請我呢? 記得果份物流文員，人地要求我打字，但我打左老半天依然未打完，仲要錯字連篇，人地又點請我呢? 於是，我努力做資料搜集，知道原來香港有好多只需花幾百蚊去考，但政府認可既資歷、證書。我係半年間，放工後隔晚去上堂，再返屋企溫書，雖然辛苦，但考到唔少資歷、證書。

重新裝備後，我再去搵工。結果僱主睇到我呢半年不斷進修，覺得我努力、肯學，終於請左我。我終於做到自己想做既工作，人工亦加左一倍，到約16000蚊，不過之後就減薪，減左千幾蚊，但對於當時既我，好似中左六合彩頭獎咁。

多左人工，但我無亂洗錢，第一個目標唔係買樓，而係還GRANT LOAN。由於我係大學時拎到相等於一年學費既獎學金，再加上我一直以黎既儲蓄，同埋慳慳埋埋既GRANT LOAN餘款，我終於係05年，比還錢期限早三年一次過還哂GRANT LOAN。雖然無債一身輕，但荷包亦輕到飄起，又要重頭再儲。

還哂GRANT LOAN，我終於可以計劃一下自己既財政。06年我同男友計劃結婚。佢同我都係公屋妹、公屋仔，無咩家底，於是要一齊儲錢，亦計劃買樓。我地都係慳家一族，環境最差既時候兩個人分一個美X快餐食，但日子就係咁過。而我係一年半以來努力做資料搜集，睇下有咩適合既樓盤。

係努力之下，08年我地終於係市區買左一層約200萬既樓。好多人都要求買新樓，但我卻只求安樂窩。雖然樓齡10多年，只有約五百呎，但兩口子已夠住。最開心既係單位兩個房都向海，真不枉我做左咁多資料搜集，去左咁多區睇樓，終於有自己既安樂窩。單位做九成按揭，首期都係20萬，連雜費約三十萬。由於我鎖定已裝修單位去睇，連裝修費都慳返。層樓按30年，月供都係8000幾蚊(連管理費)，對而家家庭月入約4-5萬蚊既我地，負擔不重。就算上年金融海嘯，我男友俾人裁員，靠積蓄都依然供得起。

而係呢幾年，除左買樓，我地仲係早幾個月前結左婚，婚禮所有洗費由我地負責;我仲係兩年前開始讀MASTER，今年結婚兼畢業。

係咁多年黎，我都無點投資股票，但依然可以做到結婚、買樓同埋讀書，同時每個月都俾家用屋企，一切全靠儲蓄同埋財政規劃。

係呢幾年，我放棄去買名牌、買貴衫、幾乎無去過旅行。可能你會覺得好難，但如果你真係想買樓，你就會放棄得到。到而家我結左婚、買左樓，有唔少朋友羨慕，而我而家仲有大把時間可以搵錢去買呢0的奢侈品，何需急於一時?相反我有唔少朋友成日換電話，又i phone又i pod,一年去幾次日本，但就歎樓貴買唔起，我真係愛莫能助。

大學生，其實就算唔係大學生，係出黎社會工作頭幾年一定係要捱，買唔起樓係必然既。係我打8000蚊一份工仲要還grant loan既時候，我絲毫無諗過要買樓。無咁大個頭，何解要戴咁大頂帽? 如果一畢業/畢業頭幾年就個個可以買得起樓，咁即係代表樓宇已經無價值，不買也罷!而家唔少同我同齡或者年紀比我小既80後大學生，拎住學位打份萬幾蚊既工，好似我當年咁怨天怨地。少不更事固然係原因，你當然可以繼續怨，而討論區都係俾你怨既地方，你無唔0岩，但世界唔會因你怨而停住，樓依然咁貴，或者更加貴，倒不如想想點樣可以裝備好自己，搵一份人工高0的既工作啦!希望睇完我既分享後，會幫到你。

當然，我都唔認同發展商起縮水樓，同埋認為政府應該復建居屋，等人地有多0的選擇。但經我呢幾年不斷搜集資料，其實港九新界都真係有唔少百幾萬既細價樓可以買架，你去中原地圖查下各區成交就一清二楚。所謂"上車盤"，即係樓既入門階，層樓買左係可以賣架嘛!暫時住住先，待價而沽，就可以換另一層大0的既樓啦!唔需要一買買成千呎新樓呀!如果幾年都唔將就，咁就真係到頭髮白都無辦法買喇!又前年、上年既價都唔高，咁點解之前唔買，今年貴先黎話買呢?簡直違反投資原則。而家每幾年就一次調整，想買樓既無需急於一時，可以儲多兩年錢，等平0的再買啦。如果你又嫌舊樓舊，又嫌面積細，但自己又係洗慣玩慣、講求生活品味既"月光族"，咁呢個應該係你既錯，而唔係社會既錯!

社會從來分等級，安居從來唔容易，唔係都唔會有「安得廣廈千萬間」之歎。我從小就係窮人，出世時住木屋，跟住係公屋，我唔會睇唔起窮人，我而家都只不過係個草根中產。窮人安貧樂道，要比富翁無病呻吟幸福得多，你睇不時有富豪自殺既新聞就知。60、70年代既窮，係指無飯開，就餓死;80年代打後既窮，卻係指買唔起樓，買唔起i phone、電腦。

如果我到今日都買唔到樓，仲係8000蚊人工，我依然會檢討自己有咩做得唔好，繼續努力。如果自己日日係個網罵人"onX"，但寫篇文章又白字連篇、文句不通，咁點叫人俾高薪請自己呢?人貴自知，我知道自己無能力買樓，就唔會買，而唔係怨政府、怨社會唔幫自己。細個既時候見到0的零食貴，買唔起，大人都會教細路儲錢買或者睇下第二度會唔會平0的啦!唔通走去同人嘈，叫人減價咩?不過話時話，而家0的家長又真係會自己自動幫細路俾錢，或者走去話人地，真係好笑!

為咩政府一定要幫我呢?人從來都係要為自己既生活負責架啦!政府真係要幫既，就係發展經濟、創造職位，而唔係派糖!你俾條魚人，不如教人捉魚，而家政府就係成日俾魚人，好多人唔識捉魚，就問政府拎，仲要埋其他野，我睇下點收科!一個乏善足陳既政府，搞到百姓無哂志氣，一味祈求幫助，悲哀!

我會繼續為自己既生活努力，我會繼續儲錢，但今次會儲黎投資，希望有第二、第三間物業，希望各位80後大學生都唔好再自怨自艾，繼續努力，希望你地都好快有自己既物業啦!

睇完我呢篇文，如果想話我"onX"，則可免，我唔會為你一兩句而有咩損傷，但可憐你依舊係一隻無殼蝸牛。如果我篇文能對你有一點啓發，就不枉我打字打到手軟!

歡迎大家轉載，但麻煩轉載前通知一聲或於轉載時登出原文連結:
我的blog http://hk.myblog.XXXXXXXXXXXXXXXXX (有新文章);

http://www29.discuss.com.hk/viewthread.php?tid=11711554&extra=page%3D1&page=1

謝謝!
==============================

睇得真係好有 feel！

畢業七年，我都係普通一個打工仔，唔識投資，只係儲錢。
我還哂 grant loan，讀左個 master，讀左個 dip。
同柴仔各自都要俾家用，向冇屋企人資助之下，我地買左樓，結左婚，去左日本渡蜜月。
我地點樣可以做到？ d 人點解做唔到？
諗下 d 人一年去幾多次旅行，拍拖時間做 d 乜食 d 乜，用緊既係乜野手袋，乜野型號既電話，著緊乜野衫衭，身邊有幾多樣野係必需品？
食好著好用好玩好，唔好同人怨冇錢賣樓。

向 facebook share 出黎，有人再 share，佢既朋友質疑係咪屬實。
我冇向佢果度回覆，費事好似搵交嗌咁。
口講「全部屬實，並非冇可能，只佢唔明白，我了解。」，心諗「你做唔到唔好話人唔得囉！」

Labels: 點睇