生活點子

沿途有你

做運動，身體好。
今日遠征去搵柴柴帶我去遠征。
呢次活動係柴柴發起架，我估佢係一心為我身體好。

換好衫，出發。
目的地係海濱公園長廊盡頭。
沿途有柴柴師父教我點呼吸、點擺手、點落腳。
初初都仲有氣講下野，點不知都未到海濱公園長廊已經唔係好得。
向佢身都未熱既時候，我已經有心無力。
係有去到盡頭既，不過行多過跑囉，渣渣。
你講得冇錯，如果唔係有你，我根本唔會一個人走去跑。
如果唔係有你，果段長廊我根本唔會行落去。
好彩，沿途有你。

去到健康徑果度，我只係玩得幾個。
其實莫講話我已經有心無力丫，平時我都唔鍾意玩果 d 架既。
一黎手臂冇力水，二黎細個果陣跌過落地嘛*，三黎...其實開始唔係好舒服。

食午飯既時候，我地向度討論第四度空間，我覺得我地好 pro 呀。
究竟飛越未來同回到過去係點既呢？
好似龍珠個時光房咁丫，定係去左有另一個自己既空間呢？
係咪而家發生既野，已經包括埋未來既人回到過去所引致既改變呢？(好似雪狼湖咁)
咁郭晉安果套隔世追兇又點解釋呢？ 人人都 reboot 左，清左 memory，點解佢仲似為陳慧珊跛左，佢老豆死左？
如果真係有飛越未來同回到過去，點樣監管呀？
嘩，好複雜呀！

夜晚返屋企食飯，慶祝母親節嘛。
之後仲成家人去左超級市場 shopping。
感覺好特別。

今日我覺得我好"loan"呀。
第一，太陽好猛嘛。
第二...嘻嘻...你囉...你 sip 高枕頭諗下你做乜會整"loan"我啦。

*話當年：
應該係三四年班咁上下既事，果陣學校去烏溪沙旅行。
向我玩個架既時候，有個同學除左我隻白飯魚，唧我腳板底，我一掙扎，一鬆手，咁就跌左落黎喇。
又唔係腳落地架喎，背脊咁上下落地架喎，攤左向度囉。
記得有班哥哥姐姐見到，無啦啦同我唱生日歌乙水我唔好喊。
冇去醫院既，但直到回程返學校之前，都訓左向醫療室囉。
呢次意外，搞到我背脊敷左幾日跌打。
果個同學好驚架，但我印象中好似冇篤到佢出黎喎。

posted by ccming @ 11:42 pm