心細如柴
人都未訓醒，就有電話黎叫外賣。
死機要買 harddisk 囉。
噫，但係佢好似冇講地址喎。
享受一個美味既咖哩海鮮杯麵至出發去採購。
送完外賣再同小王子同小公主行街街。
今日要行耐 d 喎，因為屋企要吸塵。
佢地都行到好支力喇，小王子仲賴向地下唔肯行，要抱佢返屋企呀。
六磅左右都抱到我手軟。
返到去換鞋果陣，柴仔突然跑向小王子。
我心仲諗，除帶姐，趕到鞋都唔除既？
後來至知係小王子抽根。
見到佢好辛苦，震哂，好驚咁，我好心痛呀。
柴仔一路抱住佢，安慰佢，慢慢慢慢至好返。
柴仔話之前都試過係咁，佢仲開返個 file，記返低幾時幾耐。
佢真係好細心，好鍚佢地呀。
今晚叫 pizza 食。
我好似第一次叫外賣咋，叫到論論盡盡咁，好在都有野食。
叫左蟹腳軟心脆邊批、挪威三文魚意粉銀包、意式雞皇焗飯、法式田螺伴焗薯蓉、香焗小食拼盤、鴨胸田園沙律、南瓜湯。
柴柴話做乜冇叫鍾意食既海鮮寬條麵，唔知嘛，下次囉。
咁多野都食得哂，冇剩野，幾好幾好。
上水遊
跑完步返屋企，唔知點樣講到「一成不變」呢句野。
柴仔話一成不變，咁即係有九成變左。
點解咁似小學生 d ETV 既？
食完飯柴仔安排左上水遊，係打算去睇下人地開操既。
出左火車站都行好遠下，幾偏僻咁。
果陣仲話得閒都去操下，唔...咪搞
去到，點解靜英英既？呢 d 活動唔會收得埋架喎。
兜左個圈都唔見人，新年休操卦，走人。
柴仔話佢去過果度一次架咋。
話咁都識路再去，係咪好犀利，同佢去邊都好有安全感喎...
er...em...hehe...
行過 d 小街，見到有間舖頭門口好多人排隊。
我地走埋去睇下，原來係賣鍋貼既，叫君滬鍋貼大王。
又排埋一份，試下係咪好正。
排排下見到 d 豆腐花既相，好似又好靚咁，索性坐低食。
叫左五隻鍋貼加一個豆腐花，又真係好好味喎。
上水遊都有 d 意外收穫。
返超級城行多個圈，山長水遠買 d 杯麵先返屋企。
(提提你：記住 9 度呢個牌子，買枕頭記得搵佢。)
見哥哥買左 d 電腦風扇返黎，搞一大輪，發覺買錯哂。
仲慘到本來只係壞風扇，最後搞到機都開唔到。
柴仔要出手喇~~
小插曲：
去洗手間既時候有人熄燈，我即刻叫左出黎。
我係好細膽，好怕黑架。
記得以前 (十年內既事) 有人嫌我沖涼沖得耐，走去熄左個廁所燈。
我仲更加郁都唔郁，停左沖涼，蹲向地下喊，好耐好耐先出返黎。
之後果排沖涼我都靜靜雞帶埋棧床頭燈 (PC 狗電芯燈) 入去。
哈，諗起都好笑。
解網癮
大地震之後乜網都上唔到。
(其中一個令呢度咁唔 update 既原因...)
但硬係都要開電腦，又唔知做乜好。
最終走去煲之前搵落既戲，聽左好多次呢句野：
"Tell me what you don't like about yourself."
如果人地咁問你，你又會點答？
好文采
「嫁雞隨雞，嫁狗隨狗，嫁著馬騮通山走。」
「咁嫁著你呢？」
「勿早 d 透囉。」
大吉利是...
激死我...
再見德州意粉
今日睇到新聞，話哈迪斯結業。
係有 d 感觸既，話哂我都曾經係佢個德州意粉既忠實番薯。
**************************************************
快餐店哈迪斯明日結業
(明報) 12月 27日 星期三 12:50AM
本港美式快餐店哈迪斯由於未能就特許經營牌照續約達成協議，將於明日全線停業。
哈迪斯位於中環及馬鞍山兩間店將於明日停業，灣仔分店已貼出租約期滿的告示。
炸彈
約 1:00 老地方等，12:59 就到左，邊有遲到喎。
拿完份屈返黎既贈品，返學校食飯。
叫個紅燒雞髀河，唔同左以咁既樣喇。
而家呢個係哂我怕怕既蒜蓉，都係以前果個好味 d。
食完搵牙籤，哎呀，敗露左唔係呢度既人 tim。
出白區行，用左軒仔爸爸送俾我既雪糕券。
食個三球丹麥筒，揀左櫻桃、無花果同 summer burrey 味，仲有得加生果 (桃)，加醬 (奇異果醬)同加伴點 (朱古力碎)，好豐富架。
食落係略嫌甜左 d 姐。
夜晚約左大學同學食飯，主要目的係收紅炸彈。
不過呢個同學都好笑喇，寫錯哂 d 名。
姓鍾變姓鐘，柏字少左一劃，姓丘變姓邱，叫亞淦變左亞鑑。
唔怪得佢既，我地邊會研究人地個中文名丫。
有時都唔係好明，點解食完飯硬係唔捨得走，係都要去飲下野，食下糖水，好飽架喇嘛。
好似今晚咁，去左 Starbucks。
叫咖啡又怕訓唔著，飲古力又太飽，係咁二飲支果汁，咁又使多幾十蚊。
唔抵丫嘛，又唔係特別，又唔係好飲，食糖水好過，實在 d。
佢地係咁吹水，但柴柴好靜咁坐向度，佢話唔岩話題，搭唔到咀喎。
悶嗎？
紫白飛星
這個聖誕，野牛十字斬轉生為紫白飛星，從出江湖...
聖鬥士星矢冥王十二宮篇
尋晚睇星矢。
其實以前細個都冇睇過，只係知道個主角叫星矢，有招叫天馬流星拳。
但柴柴就好似好鍾意，十二點三個到點三，唔訓都睇。
一路睇，柴柴一路解畫，話我知 d 故事背景，邊個打邊個。
都好複雜下，一下子都記唔到咁多人。
不過睇得好開心，嘻嘻。
Let's Party
今日冇跑步呀，起身仲未退燒。
唔食醫生 d 藥，自己搵粒退燒藥食，再訓，好以好 d。
爭扎左一陣，都係照去個 Xmas party。
仲要去買禮物先，我都好有心。
上西九龍睇，買左個我都鍾意既黑豬豬咕o臣。
好耐冇見 d 師兄弟姊妹，有 d 新人都唔識 tim。
到左抽獎既時間，其他人既禮物都幾好。
我拆我果份，係一個玩具，叫做 20Q。
送出既人話好好玩，問你二十題問題就知你諗緊乜野。
唔...我交唔到戲，扮唔到開心，佢都交唔到戲，明顯係二手野。
咁就使左一百八十蚊，好唔抵。
試睇
今日返到公司覺得病病地。
想 lunch 前去睇醫生，點知 network down 左，駱駱又放緊假，唔敢行開。
老闆俾去 lunch 先去睇。
第一次睇呢個醫生，同事話 ok，試下囉。
睇醫生既時候冇發燒。
食完藥，發左一個下晝夢，返到屋企探下熱，發燒喎。
係咪即係個醫生唔得？
心靈又相通!?
今朝早望個電話既 screen，都覺得係小左 d 野架喇，不過又講唔出。
下午老闆返黎，問我收唔收到佢上午 send 俾我個 SMS，我話冇喎，先再搵個電話出黎睇睇。
老闆試打俾我，都打唔通，問我係咪 set 左佢個電話係 ignore list...
問柴柴對下，原來小左個 G 字，即係會收唔到打唔到電話。
佢都有打過俾我，就係都打唔到。
reboot 過之後就正常返。
柴仔約我今晚食飯呀。
佢隨口問句今晚食乜好，我話今次冇諗喎。
佢又話我地心靈相通，因為佢都冇諗。
要唔要搵解電視毒既藥俾佢呢？哈哈。
後晚有個 Xmas party 要買一百蚊既禮物交換，食完飯順便睇一睇。
一路行柴仔都有 d 提議，但都係睇唔岩。
實用既又會俾人話，唔實用既我又唔想買。
唉，好難買呀！
獵戶座
尋晚臨訓前，望一望個天空，見到獵戶座。
突然一陣冷風吹過黎，唔知點解，令我諗起呢首歌。
別怕我傷心 - 張信哲
曲︰李宗盛
詞︰李宗盛
編︰鮑比達
＊好久沒有妳的信 好久沒有人陪我談心
懷念妳柔情似水的眼睛
是我天空最美麗的星星
異鄉的午夜特別冷清
一個男人和一顆熱切的心
不知在遠方的妳是否能感應
＃我從來不敢給妳任何諾言
是因為我知道我們太年輕
妳追求的是一種浪漫感覺
還是那不必負責任的熱情
心中的話到現在才對妳表明
不知道妳是否會因此而清醒
讓身在遠方的我不必為妳擔心
＋一顆愛妳的心 時時刻刻為妳轉不停
我的愛也曾經 深深溫暖妳的心靈
妳和他之間是否已經有了真感情
別隱瞞 對我說 別怕我傷心
重唱 ＊,＃,＋,＋
空中飛狗
今日帶小王子同小公主去街。
照慣例我抱小王子，柴柴抱小公主，小王子輕 d 嘛。
小王子傻左咁，係咁郁黎郁去，落樓梯果陣，仲爭脫左我。
我捉實條狗帶，唔俾佢直接落地。
我自己又要顧平衡，又要擔心差錯腳踩到佢，嘩，耍雜技咁，嚇死我。
好在大家都冇事咋...正一奀皮仔黎架...
兩支
嘩...凍冰冰呀...
我著長袖衫同長衭再加件褸，柴仔就短袖衫同短衭再加件褸去跑步。
望住佢，好得意，好好笑。
人如其名，柴柴咁，露出一對好似兩支 kwang 既腳，哈哈。
跑完步，去到 sit up 個位，我地係咁打噴嚏。
中左招啦，返到屋企要拍丸囉！
心靈相通
今晚約左柴仔出黎食飯。
(唔...唔記得為乜事咯...因為寫到呢度已經係二月十四日...hehe...)
佢隨口問句今晚食乜好，我諗一諗，話食打邊爐。
佢話佢都係咁諗，心靈相通咁話喎。
哎呀，佢睇得電視多(《肥田囍事》)，中左電視毒喇。
誤會
食完 lunch 大概一點幾，Cheese 話我個電話係時候會響。
我不經意咁話話：「好耐冇響啦。」
跟住佢靜左，呆呆地，問我係咪佢講錯野。
哈哈，原來佢誤會左。
06冬季大餐
每一季公司都會每人俾一百五十蚊同同事開心下。
之前都係叫到會算數既，今次出街食自助餐。
我地 Division 揀去香港北角海逸酒店。
嘩，好多款甜品呀！
亞臣仲驚我食唔好意思自己拿，係咁幫我拿 d 甜品返黎。
食完個大餐，個肚脹左兩寸呀！
精彩星期六
今日好多節目，要跑三場咁多。
朝早既節目就係同柴仔去跑步。
今次好努力呀，佢跑到最尾返轉頭，我就一直跑到見到佢就掉頭。
我冇減慢偷懶架，結果跑多左成百幾米，好多架喇！
走之前我地兜商場。
一路 brainstorm 我地既學界王國。
講到好真咁，好多 detail 位都諗埋。
但係都唔係幾過得到大眾既輿論壓力。
第二場節目係同暴龍表妹影畢業相。
諗諗下距離我影畢業相都有一段時間喇，日子過得真係快。
一大班親友，表妹只係做佈景板，當年我都好似係咁。
第三場係同事既飲宴。
時間尚早，搵架搭得最耐既車坐，費事咁早去到唔知做乜。
呢次既飲宴學到樣野，就係要好好安排入坐。
因為佢有一班叔伯坐左向同事圍又唔肯走，打亂哂個算盤。
仲要新郎哥自己出手撲位俾佢老闆，幾 lair hair。
食完同詩詩一齊走。
路上佢講佢屋企既野俾我知，好似電視劇 d 劇情咁。
估唔到我同電視果 d 主角生活得咁近。
返到屋企，柴仔報告我知佢吸收左 d 乜野內容，講左成兩個鐘頭呀。
你肯定唔記得自己講乜啦！
呢，迫下迫下果個方法呀。
嘻嘻...加油呀！
為食小王子
又到小王子同小公主行街既大日子。
去到柴仔屋企，噫，點解佢個嘴爛左既？
原來係小王子咬佢呀！
唔知係咪嬲佢行開左兩日呢？
落到街，見到前面有小狗。
小王子一路係咁衝過去。
都慣左佢一出到街就冇哂儀態架喇。
噫，點解行過左隻狗仔都唔吠，仲繼續衝既？
望下，原來佢係追住個拿住一袋糖既女仔。
哎呀，你係咪為食成咁呀~~
澳門遊記 (下)
訓醒一覺喇。
其實唔係訓得咁好，照計我唔怕"三寶"床架，可能係個枕頭好唔掂啦，又可能係唔慣冇左飛摌豬向身邊。
梳洗好，執返 d 野，叫人黎 check 房，大概十一點退房啦，拿返五舊水，繼續我地行程。
離開氹仔，搭穿梭巴過返澳門果邊，飲埋好抵既早餐個橙汁。
噫，又見到有緣情侶喎，澳門真係咁細！？
去黃枝記食個 lunch，叫左蝦籽撈麵同燒鴨粥。
等食既時候睇下張餐紙，哎吔，乜中環都有分店既，咁我地做乜黎食呀？
安慰下自己，係中環食唔到十八蚊燒鴨粥既。
柴仔話個蝦籽撈麵好腥喎，食左兩注就唔食喇。
我又唔覺得 d 乜野丫，幾好味呀。
食完野梗係要去下澳門最出名既景點--大三巴啦。
有樓梯可以上到大三巴後面，柴仔上到去望望下至知地下原來係穿窿架，驚驚。
冇叫人幫手影相，靠自己，所以好幾幅都影到好靚既天空，但唔見左大三巴。
不過後尾搵到個靚位，教好時間掣，影到張我覺得好好既相。
冇上炮台，因為我覺得行得辛苦又冇乜好睇。
觀光後搵食，但搵唔到六記紅豆餅，又冇食到禮記士多鮮果杯。
睇住地圖搵頤德行李康記食豆腐花。
柴仔話有人見我地拿住地圖四圍望，對我地虎視眈眈咁呀，我懵定定咁都唔知道。
入到間舖頭，未叫野，但已經有人送上凍豆花。
通常我食豆花都食熱既，不過已送到黎就是但啦。
係幾滑架，但柴仔話冇豆味喎，佢咀都幾刁。
(食完先記得影相，所以唔係影我地食果碗，係影待賣果 d。)
跟住就搵雪糕食。
兜來兜去都搵唔到間九記向邊。
正想放棄既時候，佢就出現向我地眼前。
叫左個三色雪糕(芝麻,士多啤梨,咖啡)，要成十二蚊，唔係好抵食，仲要唔係好好食。
又一 no next time。
係呀，又冇相呀，呢次仲係食完走左至記得，所以乜都冇。
証明我地都唔 pro...成日掛住食。
下一個目標係澳門瑪嘉烈蛋撻店既酥皮葡撻。
之前柴柴一路嚷住要食葡撻，但我又唔俾佢食鉅記同KFC果 d 喎。
鉅記又唔係出名葡撻，食 KFC 不如返香港食啦。
呢個葡撻好新鮮架，因為係等佢出爐架。
The next station is 二龍喉公園，目的係帶柴柴搭松山纜車。
導遊又發揮佢盲摸摸既本領喇，即係落左車，搵唔到公園入口。
都係行錯左個路口姐，最後勿又搵到。
買單程票要兩蚊，來回票三蚊，我地揀左來回囉，好似抵 d。
上到山，bing ling bang lang 咁行去東望洋燈塔，因為驚趕唔切去下一站。
到此一遊，影左張相就走喇。
下一站係漁人碼頭。
向巴士上面，竟然見到有緣情侶向街上行，真係咁有緣？
到左漁人碼頭，大就大喇，但真係有 d 大而無當囉。
咁大個唐城，得個城，係咪貨倉黎架？
荒荒蕪蕪咁，度度都未起好，未開咁。
聽到有導遊講，相入面既酒店要幾多幾多錢一晚，嘩，搵"X"住咩。
哎呀，no next time 呀！
好快就行完個漁人碼頭，等我地仲預咁多時間。
行過去金沙娛樂場。
過黎咁耐，住果間酒店既賭場都冇去過。
企向 d 賭桌側邊，都唔知賭乜。
話玩老虎機既，但見到係電腦式既，唔係以前 d 手杆式，信唔過，冇玩。
可能今日行得太多，好快就好肚餓。
去左間好特別既餐廳食野，叫左手撕雞同星州炒米。
柴柴話呢隻雞仲好食過隻血鴨...
(唔好意思，都係掛住食，所以冇相睇。)
已經行到冇乜野好行。
結果同上次一樣，走去逛八佰伴。
邊吃邊喝邊行，吃既係粟一燒煙肉芝士味，喝既係花旗蔘蜜。(呢 d 唔使相掛)
行到咁上下，靈性既鞋帶就提示我地係時候走喇。
行去碼頭，經過果條天橋好鬼凍呀。
仲好鬼大風，搞到影相都影唔得 sharp。
(死都唔話係技術問題，呵呵呵。)
一路到船上都唔再見唔到有緣情侶 lu。
回程既船，我地坐下層既 37A 同 37B。
俾個職員點左一點，明明係左邊既位點左我地去右邊。
向船上 I 住柴仔訓，訓訓下醒左。
船拋得幾緊要，我訓極都訓唔返，心就知出事喇。
好想好想快 d 落船。
到落得船，企起身行左幾步，唔得，衝返轉頭拿個嘔吐袋。
唔...好冇用呀...又好似好失禮咁，所以個口嘔唔出，對眼就係咁嘔。
落左船仲係想嘔想嘔咁。
淨係返屋企呢十幾分鐘入面都作嘔左三四次。
我知道你好支力架，但令到你冇得跳上架巴士。
咁樣完結我地既澳門之旅，有 d 美中不足。
澳門遊記 (上)
期待已久既今日終於到喇！
尋晚真係唔係幾訓得著，係因為興奮緊張既心情，定係天氣凍得滯，搞到我成晚 luin 公蝦米咁訓唔到？
唔知咯！
約左柴柴 9:00 向大門口等，一齊去食早餐。
揀左食 KFC，餐飲轉左橙汁，諗住可以上船飲嘛。
咁上下時間，去買個雜誌，然後去換船飛。
向果個細細既商場，我都唔係好識搵路，柴柴話開始擔心。
(因為今個旅程由我做導遊...嘻嘻...)
排隊入閘喇！
第一關係收船飛，貼左個 8K 同 8J 貼紙仔向個票尾度。
第二關就係出境，貪得意行 e-道。
拿左智能身分證咁耐，今次第一次用咋。
過哂關就搵泊位，時間尚早，所以有位坐低等。
聽住 d 叫人登船既廣播，係女聲黎既，講得好搞笑。
尤其係 passenger 同 for aboarding，後者我地聽左好多次都係聽到 harmonic。
我聽到坐隔離對情侶 (後稱有緣情侶) 都向度笑緊。
可以登船喇！
見畫左位，又怕會暈船浪 (雖然已經啪左丸) ，所以冇迫住上船。
行去上船既時候，我諗起好唔好影低旅程既每一點，閘口呀、碼頭橋呀咁，柴仔話我好似鄉姑出城。
咁人地去旅行係咁架嘛。
上到船，睇下 d 救生指示，同埋確保有伸手可及既嘔吐袋，之後就安心睇下雜誌，睇下風景。
咁岩原來有緣情侶坐我地後面。
透露少少行程俾柴仔知，嘩，聽佢既反應，我就好擔心呢兩日打算做既野都唔合佢心意。
餚左差不多個半鐘船，終於到喇！
成程船又無話好暈既，托賴啦。
到入境大堂，彌漫住一陣陣既白花油味。
我話其實好多人都暈船浪，柴仔話，其實係我前面有個老婆婆姐。
出到去第一時間走去個旅遊資訊中心，拿左 d 地圖同巴士路線資料。
點解咁緊張去拿？
因為我連第一站點去未知...哇哈哈...
去到巴士站，有位女士見我地頭岳岳，就問我地去邊。
我話去媽閣廟，佢就叫我地上埋剛剛向站果架車。
碌倒咁上車，都睇唔清楚係 10 定 10A。
好在都去到目的地。
印象中我好似未去過媽閣廟。
本來都話裝返支香架，但結果都冇。
入去行下，向門口附近見到兜有錢既水，唔知做乜既呢？
行左上去，同舊寫住「太乙」同「海覺」既石頭影幅相就走咯，都叫做到此一遊丫。
離開媽閣廟，下一站就係向左近既海事博物館。
會去，係因為有免費入場票，唔係邊有咁神心丫。
入面有 d send e-card 既玩意，可惜我完全唔記得朋友仔既 email，只係 send 左俾自己。
d 內容係罐頭 message 黎既，亂揀一通咋。
無聊一輪，就去搵食喇，目標係海灣餐廳！
旅遊書介紹食呢度既血鴨同梳乎里，就食呢兩樣囉，兩個人食得幾多野丫。
試左之後，柴仔話麻麻喎，no next time 咁話。
唔...我覺得呢，又唔係話難食，唔係咁抵姐。
呢餐係呢兩日最豪既一餐呀，食左一百六十個大洋。
食完野搭車去酒店 。
我地今次住向氹仔既新世紀，係五星級酒店黎架！
本來等架 21A，但等左好耐都唔黎，轉搭 11 囉，兜左幾耐下至去到酒店。
仲要兩個笨笨，行左去人地放工個後門。
終於到大門，睇個門面幾堂皇！
排隊 check in，都等左幾耐下，可能岩岩有穿梭車到啦。
手續差唔多辦妥既時候，話要收 $500 cash 或簽 $1000不過數按金。
哎呀，我冇咁多錢喎，簽咭又好似好危險咁。
好在柴柴有錢咋。
嘩，如果真係又冇錢又冇咭咁點算呢？
兩個笨笨，拿左匙咭，左騰右騰搵路上房。
我地既房係 363，比較低層，但冇所謂啦，訓一晚姐。
柴仔放低佢既行李，我就執走 d 唔要帶出街既野，輕裝再出發。
黎到氹仔，梗係要去下好多手信賣既官也街啦。
見近近地，勿唔搭車囉，都係行左一陣之嘛。
本來諗住食下豬扒包既，但係好似晏左 d 喇，索性唔食囉，費事又要搵，搵到又冇得食啦。
淨係食左莫義記既雞蛋大菜糕，之前都食過，唔係話好特別，不過一場黎到，都要食下既。
行埋過去龍環葡韻住宅式博物館，不過除左免費開放果間屋仔外，其他都冇入去呀。
見到有兩對新人結婚影相，衰衰既柴仔話人 d 花車好娘。
我冇影到相呀，唔...係誇張小小姐。
返轉頭買野，向晃記買左肉心杏仁餅、蛋黃杏仁餅、肉切酥同雞仔餅。
經過澳門街，聞到好香既薑味，吸引我地買埋薑糖。
五點幾，時間有 d 唔三唔四，唯有破天荒應承咁早去食飯。
搭車去蘇利安圓形地，我地打算去峰景餐廳嘛。
唔熟 d 車站，驚死搭過站會過左橋，估估下咁，見咁上下就禁左鐘先，好在都岩岩好落岩車。
哎呀，但係間餐六點先開呀，笨笨又白走一趟喇。
行返酒店歇一歇腳，諗住夠鐘再出過黎。
向酒店問口又見到有緣情侶喎，原來住埋同一間酒店。
再出門口時，計一計數，怕到時食完先去旅遊塔會關門，所以改行程，去旅遊塔先。
向酒店去旅遊塔，冇車直接到，要先坐車去葡京再轉車。
即場購票，每人盛惠七十個大洋。
搭升降機上去58樓既室內觀光主層，例牌梗係去睇下個玻璃地下啦。
你都咪話呀，行上去真係驚驚地架，不過都唔夠柴仔果下驚，個心跳左出黎喇。
上埋61樓室外觀光廊，嘩，好凍呀，行左個圈就返落去咯。
咁就一百四十蚊喇，no next time 呢！
去塔底下果個澳門旅遊塔之日本遊樂園，影左 d 好鬼馬既相。
睇下下面呢碗麵，係咪好似好好味呢？
其實係張海報黎架咋，假架，咪流口水呀。
係時候返去食晚飯喇。
睇張巴士路線資料，搵到架 21 號返氹仔果邊，但係等左好耐都等唔到。
結果又要坐車去葡京再轉車，神秘既 21 號，信唔過。
過橋果陣，見到有車禍呀，好在好似都冇人受傷，只係擾攘左陣姐。
峰景餐廳既蟹粥，我黎喇！
幾年前同同事黎過食，一直念念不忘，今日終於可以再食到。
淨係叫左個細峰景蟹粥同碟蠔油菜心，柴仔有其他野想食架，不過又係果句囉，兩條友食得幾多丫。
呢餐係第二豪餐，食左八十五個大洋，但我覺得抵好多喎。
食到九點幾，旅遊書介紹阿伯蛋茶大概十點開始賣，所以我地就搭車走去三盞燈果度。
唔係好識路，個司機又唔係好友善，係咁睇住 d 車站，對住個地圖。
搵到三盞燈，但對住五個路口，好迷。
柴仔卻可以依住四年前同同學黎既記憶，一擊即中。
搵到伯伯喇，但佢話十點九先賣。
都冇地方好去，返三盞燈果度坐下囉，咁上下先行返過去。
有其他人等緊喇，不過仲未有得賣，排隊等囉。
見工亞伯一煲一煲咁隔渣、上爐，重複又重複，我覺得佢好辛苦。
等到差不多十一點，終於等到喇。
人龍好有秩序咁逐個上前，我地買左兩碗都有蛋既，收左 15 蚊。
不過價錢之迷就出現喇...我聽到之前有人叫兩碗淨水加一碗有蛋 22 蚊。
照咁計，淨水勿 7.25 蚊一碗！？
係咪咁了 lung 呀？
(冇蛋茶既相呀，因為掛住食，唔記得左影。)
返到酒店成十二點喇！
歎埋個蛋茶就沖涼訓覺咯。
今日都好充實丫，係咁搭車四圍去。
不過柴仔話條頸有 d 痛，可能係要頭岳岳認路啦。
都係個導遊冇鬼用囉...
//
14/3/07 21:36