51屆夏日婚紗及結婚用品展
又去結婚展喇！
行之前去麥當當食 lunch。
又傾下間屋既佈置。
諗諗下床尾有個空位，所以問下柴柴果度放乜野好。
俾佢笑我囉，話唔係每一個角落都要塞滿野架。
哈，住慣細屋係咁諗野架啦，要密鋪平面架嘛。
今次入去結婚展，主要目的係睇下婚禮攝影、租車同花球，其他都七七八八。
所以柴仔一路行，一路口up up "唔洗喇" "唔洗喇"，免得人塞傳單俾佢。
行過一間爵士紅酒，見賣 99 蚊支，柴仔一口肅亮腔「爵士紅酒，只需九十九。」，我差 d 暈低。
佢仲要一技兩用，經過三洋賣按摩椅，又講「行得支力咩，黎三洋坐下啦。」
笑死我。
睇花球，研究下鮮花好定絲花好。
一般柴仔只會答「你鍾意啦」，但今次佢話鮮花好。
佢咁肯定既原因，竟然係因為鮮花冇得俾我留低做紀念，少樣垃圾。
=.="
離開會展，經過轉角果間精品店物體，見到麥兜向度等緊我，所以埋去睇下佢囉。
一睇，不得了，佢竟然扮成咁：
真係好想帶佢返屋企。
想~
Labels: 劃火柴, 星期三緊, 結婚展
新娘化妝 - 預約
今朝打俾另一個 MUA KK Chan，叫佢 send d 相俾我睇。
費事 send 去公司，所以叫佢 send 去 yahoo，諗住返屋企睇。
本來真係諗住睇完相先再約架，但我實在太慌喇，所以諗諗下都係約左先。
放工碌出尖沙咀。
其實都唔太肯定百利向邊，但咁岩行天橋既時候，前面有兩個女仔講試妝，哈，跟住佢地應該冇死。
的確冇死，嘻嘻。
呢個 MUA 叫 Candy Lam，網上面冇獨立 topic 講佢，都係一 d 約唔到 Jacko 既人向 Jacko 個 topic 講佢，都 ok 既。
睇下佢 d 相，睇下現場試妝位小姐，都決定約佢試妝囉。
返屋企 check email，Christy 話佢病左，免得浪費我時間同錢，cancel 星期六個試妝。
之前都心大心細唔知仲試唔試佢好，因為 KK 同 Candy 都好似幾好咁。
而家唔使諗lu...
命運既安排真係奇妙~
Labels: 新娘化妝, 星期三緊
新娘化妝 - Jacko Lee
為左搵化妝既事，今日超勁量級 down。
Jacko Lee 係 ESDlife 入面都幾多人 book 既 MUA。
我早個月已經搵過佢想約時間，但佢話出年年尾既 job 未接住，要六月先開始接，叫我六月再打去。
我已經諗左5月31日夜晚打俾佢會夜得滯 (我諗 MUA 多數盡早訓 keep 靚靚)，所以計劃6月1日一返工就打俾佢。
點知今日向 ESDlife 個 forum 睇同一日結婚個 topic 既 post，已經有人 book 左佢...我...已經太遲... 我真係唔開心到唔知點講...
我又唔係冇打去問，係佢話 6 月先接，咁我又冇理由日日打去問佢接未架嘛。
我覺得我好似俾人呃，俾人出賣咁。
我又一心諗住搵只係搵兩個 MUA 試試 (約左另一個 MUA Christy Wong 31/5)，又唔可以話我之前唔搵多幾個保險...
唉...
搞到我下午好冇心機做野，鬼鬼祟祟咁搵 MUA 資料。
搵到個 Kat Chan d 相好似 ok，即刻打去問，但都係俾人 book 左...
心仲慌...
柴仔都搵 d 資料俾我睇。
見有人講話 Jacko 有 partner 都 ok，即刻打去問，仲約聽晚去睇佢試妝。
唉...好擔心呀...
Labels: 新娘化妝, 星期三緊
五百日
距離我地既大日子，仲有五百日！
今日特登打俾亞利。
因為佢之前講過為每人預一個 "ang"，幾時要俾人情就會拿個 "ang"。
咁我提佢一日起碼要儲一蚊囉。
佢亞妹有人要喇~
Labels: 星期三緊
聚會背後
今朝要返工，約左柴柴放工行德福。
佢向德福等我，都唔黎接我放工，差幾步路之嘛...嘻嘻...
一路等、一路食，都睇住 d 雜誌，睇下 d 草圖，計下 d 尺寸，唔，好期待呀。
呢個時候去德福，當然唔會放過 IKEA 啦。
拿住把尺度度度，睇下 d 示範單位，一路改良我地既設計。
客廳、飯廳、大房都一路諗，但細房就諗都冇諗過。
柴柴話放個掛衫架同個抽濕機入去，做乾衣房。
嘩，好奢侈呀~
夜晚同 E 記既人食飯。
馬仔係咁問我係咪有野宣佈，我仲以為阿嬌話左俾佢知。
原來只係空問，不過我都宣佈左喇。
好似早得滯講，但問到唔講又講大話咁。
既然唔係 d 唔見得人既事，大大方方同大家分享囉。
散水，同 Lion 去地鐵站。
傾左好耐，就咁企向地鐵口傾。
唔講唔知原來佢咁唔鍾意呢個聚會。
俾馬仔佢地咁話太冇意思囉。
唔...都唔知點講好...
笑話一則：
叫小菜既時候，有人提議叫 d 菜。
有人諗一諗之後，竟然...
「咁叫回鍋肉囉」...
(圖片顯示有小量伴菜)
Labels: 一片瓦, 劃火柴, 工場 E
柴之家
柴柴 send 左個圖俾我睇。
係用 Sweet Home 3D 畫我地屋企既 3D 圖，仲係安排好哂 d 傢俱既。
呢個係客廳
嘩，成個圖好靚好靚好靚架~
好 dream 呀~
Labels: 一片瓦
午餐小聚
為左 d 按揭文件，柴仔 lunch 碌左去九龍灣。
第一次同柴柴向返工既日子一齊食 lunch。
雖然好趕好趕，雖然只係食麥當當，但係...
有了你開心 d，乜都稱心滿意，鹹魚白菜也好好味~
Labels: 一片瓦, 劃火柴
默哀
定左今日 14:28 會為四川大地震既死傷者默哀。
其實 14:27 已經準備好架喇，但同事將一個電話 forward 左俾我，耗左我十幾分鐘，搞到我默哀唔到。
雖然形式上我做唔到，但我都送上左我既祝福。
加油~
Labels: 點滴生活
獲利回吐
尋晚肚痛，仲嘔左 dd 野。
唔知會唔會係廟街 d 野食。
問柴仔，佢又冇事喎。
佢話我尋日都係唔妥架喇，成日都叫肚餓。
好似要入貨去痾去嘔咁。
咁都得？
Labels: 劃火柴
披嫁衣 - alpha
約左 Loffy 同 Noffy 去試婚紗。
我只係約左三間婚紗店，時間如下：
13:00 紫水晶
14:00 溫馨
15:00 Vianei
我見網上面有人去齊港九新界試幾十間，我就冇咁好氣喇。
先上紫水晶。
上個星期去睇過，記底左 d 心水型號，所以好簡單。
個姐姐搬左 d 衫出黎，有 d 同想像中有 d 分別。
因為未係 join，所以只可以試幾件。
換第一件既時候，心情好緊張架。
之前向 ESDlife 都同幾個女仔講過，好擔心著住件婚紗出黎唔知另一半會俾咩反應。
諗起益力多個廣告就搞笑。
http://www.youtube.com/watch?v=SaABX0oxJXk好在柴佬都冇表現得好驚嚇，我都安落 d。
跟住上溫馨。
唔知係咪燈光效果，佢果度 show 出黎既婚紗好以靚 d。
不過果度冇相睇，全靠個 sales 姐姐根據我既口味去搵 d 衫出黎俾我睇。
清得黎又要 d "撈搞"，唔要紗紗，對稱 dd 既...
同埋只係可以試婚紗，佢話因為晚裝款轉得快喎。
試左三件婚紗，都好鍾意呀。
最後上 Vianei。
Loffy 尋日先至陪完 friend 去，所以 sales 姐姐都認得佢。
初初睇相，冇乜幾多件揀得落手。
不過既然都黎到，都試下囉。
試左兩至三件啦，都係唔使穿鋼紗既款。
嘩，件婚紗同件紛紅晚裝都好得，閃得好靚。
可惜我諗住要一件婚紗加兩件晚裝，果度我揀唔到第二件晚裝。
貨比三家之後，肚餓。
明明睇衫之前食左吉野家，又會咁快肚餓既，乜試衫好 side 力咩？
去間餐廳坐低食個下午茶，慢慢諗清楚。
最後決定 join 溫馨。
食完野就返去 confirm。
要左四套衫個 package，三千四百八十蚊，再加小拖尾五百蚊，總共盛惠三千九百八十個大洋。
諗住租一件婚紗、兩件晚裝同一件伴娘衫。
男禮？唔係我唔俾柴仔揀衫呀，係佢話鍾意普普通通一件西裝。
咁佢鍾意囉，我又唔專制既，嘻嘻。
(後記：我笨左啦，返屋企睇返人地 d 討論，話可以講價 free 拖尾架。而家只係俾左個加衫 discount 我。)
今日只係揀婚紗，晚裝會婚前半年先揀。
換衫速度好快，揀衫有 d 壓力，因為 sales 姐姐成日要我 out d 衫。
其實件件都好靚(我要求好低)，所以好難決擇。
又唔影得相(今日試咁多都唔影得，真係 join 都唔影得。)，好難記得著起個效果。
最後揀左件裙身泡下泡下既。
呵呵呵，又搞掂一樣野。
Loffy 要走先喇，Noffy 同埋我地去訂註冊場，順便等佢都拿下資料。
我地決定左揀世紀見証呀。
望多兩望個堂，決定要 Rose Hall。
雖然唔係粉紅色粉絲，但係怕 Century Hall 黃得滯，又唔顯件紗，所以揀 Rose。
場地唔係好大，六七十人左右就會好熱鬧，希望我會安排得好啦。
又倒多三千二百四十個大洋落海喇。
Noffy 夜晚去飲，我地就向旺角散。
真係唔知點解，我又肚餓。
走去廟街食蠔餅、煲仔飯、飲支裝可樂。
食完行下街，經過 Bossini，俾件衫吸左埋去。
係小公主呀！
不嬲慳家柴仔都忍唔住手，用九十九蚊買左一套 (一件衫加一個袋)，仲即刻著左件衫。
柴仔話佢搭火車既時候，有個男人望住佢心口呀~
哈，笑死我。
Labels: 劃火柴, 婚姻註冊, 婚紗禮服, 星期三緊
龍鳳鐲 - 嘩嘩嘩
向網上見到呢張相，我眼睛跌左落地~
註冊-睇場
今日我做領隊，帶柴柴去睇註冊場。
唔係好想搵律師到場。
因為我怕有人掛住食野，我地宣緊誓，佢就向度食花生飲汽水，諗起都掃興。
又怕酒樓 king ling kan lan，幾唔莊嚴呀。
另外搵個場，仲可以叫 d 唔請去飲既人黎，幾好咁。
註冊場，最多人知都算係伊甸園既。
但係就好似好多 bad comment，所以既然有其他選擇就唔睇呢間。
第一站去中港城既世紀見証。
http://www.centurywedding.com.hk/
幾易搵，地方幾開揚。
感覺唔錯。
第二站去尖沙咀中心既 2 in 1。
http://www.2in1.com.hk/
柴仔一聽到個名就話「二合一!?洗頭水牙？」
間野向地庫，感覺幾迫。
有人行完禮，混混亂亂咁，都冇入去禮堂睇就掉頭走。
out~
最後一站係諾士佛台既緣美傳說。
http://www.eternalring.com.hk/
比較難搵 d，同埋地點有 d 怪 - 諾士佛台裡的商業大廈的婚姻註冊場。
內裡環境都 ok 既，聽個男仔介紹，覺得佢地都幾有 heart 去經營。
場就睇左喇，其實都有心水既，不過我唔會咁爽快，諗一個星期先啦。
當然...呢個星期我又會有排驚...
仲有時間，走左上紫水晶睇婚紗。
第一次為自己睇婚紗，好心動，件件都覺得好靚。
我都冇乜要求丫，想係一字 low cut，唔想係吊帶，唔想係紗下紗下果 d。
俾柴仔發現左我睇住一頁唔揭...hehe...因為見到件紫色蛋糕好靚嘛。
約下個星期去，真係搵幾件試下上身...呵呵呵~
今晚柴仔要去飲呀，一改佢恤衫西褲既形象，只係借哥哥件野性恤衫同著牛仔褲，反而平時爛撻撻果 d 就執正左。
人人都覺得出奇，每一個人到就問佢一次，哈哈，問到唔想答。
我叫佢去做探子，睇下人地點安排。
口口聲聲叫我咪傻啦，但勿又係有睇到...讚讚~
學到要安排好影相時間囉。
我都想去下飲，偷下師，可惜短期內未有機會。
不過...點解偷師都要咁貴"學費"既...
==========
今日柴仔金句「有太陽既地方都係黑暗既」
(唔記得無啦啦做乜咁講，不過好玄，所以寫低左。)
Labels: 婚姻註冊, 婚紗禮服, 星期三緊
今日家居
上次同柴仔行 Megabox，發現左一間家居設計書既舖頭。
join 做會員就可以上網睇佢 d design 既相。
上次冇 join 到，今日我呢個兵仔就走左去 join。
用左一百三十八個大洋，有三本書送返。
揀 login 名既時候有 d 頭痛，用哂兩個人個名又驚痺死個 sales，結果我只用左自己名。
本以為柴仔會無所謂，點知同佢講，佢話點解冇佢份。
i ya...
Labels: 一片瓦, 劃火柴
結婚節
今日去左結婚節。
贈品就好多喇，但係就冇乜野睇。
尋晚唔知今日會唔會有餅咭賣，所以都計下數先。
一問亞媽，計左條數，眼睛跌左落地下。
長輩要每張帖四張餅咭喎。
暈~
好在今日冇餅咭賣，可以將呢個難題推遲 d 至諗。
睇完結婚節，行去 Megabox。
開大餐呀，食雞蛋仔、雞髀、仲有齋。
不過有人投訴話我食哂佢隻髀囉。
去 Spotlight，柴小朋友扮忍者，我唔係扮怪獸，不過都俾呢個忍者暗算左一野。
心痛死佢。
行 ikea，見到人地拿埋個floor plan 向度度度度，我都好想呀。
不過我地又唔知 d 尺寸，要收樓去度至知，好期待呢。
柴仔話過佈置就等我諗。
我睇住 d 傢俬，呢件又好，果件又幾好。
但柴大爺話呢件唔得，果件唔好。
喂，俾份 guideline 我好喎。
Labels: 一片瓦, 劃火柴, 星期三緊, 結婚展
奇華特
今日過左海，去買 girdle。
上次平日去都見有人排隊架喇，但諗唔到假日會誇張成咁，排到去樓梯。
細細既舖有三個剛好企到一個人既試身布格、四個店員左右。
都真係好多準新娘、伴娘、姊妹去。
有 d 係之前買過結婚用既覺得好，返黎買平日用既。
仲有媽咪帶發育中既女黎買。
試果陣蔡太會落手教埋點穿，我又唔覺得尷尬喎，最緊要效果好，呵呵。
等試、試、買、等改、覆試，總共用左三個鐘，條腰支力到死。
要靚，無計。
Labels: 婚紗禮服, 星期三緊
//
29/9/08 15:34
燎原火 //
31/8/08 19:10
