生活點子

黑色星期五

今日個 lunch，話咁快就消化左。
由"一肚氣"負責填返個胃既空位。
唔係胃氣脹果d氣，係激氣果d氣。

今朝早收到指示，話下午要去做 test，目的地係工務中央試驗所大樓。
我同AT都唔知係邊度，所以由蘋果帶隊。
唔好怪我唔上網搵個大樓向邊，因為公司冇地方俾我上網。
向啓業邨食完飯，集齊人就出發。
蘋果話行三四個字就到，所以唔搭車，行去。
蘋果指一指俾我地睇，話係企業廣場(粉紅十字)後面。
到左企業廣場，蘋果又話係企業III(橙十字)後面。
由於係好急步行，我已經支力支力地。
(佢地係急步，我係好急步，因我腳短嘛。)
到左企業III，蘋果再話係九龍貨倉(紫十字)果度。
一望，眼都突。
結果係行左半個鐘頭有多。
做完個 test要返公司，打死都搭的士。
錶都唔跳就返到。

我覺得呢一役簡直係心理同生理既折磨。
果種以為到又未到，又突然同目的地多左一段距離既感覺，你明唔明白？
蘋果同AT都只係著住一件短袖衫，但嚴格計，我著左三件，你明唔明白我既感受？
蘋果同AT都係短頭髮，你又明唔明白長頭髮所受既熱度係佢地既幾多倍？
到左目的地，有水機，但冇杯冇樽，有得睇冇得飲，你感唔感受到果份無奈？
(註：目的地冇其他飲品供應，返到公司連水機都冇，公司附近冇任何商店買賣飲品，你渴望要水既心情要一直維持到放工。)

為左幾蚊的士錢搞到咁辛苦，我慳家都慳唔落呢幾蚊。


路線圖：尾段唔係好記得，但冇十成都有九成。

posted by ccming @ 11:50 pm