生活點子

一田購物日

一田又大減價呀！
由於柴仔有新玩意，所以都去睇下。

搭小巴過去，小巴司機亞姐真係唔掂。
向個大十字路口，黃燈，因為見到警車(我估)所以急煞。
但都凸哂出去，凸到十字路口中間，要倒返車。
差佬又冇黎捉喎。
車上面有個手抱細路撼到頭，勁喊。
佢亞媽呵返佢，話司機曳曳。
喊完一大輪，個細路望住個司機講野。
佢亞媽同佢友人翻譯，話佢鬧緊個司機。
最得意係，個亞媽問個細路：「食粒糖就唔痛喇，好唔好呀？」。
個細路毫不猶豫咁話：「好呀。」
細路真係直。

行哂一田，結果佢都冇收獲，得我買左件 Minnie 手手腳腳衫。
都行左好耐呀，要趕返屋企食飯，都冇行埋 IKEA。

無啦啦玩無聊遊戲：著乜野、彈乜野、整乜野。
著衫、著鞋、著襪...
彈波子、彈耳仔、彈撻、彈卷...
整蛋糕、整車、整電腦、整鬼你...
哈哈，我成日都夾硬黎，邊夠我玩！

Labels: 劃火柴

posted by ccming @ 9:56 am