生活點子

爸爸七十大壽舉家台北四天之旅

28/9/2010
十一點半機，約左九點向機場等。
同康泰職員拿機票，佢問我地搭唔搭早一個鐘頭，即係十點二十五分飛既機去喎。
爸爸一聽到就係咁話好，諗都唔諗問都唔問。
就係咁，原本諗住向機場歎個早餐既計劃就失敗左，柴公要向奇華執個包食黎食藥。

好趕好趕咁上飛機。
十二點幾到台北。
到左機場先換台幣，冇 4 呀，得 3.9 咋。
跟住姐姐搭大有巴士去酒店 - 天成大飯店。
酒店接待處個女接待員，聽佢講野，不得不說一句"巧可愛耶~"
三間房都唔同間隔，可惡既係我地間房對住四個大煙囪！

收左房之後既活動，就係等。
等團長計劃行程...
話去鼎泰豐，但搵唔到向邊...
結果肚餓得滯，只係向酒店附近既無名小店搞掂。

食完野出發去第一個景點 - 中正紀念堂。
冇時限，任影唔嬲。
媽媽上唔到中間有個像果個堂，我唔放心佢一個人等我地，所以我都冇上到。
我以為我會上返去，但結果冇囉。

一個景點後，就到晚飯時間。
我地去左暴龍表妹推薦既紅蟹將軍。
入到餐廳，唔係好覺得自己向台灣，因為四圍都有人講廣東話...
蟹、牛、海鮮都好正！
爸爸仲話第晚再去 tim，我地唔睬佢之嘛~

29/9/2010
食過酒店既早餐，返房睇電視+訓覺等出發。
由士林站轉巴士去故宮博物院。
我上巴士嘟左悠遊卡先發覺應該係落車嘟。
落車果陣同返司機講我上車嘟左..."我嘟左"...
行故宮博物院行左三個鐘，跟團的確冇可能做到。
"lunch"去晶華(故宮博物院範圍餐廳)。
佢 show 出黎個價錢都 ok，但諗下都係古怪架喇，結果真係得細細碗囉。
食完返士林站，準備去淡水。
行行下發現 Tiamo 專門店，柴仔有收獲呀！
買左個量杯仔，越南壼貴過香港，所以冇買。
去到淡水，沿住海邊行，好趕好趕咁行去尾影日落。
我都支力啦，支力死亞媽呀。
天黑行老街，買下野食下野。
我買左個超~
大家都買左鳳梨酥。(間舖頭本來冇人，經我地一買變左好多人)
晚飯嘛，犀利咯，我諗好多香港人都未試過...台灣吉野家！
冇辦法啦，老人家唔頂得肚餓，唯有食豬唔食牛囉。
返酒店，向台北站，姐要爸爸媽媽帶路返酒店，考下佢地認路能力。
唉，好似亞笨同亞占咁。
睇住佢地一個行左，一個行右，唔見左大家...
唉...

30/9/2010
弊...今日病病地...頂住...
尋日買左個超，今朝幾好天勿戴下囉，點知出事...
坐臺鐵去瑞芳，再塔平溪線去十分。
去到瑞芳已經落雨...
去到菁桐，太大雨車都冇落，返轉頭去平溪搵食。
食店叫福昌，好在好味，隻雞同 d 筍食到亞姐同亞媽回味無窮。
我都係咁二買到 d 天燈仔做手信。
夜晚去西門町。
唔知係唔係因為我地唔係好 shopping 既人，所以覺得冇乜好行。
爸爸媽媽大膽啦，經過尋晚試驗，今晚自己返酒店。
我地就去新東陽又掃一輪貨，買 d 鳯梨酥俾自己食。
其實我都好驚返去按門鐘冇人應，好在都冇事。

1/10/2010
last day 咯~
今日好天返喇。
去忠烈祠睇兵哥操兵，佢地滴哂汗咁。
成日咁操法，難怪個個都仲瘦過柴仔。
last 一日，終於完心願，走去食鼎泰豐。
之後就冇乜景點喇，東逛逛西逛逛，自由行下咁。
最後坐國光巴士去機場。
四日就咁就完喇~

Labels: 點滴生活

posted by ccming @ 3:06 am